بتعانوا من مشاكل النوم؟ جبنالكم أسباب النوم المتقطع وإزاي نواجهه..

بواسطة محمد طارق.

كام مرة كان عندك شغل تاني يوم الصبح بدري ونمت وصحيت لوحدك بليل أكتر من مرة؟ كام مرة قسمت نومك على ساعات متباعدة؟ أمتى آخر مرة نمت ساعات نوم متواصلة  بمعدل كويس؟ وسؤال كمان هل نومك خفيف أو ثقيل؟

دول مش بس أسئلة عن مشاكل النوم اللي ممكن تكونوا بتواجهوها في حياتكم اليومية، دول كانوا أسئلة متداولة في واحد من أكتر الهاشتاجز التريندنج على تويتر الأسبوع اللي فات، وموضوع النوم المتقطع ده ناس كتير اتكلموا عنه، واتضح إن كتير مننا بيعانوا منه. فيا ترى إيه الأسباب وإيه الحل ؟

الأسباب

  • إنت كبرت يا معلم: جامعة هارفارد عملت تقرير على موقعها في ٢٠١٩ عن اسباب النوم المتقطع، وأكدت إن أول سبب ممكن يكون السن، فالبالغين الكبار أكتر ناس بيكون عندها نوم متقطع. وده بسبب إن دورة النوم والصحيان بتتغير عند البالغين.
  • لازم تغير اللايف ستايل بتاعك: من أكثر أسباب النوم المتقطع هي العادات السيئة للنوم، زي مثلا إنك تكون بتشرب مشروبات فيها كافيين كتير زي القهوة، والشاي، والصودا. أو إنك بتاكل قبل مدة صغيرة من النوم، والأكل المفروض يكون قبلها بـ 4 ساعات على الأقل، وده هيتسبب لك في نوم متقطع وغير متواصل. وممكن برضه تكون بتنام كتير خلال اليوم، وده بيخليك متستمتعش بساعات نوم متواصلة بعد كده.
  • أسباب أخرى: وجود أي مشكلة نفسية أو اكتئاب بيتسبب في النوم المتقطع، وفي بعض الأدوية بتسبب في النوم المتقطع، وده وفقاً لتقرير جامعة هارفارد. وبرضو وجود ألم معين في الجسم ممكن يتسبب في النوم المتقطع.

مقترحات لحل مشاكل النوم

  • ظبطوا نومكم وحاولوا تصحوا كل يوم في نفس الوقت.
  • حاولوا تبعدوا عن أي أجهزة الكترونية زي الموبايل، و اللاب توب قبل ساعتين على الأقل من النوم.
  • حاولوا تناموا في مكان هادي، ضلمة، ودرجة حرارته كويسة.
  • العبوا رياضة بس مش قبل ساعة من النوم.

تظبيط ساعات النوم، والنوم المنتظم هيساعد بشكل كبير في تطوير في وظائف الحياة اليومية، والتركيز، والطاقة، ووجودة الحياة. ولو حاولتوا تطبقوا النصائح دي، ومفيش نتيجة فلازم تستعينوا بطبيب مختص.

آخر كلمة: احكولنا تجربتكم مع النوم المتقطع وهل وصلتوا لحل ولا لأ؟

تعليقات
Loading...
Tweet
Share
Share
Pin