اليأس شعور بيمر به الإنسان، مش مرتبط بسن معين، ومش بيفرق ما بين رجالة أو ستات، ممكن أي حد يتعرض له في أي فترة عمرية. والستات حياتهم بتبقى عبارة عن رحلة، وبيتفاجئوا بعد ما بيدخلوا في مرحلة عمرية جديدة بأعراض مش متوقعة، بتسبب لهم تغيرات على مستويات كتير، تحت مسمى “سن اليأس”.
مبدئيًا، في مصطلحات تانية بيستخدمها الأطباء بتوصف المرحلة العمرية الجديدة دي؛ زيّ مرحلة انقطاع الطمث أو مرحلة النضوج أو انقطاع الحيض، وحسب كلام دكتور “أيمن الوتري”: “المرحلة اللي بتمر بها الست مش معناها إنها “كبرت” لأ هي مجرد مرحلة لها ملامح وظروف مختلفة، مش بتبقى فاهماها ومحتاجة توضيح مش أكتر”.
وفي لقاء مع الأستاذ الدكتور “محمد يحيى” أستاذ النساء والتوليد والعقم في طب عين شمس، في برنامج “الحكيم في بيتك” قال: “مرحلة سن اليأس بيمر بها الرجالة كمان، والفرق بس إن الأعراض عند الستات بتبقى واضحة وظاهرية، بس الرجالة لأ”.
في ستات وبنات بتسمي الفترة دي بفترة الأمان، وبتعيشها بشكل ومختلف وبسلام نفسي. لكن للأسف الناس اللي حوالين السيدة اللي بتمر بالفترة دي كتير مش بيبقوا فاهمين إن دي أعراض طبيعية، فبيحصل توتر أكتر في علاقتها بيهم، وخصوصًا أولادها، لإن الست بتحس إنها مش متقدرة.
ازاي نقدم الدعم للستات والبنات في الفترة دي؟
لو في حياتك أم أو أخت أو صديقة أو زوجة بيمروا بفترة انقطاع الطمث، هنقولك تقدم لهم دعمك ازاي, وده لإن الدعم النفسي هيساهم في إنها تتقبل المرحلة ويخفف كمان من الأعراض.
- نسمعهم
نسألهم بكل وضوح هما حاسين بإيه ونسمع هيقولوا إيه، مش كل الناس بيمروا بنفس الأعراض وبيحسوا بنفس المشاعر، ومش كل الناس كمان بيحبوا يتكلموا عن مشاعرهم واللي حاسين بيه، بس نحسسهم إننا موجودين لو محتاجين يتكلموا.
- نشجعهم
في الوقت ده، ممكن مايتحمسوش يعملوا الحاجات اللي كانوا بيحبوا يعملوها قبل كده، وغالبًا ثقتهم في نفسهم ممكن تقل كتير، حاول تشجعهم وتديهم ثقة، ويُفضل كمان تخليهم يشاركوا في أنشطة فيها تواصل مع ناس، ده هيحسن نفسيتهم كتير.
- ساعدهم يخففوا من الأعراض
اعرف الأعراض وساعدهم يخففوها من غير ما تركز عليها وتتكلم عنها كتير، وده عن طريق العادات الصحية زيّ الأكل الصحي، ممكن كمان تطبخوا أكل مع بعض ده هيساعد في الحالة النفسية. الرياضة كمان مهمة، شجعهم يتمشوا أكتر أو يعوموا، وده بجانب الإقلاع عن العادات المضرة زيّ التدخين.
- الدعم في أماكن العمل
كتير من السيدات قالوا إن مواجهة المرحلة دي وأعراضها في أماكن العمل كانت صعبة جدًا.
لو أنت مدير أو مسؤول في مكان عمل، هيكون مفيد جدًا لو عملت بعض التغييرات في القوانين في المكان، علشان تساعد السيدات إنهم يعدوا من الفترة دي بسلام؛ زيّ إن أوقات العمل تبقى مرنة، ويبقى في أيام شغل من البيت، لو في لبس موحد ممكن يتغير علشان يناسبهم أكتر، المكان اللي هيشتغلوا فيه يبقى مريح وفيه تهوية كويسة، توفير إجازات أكتر وتسهيل إجرائاتها.
