الغوص في الحطام: أشهر أماكن حطام في البحر الأحمر تقدر تغوص فيها

الغوص متعة عند ناس كتير بيشوفوا من خلالها عالم تاني مستخبي مليان بالأسرار والكنوز، والغوص في أماكن الحطام متعة معجونة بالمغامرات والخبايا للناس اللي غاوية السكة دي، وللسبب ده قررنا نجيب لكم أشهر أماكن حطام في البحر الأحمر تجرب فيها متعة الغوص بشكل مختلف.

ثيستلجورم

عن: cnn arabia

واحدة من أهم السفن اللي وزارة السياحة المصرية اهتمت بتوثيقها كأثر، وهي سفينة إنجليزية بتقع في نطاق سواحل جنوب سيناء، وبالتحديد شمال شرق شعاب عليّ. اتبنت سنة 1940 وغرقت سنة 1941 لما قصفها الطيران الألماني علشان كانت محملة بالسلاح للجيش الإنجليزي، حسب كلام الدكتور إيهاب فهمي، رئيس الإدارة المركزية للآثار الغارقة بوزارة الآثار لاندبندنت عربية،.

هي حاليًا موجودة في مياه البحر الأحمر شمال الغردقة، عليها بعض المعدات العسكرية، وبتُعتبر متحف بحري حربي مفتوح تحت المياه؛ هتلاقي في عربيات مدرعة وشاحنات وأحذية، وبتعتبر وثيقة مهمة بتؤرخ للحرب العالمية التانية.

السفينة بتقع على عمق 30 متر وأعمق نقطة هي الدعامة وعمقها حوالي 32 متر، بس خلي بالك التيارات ممكن تكون قوية أحيانًا سواء على الحطام أو السطح وفي اتجاهات مختلفة، وممكن تخلي الغوص صعب في المنطقة دي بالتحديد لإن عمق الغطسة وظروفها بتحتاج للغطاسين المخضرمين. ودرجة الحرارة بتترواح ما بين 19 ل28 درجة، والغطسة في العادي بتبدأ من الساعة 4 الصبح لإن الرحلة بتتجاوز الأربع ساعات، وبالتالي هيبقى في وقت إنهم يعملوا غطستين وترجع على الساعة 6، وقفات التأمين إجبارية في الغطسة دي والمراقبة الشديدة على امدادات الهواء.

تريستار

في أعماق مياة خليج العقبة في الأردن هتلاقي طيارة تجارية غير أردنية قديمة، وفقًا للCNN، الطيارة موجودة في مكان مافهوش شعاب مرجانية كتير، تم إغراقها بهدف رفع أسهم سياحة الغوص، والغريب إن الطيارة فضلت منسية في مطار الملك حسين الدولي، لحد سنة 2019 لما قرروا إنهم يشتروها وبعدين يتم إغراقها للتشجيع على الحياة البحرية.

الطيارة موجودة على عمق يتراوح ما بين 15 ل28 متر، الغواصين المحترفين يقدروا يدخلوا الحطام من ورا قمرة القيادة “الكابينة”، وعلشان يسهلوا وصول الغواصين لجوا الطيارة شالوا مقاعد الصف اللي في الوسط، وممكن يخرجوا من البوابات اللي في النص واللي عمقها 20 متر.

وتحت جناح السفينة بالتحديد هتلاقي شعاب مرجانية ناعمة وأخطبوطات، وحوالين الحطام نفسه هتلاقي مجموعة مختلفة من الأسماك.

 وبسبب عمق السفينة لازم الغواص يبقى محترف، ولازم يبقى في حجوزات قبل ما تنوي تنزل علشان الموضوع محتاج قوارب للوصول للمكان.

