نبتة الخلود عند قدماء المصريين: إتعرفوا على فوائد الصبار واستخداماته

0

يعتبر نبات الصبار من أقدم النباتات الطبية اللي عرفها الإنسان، وكان المصريون القدماء بيستخدموه في وصفات التجميل، وفي عملية التحنيط اللي اتشهروا بيها، وفي صناعة العصير لمعالجة مرض الصفراء، وكملين للأمعاء، ودهان للجلد لعلاج التقرحات، والجروح.

ويُقال إن الصبار كان واحد من أسرار نضارة بشرة كليوباترا، وتم اكتشافه لأول مرة في العصر الحديث سنة 1862، بعد ما لقوا كلام مكتوب عن خصائص الصبار العلاجية، والجمالية على أوراق البردي المصرية، اللي تاريخها بيرجع لسنة 1500 قبل الميلاد. وسماه المصريون القدماء “نبات الخلود” لقدرته على محاربة علامات تقدم السن، وكان الصبار من النباتات المقدسة عندهم، فكانوا بيحفروا رسوماته على المعابد.

الصبار بيتقال عليه “النبتة المعجزة”، و”المعالج الطبيعي”، وبينمو في المناخ الحار، والجاف. وفي أنواع كتيرة جدًا من منه بس إحنا مش بنستخدم غير نوع واحد بس، وهو اللي بيقولوا عليه “الصبار الحقيقي”، أو “Aloe vera”. وبيعتبر صبار الألوفيرا من أقوى المعجزات الطبيعية، ويمكن تناوله لتحسين الصحة العامة، فهو بيساعد على معالجة قرحة المعدة، والأمعاء، وبيمنع ترهل البشرة، وهو مضاد طبيعي للجراثيم، والبكتيريا.

الصبار مليان فيتامينات، وأملاح ضرورية لجسم الإنسان، وأحماض أمينية، وده لأنه بيحتوي على فيتامين ب، وفيتامين س، وكالسيوم، وبوتاسيوم، وصوديوم، وزنك، ومنجنيز، ومغنيسيوم، ومواد مضادة للالتهاب، ومسكنة للألام. وهو بيساعد كمان في علاج أمراض القناة الهضمية، والتهابات البشرة، والجلد، ومعالجة الحروق، والجرب، وقرصات الحشرات، وبيقوي المناعة، وبيساعد في تقليل مستوى السكر في الدم عند مرضى السكر.

وعلشان تقدروا تحققوا أقصى استفادة من الصبار، جبنالكم وصفات سهلة وسريعة تقدروا تستخدموها:

هنخلط حبة موز مهروسة بشوية جل صبار، مع معلقة من مياه الورد، ونحط الماسك على وشنا، ونسيبه لغاية ما ينشف، ونغسله بمياه عادية، وده بيساعد في ترطيب، وتفتيح البشرة العادية، أو الحساسة.

ولترطيب البشرة الجافة، هنخلط حبة خيار، مع معلقة عسل، ومعلقة من جل الصبار، ونحطه على وشنا لمدة 20 دقيقة، ونغسله بمياه عادية.

وبالنسبة لتقشير، وتفتيح البشرة، وإزالة الحبوب، هنخلط معلقة كبيرة من جل الصبار، ومعلقة عسل، ومعلقة ليمون، وندهنها على وشنا مع فركها، ونغسلها بمياه عادية.

الصبار كمان مفيد للشعر، فهو بيرطبه، ويقويه، وبيشيل القشرة، والخلايا الميتة من فروة الرأس، وده لاحتواءه على مضادات للميكروبات اللي بتساعد على تهدئة الفروة، وبيدي للشعر لمعان، وملمس ناعم.

ومن وصفات الشعر السهلة والسريعة اللي تقدروا تستخدموها:

هنخلط جل الصبار بزيت الخروع، وندعك فروتنا بيه، ونسيبه ليلة كاملة، ونغسله تاني يوم بمياه دافية، وشامبو.

وممكن نخلط جل الصبار مع زيت الزيتون، وشوية لبن، وندعك فروتنا بيه، ونسيبه لمدة من 30 ل 40 دقيقة، ونغسله بمياه دافية، وشامبو.

عصير الصبار كمان ليه فوائد كبيرة للجسم، فهو بيعتبر مكمل غذائي مفيد، وتقدروا تعملوه عن طريق طحن ورقة نبات الصبار، واستخلاص جل الصبار منه، ولأن كتير مننا ممكن مايستلطفش طعمه، ممكن نخلط معلقتين من جل الصبار مع كوب من عصير البرتقال في الخلاط، لغاية ما الجل يدوب في العصير. وممكن نخلط جل الصبار مع العسل لمدة 3 دقائق، وتناول معلقتين يوميًا، وده بيساعد على التخلص من السموم المتراكمة في الجسم، ويعمل على التخلص من الجراثيم.

آخر كلمة: ماتفوتوش قراءة القهوة مش بس للشرب: اتعرفوا على وصفات القهوة وفوائدها للبشرة

تعليقات
Loading...