تجديد مطار الموصل الدولي يفتح باب السياحة: أماكن للزيارة في المدينة العريقة

من وقت سيطرة جماعات داعش المتطرفة على مدينة الموصل، عاصمة محافظة نينوي، اللي تُعتبر تاني أكبر مدينة في العراق، في سنة 2014، وخلال معركة التحرير اللي خاضتها القوات العراقية ضد الجماعات دي في 2017، اتعرضت المدينة العريقة لواحد من أسوأ أشكال الدمار، وماتمش استخدام مطار الموصل الدولي من 2014 لحد النهارده بسبب الدمار اللي اتعرض له.

يوم 17 يوليو أعلن رئيس الوزراء العراقي، مصطفى الكاظمي، عن الخبر السعيد بوضع حجر الأساس لإعادة بناء مطار الموصل الدولي، واللي هيتم الإنتهاء منه وتشغيله في سنة 2024. وفي سنة 2021، كانت وقعت هيئة الطيران المدني العراقية اتفاقية مع شركة ADP Ingenierie الفرنسية لإعادة بناء المطار، ولكن تم اسناد مهمة إعادة البناء النهارده لشركتين تركيتين، ومن المتوقع إتمام المهمة خلال سنتين.

عن: ina.iq

إعادة تشغيل مطار الموصل الدولي هيعيد توصيل المدينة العريقة بباقي العالم وهيفتح الباب لعودة السياحة في محافظة نينوي، واحدة من أهم المحافظات اللي ممكن تزورها في العالم، والغنية بمعالم سياحية تاريخية مهمة جدًا كانت اتقطعت صلة العالم بيها من حوالي عشر سنين.

في المقال ده، هنناقش أهم الأماكن السياحية اللي ممكن تزورها في محافظة نينوي ومدينة الموصل بعد عودة تشغيل المطار الدولي:

الآثار القديمة في محافظة نينوي ومدينة الموصل

أكتر من 2000 سنة من التاريخ الثري موجودين في محافظة نينوي، ما بين آثار تاريخ عتيق من ممالك حضارات ما بين النهرين، اللي تُعتبر من أقدم وأعظم حضارات العصر البرنزي، لآثار إسلامية بتشكل خط زمني فني وتراثي للحضارة الإسلامية في العراق، للمناطق الطبيعية الخلابة اللي هتآسرك بجمالها. كل ده هيكون متاح للزيارة مرة تانية.

مدينة نينوي الأثرية:

رسم تخيلي لمدينة نينوي الآشورية قديمًا، عن: blogspot

بتشتغل الحكومة العراقية على تحضير مدينة نينوي الأثرية لاستقبال الزوار خلال السنة اللي جاية، والمدينة اللي تُعتبر من أقدم مدن العالم، كانت عاصمة الحضارة الأشورية في العراق، ونشأت سنة 6000 قبل الميلاد.

حدائق بابل المعلقة، عن: elmstba

اتبنى في مدينة نينوي قصور في عصر الحضارة الآشورية وبوابات وبيوت وأسواق أثرية عظيمة، زيّ قصر سنحاريب الفخم، وواحدة من عجائب الدنيا السبع اللي لسه موجوده النهارده وهي حدائق بابل المعلقة، ومكتبة آشور بانيبال اللي لقينا فيها سجلات تاريخية شديدة الأهمية في شكل 30 لوح طيني فيها ملحمة جلجامش وقصة الخلق البابلية وأسطورة أدبا والرجل الفقير من نيبور وغيرهم.

واحد من بوابات مدينة نينوي، عن: m3rfh

وتقدر تزور كمان بوابات مدينة نينوي الضخمة اللي تم بناءها سنة 700 قبل الميلاد علشان تكون مدخل المدينة الآشورية من السور العظيم اللي اتبنى حواليها.

متحف الموصل

من داخل متحف الموصل، عن: todaynewsiq

تم افتتاح متحف الموصل سنة 1952، وبيضم مجموعة رائعة من التحف الأثرية اللي ترجع إلى ما قبل التاريخ، وآثار الحضارات الآشورية وآثار مدينة الحضر، والآثار الإسلامية.

بدأت الحكومة العراقية في تجديد مقتنيات المتحف سنة 2021، بعد ما اتعرضت للتدمير على إيد مقاتلين في تنظيم داعش، وبدأ الخبراء الفرنسيين بالفعل في ترميم قطع كتير في المتحف.

