موضوع التبرع بالأعضاء سواء في الحياة أو حتى بعد الموت، دايمًا عليه نوع من الجدل واختلاف في الآراء. فبرغم إن مفيش قانون بيجرم التبرع بالأعضاء، وإن دار الإفتاء صرحت بجواز التبرع وزرع الأعضاء، لإنه من الوسائل الطبية المهمة في العلاج والشفاء.. ولكن برضه دايمًا بنلاقي بعض الأشخاص اللي مش بيتفقوا على النوع ده من التبرع خصوصًا التبرع بالأعضاء بعد الوفاة. ولكن بدأنا نشوف تطور كبير في الملف ده، وآخرهم لما طلعت الفنانة إلهام شاهين على الملأ واتكلمت في الموضوع.
خلال حفل توقيع كتاب أعداء مصر الخمسة للمستشار أمير رمزي، أعلنت إلهام شاهين إنها هتتبرع بأي عضو من أعضائها يصلح للتبرع بيه بعد وفاتها، فقالت “أنا بعلن إنه إذا كان مني أي حاجة تصلح للتبرع، لإنه طبعًا التبرع له سن معين، فأي جزء يصلح مني فأنا بتبرع به، وأنا بعلن ده على الملأ كله”. وأعلنت ده كمان في فيديو انتشر على السوشيال ميديا. وصرحت بده كمان خلال برنامج عمرو أديب “الحكاية”.
الدكتور خالد منتصر هو اللي بدأ مبادرة التبرع بالأعضاء، وقالت إلهام شاهين إنها لما قرأت عن الموضوع حسِت بأهميته وإنه عمل إنساني ممكن ينقذ أرواح كتير، وده اللي خلاها تعلن عن القرار ده وكمان تشجع الناس إنهم ياخدوا نفس القرار، لإنه هيكون صدقة جارية وعمل إنساني. “يا ريت كلنا نفعل هذا المشروع، ويكون لدينا بنك من الأعضاء البشرية، بدل ما يأخذوا جزء من إنسان حي. ربنا يجازي الجميع خير فهناك من يغسل كلى يوم بعد يوم، وهناك من يحتاج كبد، وهناك من يحتاج رئة، وقرنية، في ناس هتترحم من الأدوية”.
وردًا على كتير من الناس اللي هاجموها بسبب اللي قالته عن التبرع بالأعضاء، قالت إلهام شاهين إنها سألت كتير من رجال الدين اللي أكدوا إن التبرع بالأعضاء حلال وإن كتير من المشايخ نفسهم مستعدين بالقيام بده، لإنه بيساعد ناس تانية على الحياة. علشان كده شافت إلهام إن التبرع بأعضاء الجسد بعد الوفاة أكتر نفع للآخرين، لإن كده كده الجسد هيفنى، ولكن اللي هيتبقى هو المساهمة اللي هتساعد شخص تاني إنه يعيش حياة أفضل وأكتر صحة.
أيام السادات كان في بنك للقرنية في مصر، وبسبب كتير من الناس اللي حاربوا الموضوع، البنك ده اتقفل، زيّ ما قالت إلهام خلال مناقشتها للموضوع، مطالبة إن البنك ده يتفتح مرة تانية لمساعدة المرضى المحتاجة. وعلق الدكتور خالد منتصر على موقف إلهام شاهين إنه فخور بموقفها وصمودها أمام هجوم المجذوبين والمكبوتين، زيّ ما هو وصفهم بالتعبير أثناء كتابة البوست.