بتفتح فيسبوك أو إنستجرام وتشوف صورة تعجبك وتقول ياه نفسي أصور صورة زيها؟ نفسك تعرف طرق التصوير الاحترافي؟ عامل فولو لأكتر من حساب لمصورين عرب وأجانب مبهور بشغلهم، ونفسك توصل لمستواهم في يوم من الأيام بس مش عارف تبدأ منين؟ في التقرير ده هنقدملك بعض المقتراحات اللي تقدر تحطك على طريق التصوير الاحترافي…
ابتدي تصوير أياً كان مستوى معداتك
مش لازم لما تبدأ يكون عندك أحسن كاميرا وأفضل عدسات، ابدأ باللي تقدر عليه حتى لو هتبدأ بموبايلك القديم، المهم إنك تبدأ تتعلم الأساسيات. ولو عندك المقدرة إنك تشتري معدات، اختار كاميرا تكون مناسبة لحالتك المادية، وكمان لمستواك في التصوير، وممكن تستعين بمصور محترف أو أي حد من صحابك أو قرايبك اللي ليهم خبرة في التصوير علشان تختار المناسب ليك.
اتفرج كتير على فيديوهات تعليمية
إنت دلوقتي اختارت الكاميرا أو وسيلة التصوير المناسبة ليك، إبدأ دور على فيديوهات تعليمية على الإنترنت، وخاصة اليوتيوب اللي مليان فيديوهات بكل اللغات لأساسيات التصوير سواء صور أو فيديوهات، وكمان أساسيات التعامل مع الكاميرا أو الموبايل اللي هتستخدمه في التصوير.
ومن ضمن قنوات اليوتيوب العربية اللي بتعلم أساسيات التصوير:
- قناة نادي القاهرة للتصوير الفوتوغرافي.
- قناة عبدالرحمن صلاح اللي بتقدم نصائح للتصوير وتعديل الصور بالموبايل.
- قناة أحمد خالد اللي ممكن تساعدك في اختيار المعدات المناسبة ليك، وبتقدم نصائح وأساسيات للتصوير وبرامج تعديل الصور والمونتاج.
اهتم دايمًا بالتغذية البصرية
التصوير فن، وعلشان يقدر المصور ينمي مهاراته فيه وتجيله أفكار جديدة دايمًا، بيحتاج تغذية بصرية. اتفرج على أكبر عدد ممكن من الصور والفيديوهات، ولو عجبتك فكرة صورة معينة، حاول تصور صورة زيها بطريقتك. ممكن تقلد في الأول لغاية ما يبقى عندك خبرة كفاية تخليك تبتكر صور في أي مكان، ودايمًا تابع أكبر عدد ممكن من المصورين المحترفين على السوشيال ميديا، ولو عرفت تتواصل مع حد منهم وتاخد اقتراحات فدي خطوة هتساعدك كتير.
اختار نوع معين من التصوير وحاول تبدع فيه
أنواع التصوير كتيرة، سواء صور أو فيديوهات، ففي مثلاً تصوير الأكل، والبورتريه، والحياة البرية، والرياضة، بالإضافة للتصوير الصحفي. اختار أكتر نوع إنت شغوف بيه وتعمق فيه أكتر، وسواء كان التصوير بالنسبة ليك مجرد هواية، أو عاوز تخليه وظيفتك الأساسية، أهم حاجة هي الشغف والصبر.