إيه هو سبب حدوث “ظاهرة انقطاع الطمث”؟
الدكتور محمد يحيى، بيفسر ظاهرة انقطاع الطمث أو الحيض فسيلوجيًا: “كل ست بتتولد بحساب في البنك، الحساب ده هو عدد البويضات اللي عندها في المبيض، تفضل تسحب منه لحد ما ييجي الوقت ويخلص. البنت من وهي في الشهر الخامس بيبقى عندها 2 مليون بويضة، لحد ما تتولد بيبقوا نص مليون، وبمرور الوقت عدد البويضات بيقل، ولو وصل لـ 10 آلاف الدورة بتنقطع، وده لإننا محتاجين في بداية كل دورة عدد كبير من البويضات بتكوّن الهرمونات، ولما بتتكون جدار الرحم بيبتدي يحصل له زيادة في السمك، وبالتالي البويضة مش بتتلقح وبينزل دم الدورة الشهرية”.
وكمل كلامه وقال: “علشان كده لما بتتحسب، بنقول إن المعدل الطبيعي لحدوث انقطاع الطمث بيبقى من أواخر الأربعينات للخمسينات”.
هل ممكن البنت أو السيدة تمر بالمرحلة دي قبل الخمسينات؟
قال الدكتور محمد إن البنات أو الستات ممكن يحصل عندهم انقطاع مبكر في الدورة قبل السن المعروف، ودي ظاهرة وصلت لـ 5% يعني ممكن تبقى عندها 25 سنة، وده بسبب ملوثات الجو اللي بتأثر على الأم، فالبنت بتتولد بعدد قليل أوي من البويضات ويخلص بسرعة. والدكتورة “علياء جاد” أضافت إن الأسباب كمان ممكن تكون وراثية أو مرضية، أو إنها اتعرضت لإشعاع علاجي أوقف وظيفة المبايض.
الأعراض المحتملة اللي هتمر بها “السيدات والبنات“
أول عرض هو إن وظيفة المبايض بتتوقف وبتبقى السيدة بعدها غير قادرة على الإنجاب، بجانب أعراض تانية بتحصل بسبب نقص هرمون الأستروجين (هرمون الأنوثة). ووضحت دكتورة علياء إن الأعراض بتبقى في تلات اتجاهات؛ مشاكل صحية، ومشاكل نفسية، ومضاعفات صحية محتملة. وأضاف عليهم الدكتور محمد يحيى:
- عدم انتظام في الدورة الشهرية، بمعنى إنها ماتجيش لمدة شهور متتالية، أو لما تيجي كميتها مش بتبقى بانتظام لحد ما يحصل انقطاع تام.
- بيبقى في هبات حرارية أو تعرق ليلي ممكن يقومها من النوم، ويسبب أرق، وده ممكن يحصل في عز ما الجو يبقى تلج.
- مشاكل في المهبل؛ جفاف أو حكة أو التهابات.
- سلس في البول من أقل ضغط، حتى لو بتكح أو بتعطس.
- بتلاقي نفسها بتزيد من مناطق مش متعودة تزيد فيها، زيّ الأكتاف، ودهون البطن بتتجمع جوا ومش بتتحل بشفط الدهون، وده لإن الجسم بيحاول يخزن هرمونات الأنوثة في منطقة ما، وبيعمل ده في الخلايا الدهنية.
- زيادة في الشعر في منطقة الدقن، بسبب إن الهرمونات الذكورية بتزيد.
- بتلاقي نفسها بتعيط بدون سبب، وأحيانًا ممكن تفقد الرغبة الجنسية.
- بتبقى معرضة لزيادة بالإصابة بأمراض القلب والأوعية الدموية، لإن الأستروجين بيحمي من ده.
- بتبقى معرضة أكتر لهشاشة العظام.
وأضافوا إن في أدوية ممكن تتاخد تأخر من الأعراض وتدي هرمونات تعويضية، بس مش كل الستات مسموح لهم ياخدوها بسبب تاريخهم المرضي.
ونصيحة قدمها الدكتور محمد للسيدات والبنات، إنهم يبدأوا ياخدوا بالهم من الأكل، ويلعبوا رياضة، وممكن يمشوا على الأقل ساعة في اليوم، علشان يستعدوا للفترة دي ويعدوها بسلام، لإن نسبة الوفيات من الوقع والكسر بسبب هشاشة العظام أعلى من الوفاة بالسرطان.