لو أنت من عشاق وهواة الأفلام وهي بالنسبة لك نوع من التسلية والمتعة، أكيد برضه هتحبها وهي بتتقدم في شكل مختلف سواء حد بينتقدها أو بيقدم لك ملخص لها ويحكي لك قصتها أو بيجيبلك الزتونة ويقولك تشوف الفيلم أو ماتشوفوش من خلال قنوات وصفحات بتمثل حلقة جذب وشد بين الفيلم والمشاهد وتقولك الكلام على إيه.
فيلم جامد
للناقد محمود مهدي، عنده كده طريقة ومقدمة يبدأ بها الحلقة ومن ثم يبدأ لك في شرح الفيلم، وإيه اللي كان متوقع منه كان يتوقعه منه وخيب ظننا ولا لأ، وبجانب الأفلام الجديدة فبيقدم مناقشات لفئات مختلفة زي “أفضل فيلم قدم بلوت تويست” “أفضل فيلم اتكلم عن تاريخ مصر” “أفضل فيلم وسيناريو في 50 سنة” وحصاد كل سنة، وبجانب الأفلام أحيانًا في شهر رمضان يقدم مراجعات وانطباعات عن مسلسلات رمضان والأهم من كل ده هو حرصه على أن كل ده يكون بدون حرق.
سينما تولوجي
مراجعات بتعتمد في المقام الأول على تأثير الصوت مع عرض مشاهد للأفلام اللي بيحكي عنها، دردشات مع محمد أبو سليمان ومعاه بعض الضيوف والنقاد عن ما هو عظيم في السينما المصرية والعالمية في السينما تولوجي وأحيانًا يقدم “الدراما تولوجي”، والأهم هو تركيزه على الأعمال القديمة لأهم وأفضل المخرجين زي وحيد حامد بشكل يجعلك تشوف الفيلم بعيون تانية زي الهروب وموعد على العشاء وفيلم ثقاقي، وأقسام تانية زي “أشهر مئة جملة في السينما المصرية”، واللي بتعرض فيها الجمل اللي بيستخدمها معظمنا بشكل شبه يومي في مختلف المواقف.
بتاع أفلام
قناة تانية بتقدم مراجعات وبيتابعها 479 ألف، وبطريقة كوميدية قدم صانع المحتوى أحمد كمال محتواه عن الأفلام والمسلسلات، يحلل الفيلم وأداء الأبطال، وزيادة عليه بيعمل بودكاست يستضيف فيها صناع السينما والدراما مع دردشة لذيذة.
فيلملوخية
الفيلم بعيون أخرى، جربت قبل كده تلاقي حد يكسر لك كل مسلماتك بخصوص أفلام معينة وتكتشف أنه عادي أنها تغلط زيها زي أي فيلم؟ ده اللي عمله صاحب قناة “فيلملوخية”، بخفة دم بيجي يهدم لك القواعد ويظهر لك بعض الأخطاء في الأفلام القديمة والجديدة.
فيلم في الخمسينة
لو مش عايز لا ريفيو ولا مراجعات وعايز اللي يجيبلك من الآخر، عليك وعلى “فيلم في الخمسينة” يلخصلك كل الأفلام والمسلسلات على مختلف تقييمها ويجيلها لك في شوال.