تبرعات بدون إعلانات: اصنع ابتسامة مع Community Dental Care

الخير .. من أكتر الكلمات اللي بنسمعها في شهر رمضان، اللي بيدعينا وبيشجعنا على فعل الخير بدون شروط أو مقابل. من خلال مساعدة والتبرع لمبادرات ومؤسسات خيرية مش بيتم التسليط عليها كفاية، تقدر تكون جزء من الخير ده، واحنا هنقولك على شوية من المبادرات دي على مدار الشهر الكريم.

الخير .. هي دي الكلمة اللي كانت موجودة في إجابات كل أعضاء مجلس إدارة “رعاية الأسنان المجتمعية” (Community Dental Care) لما سألناهم إيه أكتر حاجة بيحبوها في CDC. الخير .. بيتحقق من خلال القوافل الطبية والفعاليات المختلفة اللي CDC بيعملوها، ومن خلال كلامنا مع مايكل صفوت، رئيس النشاط الطلابي “Community Dental Care”، هنشوف ازاي بيقدروا من خلال خدماتهم المختلفة يساعدوا ناس كتير ويصنعوا ابتسامة خالية من الألم الجسدي والنفسي، تحت شعارهم “نحن نصنع الابتسامة”. كملوا المقال علشان تعرفوا أكتر عن طرق مساعدتهم والتبرع لهم.

مين هما CDC؟

Community Dental Care هو نشاط طلابي بدأ سنة ٢٠١٥ في جامعة مصر الدولية، وكان فكرة ٣ شباب شايفين إن دورهم كطلبة أسنان ماينفعش يقتصر على التعليم وبس، وكان هدفهم إنهم ينشروا الوعي عن صحة الفم والأسنان من خلال فعاليات توعوية في أكتر من مؤسسة. في سنة ٢٠١٨، الكيان ده كبر، وقرروا إنهم يبدأوا يعالجوا الناس ببلاش من خلال القوافل الطبية في محافظات مصر المختلفة. ووصف مايكل CDC ب”الخير، مساعدة الناس، والعيلة”.

الخدمات الأساسية اللي بيقدموها

التوعية بأهمية الحفاظ على صحة الفم والأسنان

من أهم الخدمات اللي بيركزوا عليها هي التوعية بأهمية الحفاظ على صحة الفم والأسنان، وبيعملوا ده بطرق مختلفة ومبتكرة على حسب الفئة العمرية المستهدفة؛ مسرح عرايس ومسرحيات للأطفال، وأنشطة بتساعد على تشغيل المخ للشباب. ومن أهم حملاتهم التوعوية على السوشيال ميديا هي “لحظة ابتسم” اللي بتقدم مواضيع متنوعة لها علاقة بعلاج الأسنان بطريقة خفيفة ولذيذة، زيّ إن الناس بتخاف تروح لدكتور الأسنان أو تطور فرشة الأسنان والمعجون.

من الحاجات الجديدة والمميزة اللي بيقدموها للأطفال هي القصص المصورة أو الcomic book، اللي بنشوف فيها شخصية “سوبر مولر”، المستوحاة من لوجو CDC، وهو بيشرح العادات اليومية اللي ممكن تأثر سلبيًا على الأسنان وتسبب مشاكل مختلفة؛ زيّ التسوس اللي بيسببه شخصية “باكتيريوس”، وأمراض اللثة، وكمان سوبر مولر بيشجع الأطفال إنهم يروحوا لدكتور الأسنان ويهتموا بأسنانهم.

