بمناسبة يوم المرأة العالمي: 5 مخرجات مصريات أثبتوا نفسهم في صناعة الدراما

العمل الدرامي هو جزء مهم جدًا من التركيبة الثقافية لأي شعب في العالم، لإن الدراما هي مراية بتعكس الواقع الاجتماعي وبتشتغل على نقده وإعادة توجيهه، ويُعتبر وجود مخرجات مصريات في صناعة الدراما المصرية عامل حاسم ومهم في الأعمال دي، علشان نقدر نطلع صورة مشابهة للواقع من جميع وجهات النظر.

ولكن للأسف، الإخراج السينمائي والتلفزيوني في مصر لحد وقت طويل كان مسيطر عليه بدرجة كبيرة رجالة، فالنهارده هنتكلم عن 5 مخرجات مصريات قدروا يغيروا وجه الدراما العربية والمصرية، بالذات من خلال أعمالهم الإبداعية المميزة ومن خلال رؤيتهم النسوية والنسائية للواقع الإجتماعي.

1- إنعام محمد علي

مخرجات مصريات
عن: shahrayar

اشتغلت في التلفزيون المصري كمساعد مخرج في 1960، وأخرجت أول مسلسل تليفزيوني سنة 1964، وكانت مديرة إدارة برامج المرأة في الفترة من سنة 1974 لحد سنة 1985. أنتجت مسلسلات تلفزيونية كتير زيّ: ضمير أبلة حكمت، وأم كلثوم، وقاسم أمين. وأفلام زيّ الطريق إلى إيلات.

وأخرجت مسلسلات سيرة ذاتية لشخصيات مصرية مهمة زيّ مسلسل “مشرفة: رجل لهذا الزمن”، واللي بيحكي قصة حياة العالم المصري مصطفى مشرفة، ومسلسل قاسم أمين، اللي بيحكي عن حياة أول شخصية نسوية في الوطن العربي. ومسلسلات تانية كتير مشهورة ومحبوبة أوي زيّ ضمير أبلة حكمت، هي والمستحيل، سيداتي آنساتي، حصاد العمر، والحب وأشياء أخرى.

 وصفت إنعام أسلوبها الفني في لقاء صحفي مع المصري اليوم، وقالت إن كل أعمالها فيها غالبًا درجة من المصداقية العالية والواقعية في الأداء، وده اللي بيخلي المُشاهد يشوف نفسه في العمل ده لدرجة إنه بيخلط ما بين الوهم والواقع، وبيلاقي نفسه قدام دراما مُعَاَيَشَة مش مجرد حاجة مصنوعة.

2 – ساندرا نشأت

مخرجات مصريات
عن: ytimg

ساندرا هي واحدة من مخرجات مصريات اشتغلوا في أعمال مختلفة ما بين التلفزيون والسينما والفيديو كليب. دخلت عالم الإخراج من خلال فيلم روائي قصير هو فيلم أخر شتا، وأخرجت فيلم فيلم مبروك وبلبل سنة 1996 للممثل المصري الكبير يحيى الفخراني.

اتعرف اسم ساندرا نشأت كواحدة من مخرجات مصريات رائدات بعد نجاح فيلم ليه خلتني أحبك سنة 1999، وهو من تأليف وليد يوسف وبطولة كريم عبد العزيز ومنى زكي.

فيلمها التالت حراميه في كي جي تو حقق نجاح كبير جدًا برضه. وجربت تشتغل في مجال الفيديو كليب وأخرجت أغنية “فاكرك يا ناسيني” للمغني محمد فؤاد، وكمان أغنية “لماذا” لغادة رجب، واللي برضه حققوا نجاح مش عادي في الوطن العربي.

قالت ساندرا نشأت خلال استضافتها في برنامج It’s Show Time مع المذيعة أميرة عدلي وآية غرياني، واللي كان بيتذاع على قناة الحياة، إن أي مخرج داخل على عمل من إخراجه لازم يشوف في البداية كل اللي عايز يعمله، فلو عرف هو عايز إيه بالظبط هيعرف يحققه. وأضافت إنه لما بيكون عندها فيلم، لازم تشوف كل تفاصيله حتى الأفيش ومهما اتقال لها “مش هينفع” مش بتهتم، لإن حكمها الشخصي هو الأهم. 

3- كاملة أبو ذكري

مخرجات مصريات
عن: filfan

بدأت مشوارها الفني من خلال العمل كمساعد مخرج تاني في فيلم “131 أشغال” مع المخرج نادر جلال سنة 1993، وبعدها أخرجت فيلم قصير هو “قطار الساعة السادسة”، لكن رجعت اشتغلت مساعد مخرج تاني في أفلام “هالو أمريكا”، “اتفرج يا سلام”، “اللمبي” بطولة محمد سعد، و”ازاي تخلي البنات تحبك”.

