خاص.. هدى المفتي بتحكي عن دورها في “سوتس بالعربي”: لا يعني لا

فجرت الحلقة التانية من مسلسل “سوتس بالعربي”، بطولة آسر ياسين وأحمد داود، أحداث مثيرة ساهمت في اهتمام واسع بالحلقة دي من المسلسل، بعد بروز اسم الفنانة هدى المفتي اللي أدت دور مميز.

الفنانة هدى المفتي في أحداث النسخة العربية للمسلسل الأجنبي “سوتس” كانت في دور سيدة بتربي ابنها لوحدها بعد وفاة زوجها، واتعرضت للتحرش من مديرها ومافيش أي محامي بيساعدها؛ لإنها مش معاها فلوس كافية إنها تغطي أتعابهم. وبعدين بيتولى مكتب “فريدة”، اللي بتقوم بدورها صبا مبارك، القضية وبتكلفها لـ “زين”، اللي بيقوم بدوره آسر ياسين بمعاونة أحمد داود.

وفي تصريحات خاصة ل”سكوب إمباير” قالت الفنانة هدى المفتي إن الرسالة اللي كانت عاوزة توصلها من الدور كانت واضحة وملخصها “لا يعني لا”، وإن المرأة لو عاوزة تعمل أي حاجة أو تاخد أي موقف، مش من حق أي حد يغير الموقف ده أو يجبرها على أي حاجة، وإن في حدود معينة للتعامل والحدود دي إنتي اللي بتحدديها.

وأضافت إن ماحدش من حقه يبتز المرأة لا عاطفيًا ولا جسديًا، وإنها لو قالت لأ مرة وصممت عليها، هتقدر تقول لأ تاني وقت ما تحتاج تعمل ده وهتفضح أي حد هيحاول ياخد منها حاجة غصب عنها أو يتعدى عليها باللفظ أو بالنظر أو بالإيد، وشددت هدى إن المرأة من حقها تعبر عن رفضها لأي حاجة مش مرتاحة فيها سواء في شغل أو في الحياة العامة.

عن الدور، قالت هدى المفتي ل”سكوب إمباير” إن المشهد كان تقيل جدًا والكلام كان بيحكي قصة شايفاها متجسدة قدامها بكل أحداثها، وده خلاها تشعر قد إيه ده حقيقي وقد إيه كانت الشخصية بتعيش حالة من الخوف بسبب موقفها بعد تعرضها للتحرش في العمل، وكمان حالة اليأس والإحساس بالظلم خلال محاولتها طلب المساعدة، علشان تاخد حقها وترجع شعورها بكرامتها.

معاناة مستمرة للنساء حول العالم وتنوع أشكال التحرش في العمل

بتعاني نساء كتير حول العالم من التحرش في أماكن العمل، وفي حركات اجتماعية بسبب تفشي الظاهرة دي في مختلف المجتمعات بشكل مؤسف، والحركات دي قامت بتشجيع النساء إنهم يتكلموا عن تجاربهم المختلفة وازاي التجارب دي أثرت على حياتهم في مختلف المهن.

مفهوم التحرش مختلف ومتعدد ومش مُحدد، خصوصًا مع عدم وجود سياسات واضحة للشركات لمواجهة الظاهرة دي، وده بيخلي ضحايا التحرش في أماكن العمل مش عارفين إنهم بيتعرضوا لمضايقات بتتصنف كتحرش، وهو اللي بيساهم في شعور النساء بعدم الراحة في أماكن عملهم.

أشكال متعددة للتحرش 

التحرش الجنسي المباشر هو الشكل الأكتر وضوح، وأبرزها المضايقات اللي بتتعرض لها النساء في أماكن العمل، وفي أشكال تانية من التحرش، أبرزها التحرش عن طريق ممارسة السلطة، وهو تحرش شائع جدًا في مكان العمل وبيمارس المتحرش فيه سلطته عن طريق التنمر والتحرش بالضحية اللي في مكانة أقل منه في التسلسل الهرمي للمكتب، وفي كتير من الحالات، يكون المتحرش هو المشرف أو المدير، زي ما شفنا في “سوتس بالعربي”.

والتحرس بيكون له تأثير سلبي كبير على الصحة النفسية للضحية، اللي بتحس بالإحباط والتقليل على المستوي الشخصي والمهني. والتحرش على أساس العرق أو لون البشرة أو البلد الأصلي أو الجنسية من أكتر أنواع التحرش المنتشرة، وللأسف، وبيتم تداوله من باب الهزار.

آخر كلمة: ماتفوتوش قراءة: بمناسبة يوم المرأة العالمي: 5 مخرجات مصريات أثبتوا نفسهم في صناعة الدراما

تعليقات
Loading...