الخير .. من أكتر الكلمات اللي بنسمعها في شهر رمضان، اللي بيشجعنا على فعل الخير كجزء من روحانيات الشهر الكريم. ومن خلال المساعدة والتبرع لمبادرات ومؤسسات خيرية مش بتاخد مساحة كافية من التسويق والإعلانات زيّ مؤسسات تانية كبيرة، تقدر تكون عضو ناشط في فعل الخير، مش بس في رمضان، ولكن على مدار السنة كلها، وعلشان نساعدك تبقى ناشط في الخير، هنعرفك على مبادرات خيرية محتاجة مساعدتك، على مدار الشهر المبارك.
مافيش خير أجمل من إنك تقف جنب طفل محتاج لك وماعندوش سند في الدنيا غير أهل الخير، ولو عايز تبقى من أهل الخير يبقى “دار السندس للأيتام ذوي الإحتياجات الخاصة” محتاج لمساعدتك. الدار اتأسس سنة 2003، ومن وقتها وهو بيرعى الأطفال الأيتام من ذوي الهمم، ومن خلال كلامنا مع أستاذة ولاء جمال، مديرة العلاقات العامة في الدار، هنعرف إيه الخدمات المختلفة اللي بيقدمها الدار، وازاي نقدر نساعد الدار في رعاية الأطفال اللي عايشين فيه. كملوا المقال علشان تعرفوا أكتر عن طرق مساعدتهم والتبرع لهم.
مين هما دار السندس للأيتام ذوي الاحتياجات الخاصة؟
بيعرف الدار نفسه على إنه مؤسسة إيواء بترعى الأطفال الأيتام من ذوى الاحتياجات الخاصة اللي مالهمش أهل ياخدوا بالهم منهم، واللي تم العثور عليهم وتسليمهم من قبل وزارة الشئون الاجتماعية أو مؤسسات وزارة الصحة والسكان، وبيقدم الدار جميع الخدمات للأطفال دول؛ أمهات بديلة وإشراف مؤهل وأخصائيين متميزين وصور الرعاية المختلفة اللي بيحتاجها الأطفال.
اتواصلنا مع الأستاذة ولاء، مديرة العلاقات العامة في الدار، علشان تقول لنا ازاي الدار بيشتغل، محتاج إيه ونقدر نساعده ازاي.
دار السندس للأيتام بيعمل إيه؟
الدار اتأسس سنة 2003 ومن وقتها وهو بيرعى الأطفال الأيتام من ذوي الاحتياجات الخاصة، والنهارده عندهم أكتر من 280 طفل متقسمين على أربع فروع، أول فرعين في مدينة نصر، واحد في في شارع الخليفة الامر – ورا الحديقة الدولية، وده فرع الحديقة الدولية، وفرع معرض السندس في امتداد شارع عباس العقاد جنب لحديقة الدولية. الفرع التالت في التجمع الخامس، الحي الرابع، جنب مول السرايا، ورا جامع خاتم المرسلين، والفرع الرابع في مصر الجديدة في شارع الفريق محمد رشاد، بوابة 3 نادي الشمس.
غير إيواء الأطفال ورعايتهم، الدار بيوفرلهم الرعاية الصحية والعمليات الجراحية والأدوية اللي محتاجينها، ده غير التعليم وتدريب الأيتام علشان يكونوا أفراد مستقلين ومتعلمين.
الدار محتاج إيه حاليًا؟
الدار حاليًا بيحاول يتوسع أكتر علشان يقدر يستقبل أطفال أكتر محتاجين رعاية، وعلشان كده بيبنوا مباني جديدة في التجمع، والمباني دي محتاجة المواد الأساسية للبناء من حديد وأسمنت ومواد إنشاءات.
والدار دايمًا في حاجة لمواد غذائية وملابس وأدوية علشان يرعوا الأطفال ويوفروا لهم حياة آدمية، غير العمليات الجراحية اللي الأطفال بيكونوا محتاجين لها بسبب الإعاقات اللي عندهم، واللي بتستهلك موارد كتير من الدار وبيبقى محتاج للموارد دي بشكل مستمر.
ازاي تقدر تساعد؟
الدار محتاج دعمك المباشر، وأول طريقة تقدر تساعد بها هي التبرعات، وممكن تتبرع من خلال البنوك المختلفة، أو من خلال البريد المصري، أو من خلال خدمة فوري ومصاري وميجا مصر، أو من خلال مندوب، وعلشان تعرف أرقام حسابات الدار في البنوك ومعلومات عن طرق التبرع التانية، تقدر تدخل على الصفحة دي.
تاني شكل من أشكال المساعدة اللي الدار محتاجها هي التطوع على أرض الواقع، وتقدر تكلم الدار على رقم 01005090708 أو تبعت لهم إيميل على Dr.Amalsalh@Gmail.com علشان تعرف أكتر عن طرق التطوع، وازاي تقدر تكون موجود معاهم في الدار علشان تساعد الأطفال بنفسك وبطريقة مباشرة.
والدار محتاج أطباء كتير علشان يساعدوهم في رعاية الأطفال صحيًا وتوقيع الكشوفات اللازمة عليهم، ولو في أطباء يقدروا يساعدوا بعمليات جراحية، ده هيفرق كتير أوي مع الدار والأطفال اللي فيه. فلو كنت طبيب أو تعرف طبيب يقدر يوفر شوية من وقته، ساعد دار السندس في رعاية الأطفال الأيتام دول. وكمان الدار محتاج أدوية كتير، فلو تقدر تتبرع بأدوية، هتساعدهم جدًا.
زيارتك للأطفال الأيتام مهمة
لو مش هتعرف تساعد بتبرع أو تطوع، تقدر تساعد بزيارة بسيطة للأطفال دول، الزيارة بس هتفرحهم لإنهم محتاجين يشوفوا ناس جديدة ويتفاعلوا معاهم، والزيارة دي ممكن تغير حاجات كتير بالنسبة لهم. لو تقدر تزورهم كل وقت والتاني، اعمل كده، وزيارتك هتفرق كتير.
أخيرًا: الأطفال الأيتام من ذوي الإعاقة في دار السندس مش بيتسلط عليهم أي أضواء، وماحدش يعرف عنهم حاجة، فكل ما تتكلم عنهم أكتر كل ما هتساعد ناس أكتر يعرفوا طريق الدار ويقدموا مساعدات.