شوفنا أخبار إعصار “شاهين” اللي بيهدد سلطنة عمان وأجزاء من الإمارات والسعودية، وبيؤثر على المناخ في المنطقة بأشكال كتير، وتابعنا تطوراته وتأثيراته في اليومين اللي فاتوا، لكن أكيد لما سمعنا الأخبار اللي كلها بيُطلق عليه فيها اسم “شاهين” استغربنا، ليه اتسمى كده؟ وافتكرنا كمان أعاصير تانية قبل كده في أماكن مختلفة في العالم كان برضه أسمائها غريبة وعلى أسماء بشرية، لكن ازاي الحكاية دي بدأت؟ وليه بيسموها على أسامي بني أدمين؟ ومين اللي بيسموها دول أصلًا؟ فحاولنا ندوّر على إجابة للتساؤلات اللي بتدور في بالنا دي، وده اللي وصلنا له.
مبدئيًا، إيه السبب ورا إطلاق أسماء على الأعاصير؟ علشان نتفادى الخلط والالتباس اللي ممكن الناس تقع فيه، خصوصًا في الأماكن اللي بيكثر فيها الأعاصير المدارية، فعلشان نتجنب سوء الفهم أو الخلط، تم إطلاق أسماء على الأعاصير، كمان استخدام أسماء قصيرة ومميزة في الرسائل الإعلامية المكتوبة أو الشفهية بيكون أسرع وبيقلل من احتمالات الخطأ، وجه بالمقارنة بأساليب التعريف المعقدة اللي بتقوم على أساس خطوط الطول ودوائر العرض.
إيه كانت بداية تسمية الأعاصير؟ ومين بيسميها؟ المعلومات اللي لقيناها بتقول إن التسمية النظامية بترجع لعالم الأرصاد الجوية الاسترالي كليمنت راج، اللي أطلق على الأعاصير أسماء البرلمانيين اللي كانوا بيرفضوا التصويت على منح قروض لتمويل أبحاث الأرصاد الجوية. وتطور الموضوع وبقى في أراء بتقول إن الأعاصير الشديدة بيتم تسميتها بأسماء أنثوية، والأعاصير الخفيفة بيتم تسميتها بأسماء ذكور.
وفي بداية الخمسينات، ظهر أول نظام لتسمية الأعاصير، وبدأت باختيار الأسماء حسب الأبجدية الصوتية العسكرية، قبل ما يقرروا في سنة 1953 العودة إلى الأسماء النسائية، اللي كانت في فترة هي اللي بتسود وده نسبة لإن كلمة إعصار “Hurricane” كلمة مؤنثة، وتم تعميم الأسماء النسائية على مناطق كتير، مع مراعاة إن تكون الأسماء قصيرة، وسهل نطقها وتذكرها.
نرجع لإعصار “شاهين”، ليه تم اختيار الاسم ده بالذات؟ حسب موقع جريدة “فري برس جورنال” إن دولة قطر افترحت إطلاق اسم “شاهين” على الإعصار، وحسب المعاجم العربي، “الشاهين” هو طائر من الجوارح، من جنس الصقر رمادي اللون، بيتميز بطول جناحيه وحدة مزاجه، وقوة البنيان.