عبارة سالم إكسبريس

عن: Red sea

رغم الحادث المأساوي اللي وراها، بس بقت أهم مواقع الغوص المثيرة في قاع البحر الأحمر وفي العالم كمان، حادثة راح ضحيتها 470 شخص. لما تنزل هتلاقي مقبرة بحرية، وهيجيلك مشاعر من الحزن والأسى لما تتفرج على متعلقات الناس الموجودة من 30 سنة.

بحسب موقع غرفة سياحة الغوص والأنشطة البحرية، مسموح للناس بالغوص عادي بس مش مسموح لهم الدخول لجسم العبارة. وعايزين نفكرك إن وقت الغوص مهم في الإضاءة لو حابب تصور اللي هتشوفه، لإن الحطام ده بالذات بيجذب آلاف السائحين من هواة رياضة الغوص والمغامرة. وهتلاقي العبارة أبعد عمق لها لسطح المياه هو على بعد 30 متر وأقرب عمق هو 14 متر.

رحلة الغطس للأعماق داخل حطام العبارة بتستغرق 3 غطسات، ولازم مدرب الغطس يكون على معرفة بأماكن الدخول والخروج للعبارة.

هتلاقي على جسم العبارة شعاب مرجانية صلبة ومرنة والطحالب والمحاريات والقشريات وأنواع كتير من الأسماك الكبيرة والصغيرة والملونة، ده غير إنك تقدر تنزل طول السنة مش شرط وقت معين. أعلى درجة حرارة للجو ممكن تقابلها هي 34 في شهر 6، والمياه ومستوى الرؤية معتدل طول السنة.

جيناس دي

جيناس دي اتبنت على أساس إنها تبقى متخصصة في نقل البضائع، كانت 100 متر طول و16 متر عرض. في 1983 كانت في طريقها من كرواتيا للسعودية، وكانت مُحملة بأخشاب لينة منشورة ووقتها اصطدمت بالركن الشمالي الغربي من شعب أبو النحاس المرجاني وغرقت، ومن وقتها وهي مقصد سياحي للغوص، ومن الأماكن اللي بتحظى بشعبية كبيرة عند الغواصين.

أقصى عمق هناك هو 25 متر، وهتلاقي أسماك زجاجية والشعاب المرجانية الناعمة وتعابين الموراي وأسماك العقرب والأخطبوط وأسماك الأسد وسلاحف ودلافين. وأكتر شهور من السنة تقدر تشوفهم فيها هم شهر أغسطس ونوفمبر، وأكتر شهر بتعمل فيه غطسات هو نوفمبر. يوليو هو أكتر شهر بيقل فيه مستوى الرؤية هو ومارس وأبريل بس الرؤية بشكل عام بتبقى كويسة بس للاحتياط خد كشاف،وبالنسبة لتيارات الهواء، خد زودياك معاك علشان توصل للمكان.

كيمون إم

 شحنة من 4500 طن من العدس المعبأ في ميناء اسكندرون التركي رايحة لبومباي، ومشيت لبورسعيد وعبرت قناة السويس وفي طريقها خبطت في الركن الشمال الشرقي من حيد شعب أبو نحاس المرجاني. ولو ركزت، هتلاقي إن أكتر الحطامات موجودة في المنطقة دي، واللي بيسموها مثلث برمودا البحر الأحمر، وفي أكتر من حطام سبع سفن هناك.

شهر خمسة ونوفمبر هم أنسب شهور للغوص ورؤية الشعاب والأحياء البحرية، وشهر يونيو ويلويو هم أكتر شهور بيقل فيهم الغوص، والكويس إنها مناسبة لكل المستويات حتى درجة الحرارة بتتراوح ما بين 15 ل35.

الغوص في الحطام متعة وهواية عند فئة من الناس، عندها شغف اكتشاف الخبايا والأسرار مجرد ماتجربها مرة بتتدمنها وتحب تعيش فيها.

أخر كلمة: ماتفوتوش قراءة: غير الساحل، 5 مصايف اتنست بس لو رجعنالها هننبسط

تعليقات
Loading...