ضحك في الكواليس: ليه الفنان حسن حسني كان روح وضهر أي عمل؟

لو الجمهور كله هيجمع على موهبة وخفة دم ممثل واحد، فأكيد هيكون الراحل العظيم الفنان حسن حسني، اللي حرفيًا وجوده في أي عمل كفيل إنه ينجحه، لموهبته الكبيرة، وخفة دمه وتلقائيته، وكمان حرصه على مساعدة كل فريق العمل وإنه يكون ضهر ليهم، واللي بالتالي كان بيخلي العمل ينجح بشكل عام.. وحتى بعد رحيله لسه الكل بيتكلم عن فنه وقد إيه كان بيساعد كل فنان في بداياته، وحتى المخرجين لسه بيتكلموا عن تلقائيته وخفة دمه، وإزاي كان بيطلع منه إفيهات بشكل عفوي وتلقائي واللي كان بيتسبب إن بقية فريق العمل ينفجر من الضحك في اللوكيشين، فيضطروا يعيدوا المشهد كذا مرة ووصلت إنها تعدي الـ 25 مرة!

فيلم الباشا تلميذ

فيلم الباشا تلميذ اللي لحد النهارده الناس بتضحك وبتتفرج عليه، كان مستحيل يطلع أبدًا بالشكل ده، ولا ينجح النجاح الكبير اللي كلنا شايفينه، من غير دور حسن حسني اللي خلى الفيلم يبقى تلقائيًا بيضّحك أكتر 10 مرات.. ففي مشهد حسن حسني وهو بيخطب لرامز جلال، الناس حرفيًا وقعت في السينمات على الأرض من الضحك، بس هل تعرفوا إن ده حصل كمان في الكواليس؟

من كواليس المشاهد التي لا تنسي من #افلامي للعظيم #حسن_حسني .. وكريزة ضحك اخري لم تتوقف لمدة نصف ساعة بسبب مفاجاة عم حسن …

Posted by Magdy El Hawary on Monday, January 25, 2021

مخرج الفيلم مجدي الهواري، قال إن الفنان حسن حسني كان بيرتجل وسط المشهد بتلقائية، بما فيهم جملة “اعقلوا الكلمة” اللي بتعتبر أشهر الجمل اللي لحد النهارده بتستخدم في الميمز، وحرفيًا لو كتبتوا في سيرش اليوتيوب “اعقلوا..” هتلاقي على طول المشهد طلعلك.. فارتجل جملة “اعقلوا الكلمة” و”اسأل شهاب ولا انت مابتنزلش”، وانفجر كريم عبدالعزيز ورامز جلال من الضحك، لدرجة إنهم اضطروا يعيدوا المشهد 27 مرة، وفي الآخر اضطروا ياخدوا المشهد اللي كانوا بيضحكوا فيه أثناء التصوير.. وأضاف مجدي إن ضحك كريم عبدالعزيز ورامز جلال في المشهد المعروض كان حقيقي ومش في السياق المكتوب.

فيلم الناظر

مش قادره ابطل ضحك فعلا …. *انا طموحاتي ابقى منحرف **يا استاذ لمبي لمب نفسك شويه*

Posted by Hamsa Mansour on Wednesday, January 13, 2021

من البوم الذكريات ♥️♥️المشهد ده تم اعادة تصويره اكتر من ١٧ مرة بسبب ضحك علاء وبعدها محمد سعد وبعدها حلمي وبعدها كريزة…

Posted by Magdy El Hawary on Wednesday, January 13, 2021

أما بالنسبة للفيلم اللي بيعتبر أيقونة للكوميديا “الناظر” فكمان المخرج مجدي الهواري كان منتج الفيلم، وحكى عن إزاي في مشهد لما قال لمحمد سعد “يا لمبي لمب نفسك شوية” كانت برضه ارتجالية، وده اللي خلى الكل يضحك واضطروا يعيدوا المشهد 17 مرة علشان يطلعلنا بالشكل اللي شوفناه في النهاية.

وبجانب الفيلمين دول، فحسن حسني من الفنانين المعروفين إن كان دايمًا كواليسهم جميلة ومضحكة، لإنه كان عنده القدرة إنه يرتجل مع الحفاظ على السكريبت والسياق الأصلي، وكان دايمًا بينصح فريق العمل ويجيبلهم أفكار عن إيه إفيهات ممكن تتقال علشان تخلي المشهد مضحك أكتر.. وحتى بعد رحيله، لسه سيرته الطيبة وأفلامه الجميلة بتخلينا نضحك من قلبنا.

آخر كلمة: شكرًا للفنان حسن حسني اللي سابلنا كنوز من الإفيهات والكوميديا الجميلة!

تعليقات
Loading...
Tweet
Share
Share
Pin