عدنا إليكم من جديد بالعدد الثالث من مغامرات سوبر مولر و أعوانه الشيقة.
في هذا العدد، يتساءل الطفل الفضولي فريد عن سبب…

Posted by Community Dental Care – MIU on Thursday, February 11, 2021

القوافل الطبية والفعاليات

من ساعة ما CDC بدأوا يعملوا قوافل طبية في 2018، قدروا يطلعوا 15 قافلة في محافظات مختلفة غير القاهرة، وبيعالجوا الناس في القوافل دي بدون أي مقابل مادي، في 4 تخصصات أساسية؛ إزالة الجير، الحشو، الخلع، والأطفال، والدكاترة اللي بيقدموا العلاج هما دكاترة امتياز أو أكبر ودايمًا بيكون في دكتور كبير متخصص موجود في كل أوضة. ولما سألنا مايكل ليه بيميلوا إنهم يعملوا القوافل برا القاهرة، قال “الهدف بتاعنا هو الوصول للأماكن اللي ممكن يكون صعب أوي يوصلوا لعلاج الأسنان، لإن المستوصفات اللي بتكون قريبة منهم ساعات كتير مش بيكون فيها خدمات أسنان، بالذات إن علاج الأسنان غالي جدًا، وده كمان واحد من أهداف التنمية المستدامة اللي احنا بنسعى إننا نحققهم.”

السنة دي، CDC عملوا 6 قوافل في محافظات متنوعة، زيّ المنوفية، البحيرة، والشرقية، وقدروا يحققوا أرقام عالية جدًا في القوافل دي عن أي سنة تانية؛ عالجوا 276 في”قافلة الصف”، وكانوا النشاط الطلابي الأول اللي يعمل قافلة طبية أكتر من يوم، وبكده قدروا يعالجوا 580 شخص في “قافلة الشرقية”، وكمان هما أول نشاط طلابي بيقدم “حافظ مسافة” بعد علاج الأطفال، واللي يُعتبر مكلف جدًا. وعملوا كمان 7 فعاليات أو أيام مع مؤسسات مختلفة؛ اليوم العالمي لصحة الفم والأسنان بالتعاون مع الاتحاد الدولي لطب الأسنان، يوم اليتيم، وتوزيع شنط رمضان في القناطر الخيرية.

مايكل حكى لنا إن القوافل الطبية بتكون متعبة جدًا، مش بس في يوميها، لكن على الأقل طول الأسبوع اللي قبلها لإنهم بيكونوا بيجهزوا الأدوات والمواد اللي هياخدوها معاهم وحاجات تانية كتير، ويوم القافلة بيكون مليان بالتحديات، من أول السفر الطويل اللي ممكن يوصل ل4 ساعات، ولحد أهمية إنهم يطمنوا المرضى، بالذات الأطفال، إنهم مايخافوش من دكاترة الأسنان، وأهمية الحفاظ على النظام في وقت العلاج في القافلة بدون ما يقللوا من الناس اللي هما رايحيين يخففوا من آلامهم.

مايكل كمل كلامه وقال “في اللحظة اللي بنيجي نشوف فيها قدرنا نعالج كام شخص، كل ده بيختفي بشكلٍ ما، بس التشجيع والطاقة اللي جوانا مش بس بتيجي في الآخر مع الرقم اللي بنسمعه، لكن في المواقف الصغيرة اللي بتحصل.. عمري ما هنسى “أم محمد” في “قافلة الصف” اللي فضلت تلف علينا واحد واحد وتشكرنا.” ندى، نائبة رئيس CDC، أكدت الكلام وده قالت: “أكتر حاجة بحبها في CDC هو إحساس الرضا والصفاء النفسي اللي بحسه بعد كل قافلة بنعملها، وفرحة المرضى بعد ما بنعالجهم بعد وجع أيام وأسابيع ويمكن شهور كتير.”

مشاريع وأحلام نفسهم تبقى حقيقة

أهم مشروع CDC شغالين عليه دلوقتي ونفسهم يتحول لحاجة يشوفوها على أرض الواقع هو تقديم “التركيبات المتحركة” ببلاش، والمشروع ده مبني على دراسة طبية عملتها منظمة الصحة العالمية وأثبتت إن الناس لما مش بيلبسوا التركيبات المتحركة، ده بيسبب مشاكل صحية أكبر. وفي CDC، من خلال نظام متابعة الحالات اللي بيتبعوه في القوافل، لقوا إن 64% من الناس اللي عالجوهم بيحتاجوا التركبيات المتحركة دي.