قامت بإخراج أول أفلامها السينمائية “سنة أولى نصب” سنة 2004، وبعده أخرجت أفلام تانية كتير لها حضور قوي في تاريخ السينما المصرية زي “ملك وكتابة” و”عن العشق والهوى” و”واحد صفر”.

الإخراج السينمائي ماكانش كفاية لأبو ذكري، ودخلت عالم الدراما التلفزيونية وأخرج مسلسلات عظيمة ليها دول كبير في وعي الشعب المصري النهارده، زيّ مسلسل “ذات” سنة 2013، ومسلسل “سجن النسا” سنة 2014، ومسلسل “بـ100 وش” سنة 2020.

ظهرت أبو ذكري في واحد من اللقاءات التلفزيونية، واتكلمت عن ذكرياتها مع دخول المجال الفني، وقالت إن الإخراج واللوكيشن هما حياتها، وإنها بتحس بالاكتئاب لما بتبعد عنهم.

4 – نادين خان

بدأت نادين الدخول في المشهد الفني كمساعدة مخرج مع والدها المخرج الكبير محمد خان، وشاركت في مونتاج أعمال فنية كتير، باﻹضافة إلى إنها أخرجت أفلام قصيرة كتير منها فيلم “رؤية”، وأول فيلم طويل من إخراجها هو “هرج ومرج” وشاركت في أعمال المونتاج والمكساج (دمج الصوت) الخاصة بالفيلم.

من أخر أعمالها المهمة هو الفيلم الطويل “أبو صدام” اللي بتناقش فيه قضية الذكورة السامة (toxic masculinity) من غير ما تاخد موقف الهجوم أو الدفاع، وبتطرح فيه القضية من خلال يوم كامل على الطريق السريع مع سائق ترلة، اللي بيلعب دوره محمد ممدوح، وبنشوف في الفيلم المواقف اللي بتحصله وردود أفعاله الذكورية وأسبابها ومنابعها.

دخلت مجال الإخراج في الدراما التلفزيونية من خلال مسلسلات كتير من أهمها مسلسل “ليه لأ” الجزء الأول والتاني، ومسلسل “سابع جار”.

5 – شيرين عادل

مخرجات مصريات
عن: ytimg

هي مخرجة مصرية مختلفة ومتميزة وقدرت تحقق نجاح كبير في وقت قصير، وأثبتت اسمها في الساحة الفنية بقوة من خلال إخراج أعمال فنية مهمة لها صدى جماهيري كبير في مصر والوطن العربي.

كان من أشهر المسلسلات التلفزيونية اللي اشتغلت عليها هو مسلسل “سارة” من بطولة حنان ترك وأحمد رزق وسوسن بدر، ومسلسل “العار”، اللي كان نسخة جديدة (reboot) من الفيلم المشهور اللي بنفس الاسم وحقق نجاح مبهر، ومسلسل “سلطان الغرام”، و”دلع بنات”، و”هوجان”.

اتجوزت شيرين عادل المؤلف المصري محمد أشرف واللي شارك معاها في عمل مسلسل “سلطان الغرام”، ومسلسل “بعد الفراق والوالدة باشا”.

في لقاء صحفي مع الوطن قالت عادل: “أنا بحب الأعمال الاجتماعية وبلاقي نفسي فيها، وبشوف إن الأعمال الاجتماعية النسائية والرومانسية محبوبة جدًا من الجماهير، ومُؤخراً الأعمال الوطنية بقت بتُؤثر في الناس”.

وكشفت إنها اتعلمت الإخراج على إيد والدتها، وورثت عنها حب القراءة والانضباط، وكانت بتروح معاها مبنى الإذاعة والتليفزيون “ماسبيرو”، ووضحت عادل إن وظيفة الإخراج صعبة على الستات وتقيلة.

قولوا لنا في الكومنتات مين أكتر مخرجات عربيات بتحبوهم وليه بتحبوهم وإيه اللي بيميز كل مخرجة وبيميز أعمالها، وقولوا لنا إيه أكتر أعمال فنية بتحبوها للمخرجات اللي اتكلمنا عنهم هنا في المقال ده.

آخر كلمة: ماتفوتوش قراءة: في يوم المرأة العالمي: 5 ستات خرجوا من تنميط المجتمع لهم

تعليقات
Loading...
Tweet
Share
Share
Pin