محمد رمضان و3 أخبار حلوين له في يومين!
لسه 2021 في بدايتها، ولسه كل واحد بيحاول يدور على حاجات يفرح بيها، واليومين اللي فاتوا كانوا يومين حلوين جدًا على الفنان محمد رمضان، علشان 3 حاجات حصلتله من تريند لترشيح لرجوعه للحفلات في مصر.. فتعالوا نعرف إيه حكاية الأخبار دي؟
اترشح رمضان إمبارح لجايزة “أم تي في” أفريقيا، وهي جايزة للموسيقى في القارة الأفريقية، واترشح لفئة اختيار المستمعين، ونشر الخبر على خاصية الستوري على حسابه على انستجرام، وتقدر تصوت من هنا.
وده جيه بعد ما نزل أغنيته الجديدة، اسمها “مصباح علاء الدين” اللي عملت ضجة أول ما نزلت على طول، وكانت تريندينج رقم واحد على اليوتيوب في 17 دولة عربية، وبنته شاركته في فيديو الأغنية، وكان الكل بيتكلم عليه، فحقق 3.3 مليون مشاهدة، والإعجاب وصل لـ 239 ألف من المتابعين.
اقرا كمان: مين نمبر وان؟ صراع جديد ما بين محمد رمضان وأحمد الفيشاوي على أجدد أغانيهم
كمان الخبر التالت إن محكمة القضاء الإداري بمجلس الدولة حسمت الجدل حول منع رمضان من الغناء والتمثيل، ورفضت تقبل الدعوى اللي اتقدمت من المحامي سمير صبري، ضد نقيب الموسيقيين، لإلزامه بعدم إصدار أي تصاريح غناء للفنان محمد رمضان لإحياء أي حفلات غنائية، وبكده اتسمحله يغني من جديد ويعمل حفلات في مصر.