التركيبات دي بتتعمل في 4 جلسات، والخطة بتاعتهم هي إنهم يعملوا قافلة لمدة 4 أيام، والسنة دي نفسهم يروحوا مركز أبو جندي التابع لمحافظة طنطا، والهدف بتاعهم هو تقديم 100 تركيبة متحركة، غير العلاج في ال4 تخصصات المعتادة. ومن أهم التحديات اللي بتقابلهم في المشروع ده هي التكلفة المالية الكبيرة؛ التركيبات المتحركة تُعتبر تخصص كامل بيتم إضافته، وكمان هيحتاجوا ضعف الأدوات والمواد اللي بيستخدموها طالما القافلة هتكون 4 أيام. نفسهم تتحول القافلة دي لقافلة سنوية، إيمانًا من CDC إن ده هيفرق مع الناس في شكلهم وصحتهم وحياتهم بشكل عام.

القوافل والفعاليات اللي CDC بيعملوها بشكل عام بتكون مكلفة، من أول المواد والأدوات اللي بيحتاجوا يشتروها كل مرة، أو الأجهزة الطبية اللي بتحتاج صيانة أو تغيير في أحيان كتير، ولحد معجون الأسنان والفرش اللي بيهتموا إنهم يوزعوها على الناس في كل قافلة أو إيفينت علشان يتأكدوا إنهم هيستمروا في اهتمامهم بأسنانهم.

مايكل كمان قال لنا إنهم نفسهم يبدأوا يطبعوا القصص المصورة أو الcomic book بتاعتهم، علشان يقدروا يسيبوها مع الأطفال ويضمنوا استمرار توعيتهم، ونفسهم كمان يكونوا بينشروا القصص دي على نطاق أوسع مش بس في القوافل والفعاليات بتاعتهم.

طرق لتقديم المساعدة والتبرعات

لو أنت دكتور أسنان وتحب تتبرع بوقتك وتشارك في القوافل الطبية، CDC هو المكان اللي “بيزقك لتحسين نفسك على طول، وبيفهمك إن كل خير بتعمله في الدنيا، مصيره يتردلك أضعافه تاني”، على حسب كلام رولا، وبمشاركتك هتختبر كلام دينا، نائبة رئيس CDC، لما قالت إن CDC هو “ضحكنا وقت تعبنا، علشان نشيل هموم غيرنا وهمومنا”. أنت تقدر كمان تتبرع بفلوس لمشروع “التركيبات المتحركة”، لطبع ونشر القصص المصورة وكتب التلوين، أو للقوافل والفعاليات. ولو عندك عيادة أو وسيلة للوصول للمواد والأدات والأجهزة الطبية الخاصة بعلاج الأسنان وتقدر تتبرع بها لCDC، دي حاجة هتكون بتساعدهم يخففوا من آلام ناس أكتر وأكتر.

تقدروا تتوصلوا مع CDC من خلال صفحتهم على الفيسبوك أو الإنستجرام، أو من خلال استخدام الأرقام دي: 01118642220، 01065018143، 01022511731.

والكلمات الأخيرة اللي مايكل حابب يسيبها معاك ومعاكي، “CDC بالنسبة ليا هو الخير اللي بنعمله في حياتنا. وببساطة، ابتسامة طفل كافية إنها تهون علينا أي حاجة.. دعوة شخص من قلبه لينا هي أكتر حاجة احنا بنحتاجها منهم

آخر كلمة: ماتفوتوش قراءة: تبرعات بدون إعلانات: أنقذ حياة مع مؤسسة “معانا لإنقاذ إنسان

تعليقات
Loading...
Tweet
Share
Share
Pin