كتير مننا بيعانوا من صداع شديد في نهار رمضان وأوقات كمان بعد الفطار، وده بيأثر بشكل كبير على تركيزنا واستمتاعنا بالأجواء الرمضانية. والصداع ده بيتسبب فيه عوامل كتيرة، ومن أكتر الأسباب الشائعة ليه هي إن نسبة الجلوكوز في الدم والسوائل في الجسم بتقل وقت الصيام فبيزيد الصداع خصوصاً في الساعات الأخيرة قبل الفطار.
وكمان عدم انتظام مواعيد النوم وتغيير مواعيد الأكل بيلعبوا عامل كبير في الشعور بالإرهاق والصداع، وده بالإضافة لقلة الكفايين والنيكوتين بالنسبة للناس اللي متعودة على التدخين وشرب المنبهات بصفة مستمرة.
أما بالنسبة لألام الصداع بعد الفطار فدي في الغالب بنكون إحنا السبب فيها، وده لأننا لما بناكل كميات كبيرة من الأطعمة والمشروبات على الفطار، الدم بيتم ضخه بكميات كبيرة للجهاز الهضمي وبالتالي بتنقص كميات الدم اللي بيتم ضخها للمخ. والأكل الكتير بيؤدي كمان لزيادة نسبة الأنسولين وانخفاض مستوى السكر في الدم فبتكون النتيجة الطبيعية الشعور بالصداع.
في حاجات كتيرة بسيطة نقدر نعملها علشان نتجنب الاحساس بالصداع أو على الأقل نخفف من تأثيره علينا، وممكن نبدأ فيها في الأيام القليلة اللي قبل شهر رمضان.
مثلاً بالنسبة السجاير والمنبهات، ممكن تقللها بشكل تدريجي في الأيام القليلة اللي قبل رمضان علشان لما تستغنى عنها في فترة الصيام يكون الجسم اتعود على قلتها ويخف تأثير الصداع. ولو انت شخص بيعاني من مرض مزمن وبتاخدله أدوية خاصة بيه لازم ترجع للدكتور بتاعك وتغير مواعيد الدواء قبل رمضان علشان تناسب مواعيد الصيام. كمان لو في عندك مشكلة في الأسنان أو الأنف أو العيون لازم تحلها مع طبيب مختص قبل رمضان لأنها في العادي بتسبب صداع ومع الصيام الألم هيكون أصعب كتير.
ولو الشهر بدأ وانت لسة ماشي على نظام حياتك المعتاد، مش مشكلة في عادات صحية كتيرة تقدر تمشي عليها علشان تتخلص من الألم المزعج ده خلال شهر رمضان. زي إنك تتجنب بشكل تام تناول أي نوع من الحلويات على السحور، وتتسحر متأخر على قد ما تقدر علشان تحس بالشبع لأطول فترة ممكنة. وإذا كنت من اللي بيعانوا من نقص الكفايين في الجسم وقت الصيام، ممكن تشرب كوباية قهوة مع السحور وهتساعدك تبقى مركز في صيامك ومتحسش بالصداع.
وبالنسبة لوجبة الفطار فلازم كمية الأكل فيها تقل، ويتم تقسيمه لوجبات صغيرة على فترات بين الفطار والسحور، ولازم متنساش تشرب مياه بكميات كافية وتاكل فواكه وخضروات كتيرة علشان تقلل نقص السوائل في الجسم في الصيام.
ومن الحاجات بردو اللي ممكن تعملها هي إنك تحاول تنام كويس وتتجنب التعرض المباشر لأشعة الشمس علشان متفقدش السوائل اللي في جسمك عن طريق التعرق، وتحاول تبعد بقدر الإمكان عن أي توتر وضغط عصبي علشان تقدر تصفي ذهنكونتجنب أي مُسبب للصداع.