عقد نقيب الموسيقيين المصريين، المطرب مصطفى كامل، أول اجتماع بعد أيام قليلة من تعيينه في منصبه الجديد. الاجتماع كان في مقر النقابة، ووسط مجموعة كبيرة من زملاء النقيب الجديد ومناصريه.
حسم مصطفى كامل، خليفة أمير الغناء العربي، هاني شاكر، اللي استقال من نفس المنصب قبل شهور، مجموعة من القرارات بحضور مجلس النقابة، في أول ظهور رسمي لكامل كنقيب للموسيقيين المصريين.
كانت معظم القرارات اللي أخدها بتختص بزيادة المعاشات والإعفاء من الغرامات، لكن القرار الأبرز واللي عمل ضجة إعلامية هو إيقاف التصاريح الخاصة بمطربين المهرجانات، وهو القرار اللي جدد الصدام القديم بين النقابة ومطربين المهرجانات.
بعد كده أصدرت النقابة بيان أكدت فيه إن المجلس قرر إيقاف التصاريح الخاصة بالمطربين دول بشكل مؤقت، واللي هيستمر لحد الاجتماع الجديد للمجلس، وأضاف البيان، إن في الإجتماع الجاي هيتم دراسة ملف مطربين المهرجانات بالكامل وطريقة منظمة، ووضح البيان كمان إن القرارات الأخيرة دي بهدف الحفاظ على قيمة مصر الفنية.
استضاف تلفزيون اليوم السابع النقيب الجديد، مصطفى كامل، بعد فوزه في انتخابات النقابة اللي تمت الأسبوع اللي فات، وقال خلال اللقاء مجموعة من التصريحات منها: “في شلة متحكمة في أمور النقابة وبتاكل الأخضر واليابس وبأمر الله مش هسيبهم.. أنا معنديش هزار“ وكمل كلامه: “بخسر الدنيا بسبب صراحتي، ومش عايز أضايق ناس عزاز عليا وهاني شاكر قيمة كبيرة وصديق عمر“.
وأكمل مصطفى كامل: “في تهديدات وصلت للنقابات الفرعية، بتقول لو منحت صوتك لمصطفى كامل هنشيل النقابة الفرعية بمجلسها وده عيب.. وصلنا لمرحلة سيئة، احنا مش في غابة، ولازم الشؤون القانونية بالنقابة تزكي العدل، ومش كل السرقات لها مستندات تبث الواقعة“.
تاريخ نقابة الموسيقيين مع مطربين المهرجانات: صدام لا ينتهي
في آخر كام سنة، كان اسم نقابة المهن الموسيقية عامل جدل كبير على وسائل التواصل الاجتماعي ووسائل الإعلام المصرية، وهي الظاهرة اللي زادت بعد تعيين هاني شاكر نقيبًا للموسيقيين.
بدأ هاني شاكر ولايته بإصدار مجموعة من القرارات اللي بتختص بتقنين أوضاع مطربين كتير، وكانت القرارات كلها تحت مظلة حماية التقاليد وصورة مصر.
الحكاية كلها بدأت في 2015، لما اتولى شاكر منصب النقيب، واستهل منصبه بإصادر إنذار في شكل بيان إعلامي، بداعي حماية الحياء والذوق العام، واللي حذر فيه أي فنانة تظهر بـ”ملابس غير لائقة” في الحفلات أو الكليبات الغنائية أو البرامج، بمنعها من ممارسة المهنة.
جات بعد كده سلسلة من القرارات بمنع مطربين من الغناء في مصر، واستمرت الأزمة تتصاعد بالذات مع مطربين المهرجانات، اللي كانت الحرب بينهم وبين نقابة هاني شاكر طاحنة لوقت طويل.
شهدت سنة 2021 مجموعة من القرارات من نقابة المهن الموسيقية، واللي بدأت بمشكلة حسن شاكوش ورضا البحراوي، اللي فضلوا يتراشقوا الكلمات المهينة بينهم لوقت طويل بسبب خلاف مهني ما بينهم، وكان جزء من التراشق ده هو اتهام رضا البحراوي لشاكوش إنه مش بيغني لايف، وإنه دايمًا بيغني على المسرح بفلاشة.
انتهت الأزمة دي بوقف رضا البحراوي لمدة شهرين، وسحب ترخيص الغناء من حسن شاكوش نهائيًا من غير مدة محددة، وصدر بعدها قرار منع البلاي باك في الحفلات. بعد القرار ده صدر قرار من النقابة بتغريم أحمد سعد 20 ألف جنيه بسبب الغناء على الفلاشة.
بعدها بوقت قليل صدر قرار منع مروان موسى وعفروتو وغيرهم من مطربين المهرجانات من الغناء، حسب تصريح نقيب الموسيقيين وقتها، هاني شاكر، السبب كان الحفاظ على الذوق العام.
بعد القرارات دي بدأت فئة من الجمهور والفنانين ينتقدوا نقابة الموسيقيين، ويناقشوا مدى صلاحيتها في تنظيم العمل الموسيقي أو الحجر عليه، بالذات بعد ما طلع مجموعة من المطربيين اللي اتمنعوا في مداخلات تليفونية مع برامج تلفزيونية، وقالوا إن قرارات النقابة بتخسرهم أكل عيشهم.
في نوفمبر 2021، حصلت خناقة بين رجل الأعمال نجيب ساويرس وهاني شاكر، والنقاد الموسيقيين حلمي بكر وطارق الشناوي، بدأت المشكلة بتغريدة للمهندس نجيب ساويرس بتقول: “أول مرة أشوف نقيب للمغنيين فخور جدًا بمنع الغناء.. الجمهور اللي يقرر يسمع مين ومايسمعش مين.. مش النقيب!” وفي مداخلة مع عمرو أديب في برنامج “الحكاية” قال ساويرس إن النقيب هاني شاكر مش دوره يكون رقيب على أذواقنا.
علق الناقد الموسيقيي طارق الشناوي، وقال إن النقابة مشوشة ومش عارفة تاخد قرار، وإنها عمالة تاخد قرارات متناقضة وبتسمح لمطربيين شعبيين ورابرز معينين بالغناء، وبتمنع أخرين من غير أي أساس واضح.
في يوليو 2022، نشرت جريدة اليوم السابع صورة من استقالة النقيب هاني شاكر، واللي قال فيها إنه قرر الانسحاب من والعودة لصفوف الفنانين، وأضاف إنه مش هيخوض في تفاصيل كتير ومبررات ماتقبلش المناقشة، وقال كمان إنه لقى تعارض كبير بين مسؤولية المنصب وبين احتفاظه بحب الناس.
وبكده انتهت ولاية هاني شاكر، اللي كانت مليانة أزمات وتعقيدات، وبدأت بعدها بأربع شهور ولاية مصطفى كامل، اللي بيوضح آخر قراراته إنها هتكون فترة لا تقل في إثارتها للجدل عن ولاية سابقه.