الآثار الإسلامية في محافظة نينوي ومدينة الموصل

شكلت العراق نقطة محورية في نشأة وازدهار الحضارة الإسلامية من سنة دخول الدولة الإسلامية لأراضيها سنة 12 هجريًا، واللي تعتبر واحدة من أهم الدول اللي أثرت بشكل كبير على تشكيل الحضارة الإسلامية الوليدة، وبالتالي فالآثار الإسلامية في العراق مهمة جدًا لعملية التأريخ الإسلامي.

جامع النوري الكبير

بقايا الجامع النوري الكبير قبل بداية عملية إعادة البناء، عن: entermediadb

يرجع تاريخ الجامع النوري الكبير في مدينة الموصل للقرن الـ 12 الميلادي بأمر من القائد المسلم نور الدين محمود زنكي السلجوقي التركي، حاكم حلب والموصل، ويشتهر بالمأذنة المايلة واللي اسمها “المنارة الحدباء”، واللي مالت ناحية الشرق مع الزمن.

المنارة الحدباء، عن: almrsal

اتعرض الجامع للتدمير على إيد مقاتلين داعش، وبعد استعادة الموصل منهم فازت مجموعة من المهندسين المعماريين المصريين بمهمة إعادة بناء المسجد الأثري مرة تانية.

جامع النبي يونس

جامع النبي يونس، عن: pinimg

يُعتقد إن عملية بناء جامع النبي يونس بدأت في القرن الرابع الهجري، وتم بناءه على تلة عالية وسط مدينة الموصل خلاه محط أنظار كل الناس في المدينة.

عن: pinimg

وبيتميز الجامع بأسلوب بناء استثنائي منحه قيمة تراثية مختلفة عن كل جوامع مدينة الموصل، ويُعتبر الجامع مقدس لناس كتير من ديانات مختلفة مش بس المسلمين.

أماكن طبيعية خلابة ممكن تزورها في محافظة نينوي

الطبيعة الجغرافية المميزة للعراق كمركز التقاء نهرين هم الفرات ودجلة بيمنحها تربة خصبة وبيميزها بمناطق طبيعية شديدة الجمال، وعلشان كده هتلاقي في محافظة نينوي مناطق سياحية طبيعية جميلة جدًأ.

شلالات الموصل

منطقة الشلالات موجودة على بعد 11 كيلو شمال شرق الموصل، والمنطقة الجميلة دي بتغذيها المياه من عيون طبيعية في منطقة قضاء الشيخان في شمال المدينة.

شلالات الموصل، عن: twimg

بالإضافة للشلالات الساحرة، بتغطي المنطقة مساحات واسعة من المناطق الخضراء، واللي بتتحول لجنة خضراء خلال موسم الربيع، وعلشان وفرة المياه العذبة في المنطقة هتشوف مزارع واسعة على مد البصر حواليك طول الوقت.

عن: aljazeera

المنطقة السياحية دي كانت ومازالت بعد خروج داعش من المنطقة، واحدة من أهم مناطق الجذب السياحي بالذات لأهالي محافظة نينوي.

عن: aljazeera

غابات الموصل

على نهر دجلة في شرق مدينة الموصل، هتلاقي واحدة من أهم المناطق السياحية في العراق وهي منطقة غابات الموصل، وبتشتهر المنطقة دي كواحدة من أهم مناطق الجذب السياحي للعراقيين وبالذات أهالي مدينة نينوي.

غابات الموصل، عن: fbcdn

بيستمتع أهالي المنطقة بجمال الغابات دي على ضفاف نهر الفرات وهما بيشربوا الشاي المغلي على الفحم ويلعبوا الدومينو والطاولة ويشووا الكباب والسمك وينبسطوا مع أهاليهم.

منظر غابات الموصل من نهر الفرات، عن: wikimedia

وعلى طول شارع الغابات الموازي لضفاف نهر الفرات هتلاقي مجموعة كبيرة من الكافيهات اللي بتتميز بمناظر رائعة فاتحة طول الوقت وبتستقبل الضيوف.

عن: shafaqna

العراق بلد عريق بحضارات متعددة قامت قبل بزوغ فجر التاريخ في العالم، وعلمت البشرية بدايات الحضارة، وهتلاقي فيها أماكن سياحية خلابة كتير، مش بس محافظة نينوي، فاعمل قائمة بالأماكن اللي نفسك تزورها وجهز شنطتك وروح العراق وشوف البلد الجميل ده بنفسك، وادعم إعادة إعمارها وساعدها تقوم مرة تانية وتبقى العراق الشامخ.

أخر كلمة: ماتفوتوش قراءة: الغوص في الحطام: أشهر أماكن حطام في البحر الأحمر تقدر تغوص فيها

تعليقات
Loading...
Tweet
Share
Share
Pin