الصاحب التوكسيك: 7 أمثلة شوفناها في مسلسلات وأفلام

مش بس في العلاقات، الصداقات كمان للأسف بنشوف فيها نماذج كتير سامة أو “توكسيك” زي ما الناس دلوقتي بتقول، والأصعب إنك بتبقى للأسف مش مدي خوانة خالص، ومآمن لصاحبك، أصل لو مش مآمن لصاحبي هآمن لمين؟ بس في ناس كتير بتخون الأمانة دي، وعلشان كده المفاجأة بتكون أوحش لإنك مش متوقع ده من حد معتبره صاحبك.. وشوفنا أمثلة ونماذج كتير للأصحاب السيئين في الدراما والسينما المصرية، في منهم اللي اتناقشوا بسخرية، وفي اللي أذيتهم كانت مالهاش كلمات توصفها.

ليلى – لأعلى سعر

“أنت ماتعرفيش إنك أغلى حاجة في حياتي ولا إيه؟” جملتها المشهورة اللي كانت لا تمت بأي صلة للي جواها، نقدملكم أوحش نموذج شوفناه السنين اللي فاتت في الدراما المصرية للصاحبة التوكسيك، اللي كانت “جميلة” البطلة فاكراها صاحبة عمرها، لكن هي راحت اتجوزت جوزها، وأخدت منها المستشفى وبقت هي المديرة، وكمان كانت بتقلب أهل جميلة عليها! وحاجة في منتهى الـ “ملعون أبو الناس العزاز” فعلًا زي ما اتقال في التتر.

شفيق – سيدة القصر

صاحب البطل وأنتيمه اللي كل جملة يقول إنه خايف على مصلحته، لكن بيعرفه على شلة علشان يلاعبوه قمار ويخسروه ثروته كلها، وزعيم العصابة دي هو شفيق صاحبه، حتى لما “عادل” البطل حب “سوسن” اللي كانت بتقوم بدورها فاتن حمامة، واتجوزها وكانت بتحبه فعلًا وخايفة عليه وبتنصحه يبعد عن الشلة دي، اتهموها إنها بتخونه مع صديق له واقنعوه بالتمثيلية دي وكان هيخسرها. لكن في النهاية بيكتشف حقيقتهم.

نهى الصفرا – عايزة اتجوز

ماحدش فينا حتى اللي ماشافش المسلسل مايعرفش مين هي نهى، اللي ماينفعش اسمها يتقال لحد كده من غير لقب “الصفرا” زي ما كانت علا بتقول، عاملة نفسها صاحبتها وبتحبها لكن كانت بتخطف منها كل المحاولات للتعرف على العرسان في رحلتهم طول المسلسل في إنهم “يصطادوا عريس”. لإن في وجهة نظر نهى، صاحبتي وحبيبتي طالما مابتجيش على مصلحتي.

ويجا

ده ماكانش فيلم ده كان مركز سموم، الحقيقة مش عارفين نختار شخصية واحدة توكسيك، كلهم كانوا شلة صحاب توكسيك في بعض، وصلت بيهم للخيانة والقتل.. علاقتهم ببعض بتدهور من شلة صحاب كويسين، لإن كل واحد بيشك في التاني، واللي بيخون صاحبه مع مراته، لحد ما في مشهد النهاية بيتجمعوا ويقتلوا بعض، بس مش عارفين مين اللي قتل مين.

رحمة – فوق مستوى الشبهات

دي مش بس صديقة توكسيك، دي مريضة نفسيًا على مستوى عالي.. البطلة نفسها في المسلسل كانت هي اللي توكسيك، اتصاحبت على الكومباوند كله تقريبًا، وكانت بتستغل كل اللي تعرفه عن حياتهم علشان تخربها بكل الطرق، لدرجة إنها كانت هتقتل صاحبتها اللي كانت بتقوم بدورها شيرين رضا. ولبست نص المسلسل قضايا.

عنايات – أولاد الأكابر

من تخطيطها لصاحبتها “حُسنة” إنها تخطف أي راجل من عيلة الحاج زكريا، لحد ما خطتها نجحت وحُسنة اتجوزت الحاج زكريا نفسه، لحد الفلوس اللي كانوا بيسرقوها منه – بتحريض من عنايات نفسها طبعًا- لحد ما اتقلب السحر على الساحر، وغدرت عنايات بصاحبتها وقتلتها.

ألفت – عائلة الحاج متولي

النموذج الأقدم من نهى الصفرا، ألفت شافت الحاج متولي بيحب صاحبتها سميرة، طمعت فيه وفي فلوسه واتجوزته هي، بس عادي كده كده سميرة كانت شايفة إن الحاج متولي قد أبوها ومش هتتجوزه، وكانت فعلًا بتحب سعيد إبنه أصلًا.

آخر كلمة: ماتفوتوش قراءة: رحلة نيللي كريم مع الرجالة التوكسيك في مسلسلاتها

تعليقات
Loading...
Tweet
Share
Share
Pin