رمضان السنة دي هيكون مختلف عن أي سنة فاتت علينا كلنا بسبب فيروس الكورونا والإجراءات الإحترازية ضده. غياب اللمة والخروجات هيأثر بشكل سلبي على ناس كتيرة كانت بتتجمع مع حبايبها بس في الشهر الكريم، وكمان غياب الصلوات الجماعية والتراويح هياخد من فرحة الشهر وأجواءه بس إحنا لازم نفضل متفائلين ونبص بس لنص الكوباية المليان.
فعندك مثلاً الأكل والدايت دايماً كانوا بيبوظوا في رمضان، ومع أجواء الاحتفالات والتجمعات كان بيبقى صعب على ناس كتيرة إنها تمشي على نظام غذائي سليم، وفي كتير بيخرجوا من الشهر وزنهم زايد. ومع اختفاء كل الأجواء دي بقى في فرصة كويسة جداً إننا نقدر نحافظ على صحتنا وكمان نخس لو قدرنا نظبط أكلنا. وبردو مع القعدة في البيت، التعب والمجهود المبذول في نهار رمضان هيقل وبالتالي تعب فترة الصيام هيقل وهيكون عندنا وقت أكتر نتعبد ونمارس أنشطة مكناش بنلاقيلها وقت في الظروف العادية.
احنا اتكلمنا مع روانا بدري خبيرة التغذية ومدربة اللياقة البدنية علشان تدينا شوية نصايح نمشي عليها طول رمضان ونتجنب الأكل الزيادة بين فترة الفطار والسحور.
روانا قالتلنا إن أول حاجة لازم نعملها على الفطار هي إننا نستنى حوالي 20 دقيقة بعد ما نكسر صيامنا ببلح ومياه علشان يقدر جسمنا يجدد الطاقة فيه وترجع نسبة السكر في الدم لمستواها الطبيعي، وبعدها نقدر نبتدي وجبة الفطار. الأكل براحة بيخلينا نحس بالشبع أسرع وكمان بيدي لمعدتنا الفرصة إنها تهضم الأكل كويس وتشتغل بطريقة طبيعية. والخضار على اختلاف أنواعه هو المكون الأساسي اللي لازم يكون موجود في كل وجباتنا لأنه ببساطة ببساعد في الشعور بالشبع بسرعة، وبيقلل من نسبة الكربوهيدرات اللي بناكلها وكمان ومصدر غني بالبروتين.
وبالنسبة لأكل الحلويات، فإحنا دايماً بنحس إننا عاوزينها علشان جسمنا بيكون محتاج للسكريات بعد فترة الصيام، ونقدر نقلل احتياجنا ليها بإننا نستبدلها بالفواكه، وممكن كمان نضيف نكهة على المية اللي بنشربها وقت الفطار زي العسل والنعناع والليمون والجنزبيل. والفواكه زي البطيخ مثلاً بتكون غنية بالفيتامينات ومليانة مياه بتساعدنا على صيام تاني يوم وبتساهم في تقوية جهاز المناعة بتاعنا.
أما بقى السحور فإحنا لازم يكون أكلنا خفيف فيه ومنكلش حاجات دسمة ومليانة زيوت علشان بتزود من إحساسنا بالعطش وبتضر جسمنا، فممكن مثلاً سحورنا يكون موزة مع الزبادي لأن الموز مليان بوتاسيوم وهيساعد على تقليل الاحساس بالعطش تاني يوم.