إزاي تقدوا العيد بشكل صحي؟ جمعنالكم نصايح لعيد مليان بالصحة والنشاط

العيد هو الوقت اللي بنحتفل فيه بنهاية شهر رمضان، وبنتجمع مع حبايبنا علشان ناخد العيدية وناكل الأطباق الشهية من الكحك والبسكوت والبتيفور وغيرها من الحلويات والمُشهيات. رجوعنا لروتين حياتنا الطبيعي وعادات أكلنا القديمة بشكل مفاجئ ممكن يؤدي لمشاكل واضطرابات كبيرة في الجهاز الهضمي، وده لأن الجسم بقى متعود على نظام الصيام ومواعيد الأكل فيه ومحتاج لشوية وقت علشان يقدر يرجع للنظام القديم.

خبراء التغذية بينصحونا في الحالة دي إننا نبتدي بجرعات أكل صغيرة خلال ايام العيد، ونحاول على قد ما نقدر ناكل وجبات صحية علشان نتجنب الإصابة بالخمول ومشاكل الهضم في أجازة العيد. واحنا جبنالكم مجموعة من النصايح هتساهم في قضاء أجازة العيد بشكل صحي وسليم.

أرجع لروتين أكلك بالتدريج

بواسطة: unsplash.com

أحسن طريقة تقدر تعود بيها جسمك على نظام الأكل المعتاد وتتخلص من روتين الصيام هي إنك تفطر بحاجة خفيفة في أول أيام العيد. إنت ممكن مثلاً تاكل فاكهة على الفطار أو تبدأ يومك بأكل البلح علشان توازن مستويات السكر في جسمك.

وأهم حاجة هي إنك تبدأ بكميات أكل قليلة، علشان تحمي جسمك من تبعات أكل كميات كبيرة بعد شهر من الصيام. والخضراوات والفواكه هي من أهم العناصر الغذائية اللي لازم تعتمد عليها في الفترة دي، وده لأنها هتساهم بشكل كبير عملية هضم صحية أول أيام العيد.

كُل بذكاء

بواسطة: vanillapapers.net

أكيد طبعاً كلنا بنبقى عاوزين ناكل حلويات زي الكحك والبسكوت أول يوم العيد، خصوصاً مع الشاي أو القهوة بعد الفطار. احنا ممكن ناكل اللي نفسنا فيه فعلاً، بس لازم ناخد بالنا كويس أوي من الكميات اللي بناكلها لأن جسمنا مش هيقدر يستحمل يدخله كميات كبيرة من الحلويات والأكل الدسم مرة واحدة بشكل مفاجئ.

وبالإضافة لكده، لو أكلنا بكميات أكبر من اللي بيحتاجها جسمنا علشان يولد طاقة، وزننا أكيد هيزيد وده لأن الطاقة اللي مش بتستخدمها بتتخزن في الجسم بشكل دهون. وعلشان كده لازم نكون حريصين على وجود نظام غذائي صحي مليان بالخضروات والفواكه والألياف.

إهزم رغبتك في أكل الحلويات

بواسطة: vanillapapers.net

كتير مننا بيعد ياكل في حلويات العيد من غير ما ياخد باله لحد ما بيلاقي نفسه في النهاية مخلص كل طبق الحلويات لوحده، ده ليه ضرر كبير جداً على الجسم خصوصاً إن أكل حلويات كتيرة بعد 30 يوم من الصيام هيرفع معدلات السكر في الدم بشكل كبير وهيخليك تحس بالإعياء أو الغثيان.

لازم نكون حريصين على أكل أقل كميات ممكنة من الحلويات في اليوم، وممكن نستبدلها بالفواكه والبلح علشان نرضي احتياج الجسم للحلويات ونحميه من الدهون الزايدة والأمراض.

متنساش تشرب مياه

بواسطة: unsplash.com

للأسف كتير مننا مكنوش بيشربوا مياه كفاية طول شهر رمضان، ومعدلات الترطيب في الجسم مكنتش بشكلها الطبيعي طول الشهر الكريم، وعلشان كده لازم نعوض ده بشرب المياه والسوائل بشكل كبير في فترة العيد علشان نقدر نعوض النقص في أجسامنا. وكمان المياه بتلعب دور كبير في المساعدة على خسارة الوزن والأحساس بالشبع.

آخر كلمة: الرياضة كمان ليها عامل كبير جداً في تحسين عملية الهضم، متنساش تاكل كويس، وتشرب مياه، وتلعب رياضة، وأكيد هتستمتع بكل لحظة من العيد.

تعليقات
Loading...
Tweet
Share
Share
Pin