أهم أفلام محمد حفظي اللي أثارت موجات من الجدل في الوطن العربي

المنتج والسيناريست المصري، محمد حفظي، هو واحد من أهم المُشتغلين في صناعة السينما في الوطن العربي حاليًا، وجزء مهم جدًا من شهرة حفظي النهارده هو تقديمه لأعمال مثيرة للجدل، وأفلامه بتتعرض دايمًا للهجوم من فئة مش قليلة من المشاهدين، وصل الجدل اللي بيُثار حوالين أفلامه لدرجة استدعائه للتحقيق معه في النيابة العامة، بتهمة ازدراء الدين الإسلامي عن فيلم الشيخ جاكسون. ولكن رغم ده، أعمال حفظي هتفضل من أهم الأعمال الفنية على الساحة الفنية العربية لإنها قادرة دايمًا على استفزاز المشاهد وفتح نقاش في المواضيع اللي بيتطرق لها، ولإن الجدل والنقاش حوالين المواضيع دي مهم جدًا، بالتالي أعمال حفظي بقيت مهمة جدًا برضه.

واتعرضت أعمال محمد حفظي للهجوم كتير بسبب تطرقها لقضايا حساسة جدًا، بالذات في المنطقة العربية، زيّ قضية الأسرى الفلسطينيين في السجون الإسرائيلية، وقضية المثلية الجنسية، وقضايا زيّ النسوية والفقر والتدين والجنسانية والعلاقات الزوجية والخيانة.

ومن أهم الأفلام اللي أنتجها محمد حفظي وقدرت تجبر المشاهدين على فتح نقاشات جادة بخصوص القضايا اللي تناولتها:

الشيخ جاكسون

أحداث الفيلم بتبدأ يوم الخميس 25 يونيو 2009 بخبر وفاة مايكل جاكسون، وازاي الخبر ده بيأثر على شيخ كان اسمه جاكسون أيام الدراسة، وتستمر أحداث الفيلم بسؤال إيه اللي يربط شيخ وإمام مسجد بمايكل جاكسون؟ والسؤال الأهم، هل هيقدر يمارس حياته بشكل طبيعي بعد كده، ولا ذكرياته وعلاقاته بالناس اللي بيحبهم هتغير حياته؟.

الفيلم من إنتاج محمد حفظي، وبطولة أحمد الفيشاوي، نزل في السينمات سنة 2017، وسبب جدل كبير جدًا، لدرجة إن في محامي اتقدم ببلاغ للنائب العام ضد حفظي لإنه منتج الفيلم، واتهمه فيه بازدراء الدين الإسلامي، وده بسبب المشهد اللي المصليين بيرقصوا فيه. وبالفعل تم استدعاء محمد حفظي، والمخرج عمرو سلامة، وتم التحقيق معاهم في النيابة العامة، بس في النهاية تم حفظ البلاغ.

ورغم الجدل الكبير اللي أثاره الفيلم إلا إنه نجح جدًا، وفتح نقاش مهم جدًا ما بين المشاهدين عن معنى التدين وقيمة الفن، والفصل ما بين العلاقة الشخصية للإنسان بربه وما بين الصورة الاجتماعية اللي الإنسان بيصدرها للآخرين.

أميرة

عن: bbci

أحداث الفيلم بيحكي عن أميرة، المراهقة الفلسطينية اللي اتولدت من عملية تلقيح مجهري بعد تهريب نطفة sperm والدها نوار اللي هو سجين في المعتقلات الإسرائيلية، لكن لما تفشل محاولات إنجاب طفل تاني وتكتشف إن والدها نوار عقيم، تتقلب حياة أميرة لما تعرف إن والدها البيولوجي هو جندي إسرائيلي في نفس السجن اللي نوار فيه.

أميرة هو فيلم أردني من إنتاج محمد حفظي، وسبب موجة جدل كبيرة جدًا على السوشيال ميديا، وكان أكبر عنصر في عناصر الجدل ده هو غضب الفلسطينيين اللي اتهموا الفيلم بإنه إساءة لقضية الأسرى الفلسطينيين في السجون الإسرائيلية.

بدأ الجدل ينتشر أكتر على السوشيال ميديا بعد عرض الفيلم في مهرجان كرامة لأفلام حقوق الإنسان في عمان، واتصدر تريند الأردن على تويتر هاشتاج اسحبوا فيلم أميرة، وطالب الناس بسحب الأردن الفيلم من ترشيحاتها لجايزة الأوسكار.

الفيلم فتح الباب للنقاش عن القضية الفلسطينية بواقعها الحي النهارده، وتعقيدات القضية السياسية على الإنسان وهويته وتكوينه وانتمائاته السياسية والوطنية والبيولوجية.

ريش

عن: bbci

بتدور أحداث الفيلم في إطار من الدراما والخيال، وبيحكي قصة عيلة تضطر تعيش فترة من الاكتشاف الذاتي بعد ما يحول ساحر رب الأسرة المُستبد، الأب، بالغلط لفرخة في عيد ميلاد واحد من الأولاد، وتبدأ أحداث الفيلم تكشف عن واقع مزري من الفقر والضعف والخضوع.

سبب الفيلم، اللي اتعرض لأول مرة في الدورة الأخيرة لمهرجان الجونة السينمائي وأخد في الختام جايزة أفضل فيلم عربي، موجة شديدة التناقض من المواقف وردود الأفعال من نقاد وفنانين ومستخدمي السوشيال ميديا؛ في ناس كانت شايفة إن الفيلم الروائي الأول للمخرج الشاب عمر الزهيري فيه إساءة لسمعة مصر، وفي ناس تانية كانت شايفة إنه فيلم واقعي بيدور في إطار من الخيال.

لكن للأسف الجدل ما وقفش هنا، اتقدمت بلاغات كتير ضد منتج الفيلم محمد حفظي والمخرج عمر الزهيري، لدرجة إن في ناس طالبت بسحب الجنسية عن المخرج.

ولكن وسط البلاغات والتناقض ده في الأراء، قدر الفيلم يفتح نقاش عن معنى الفن وقيمته للشعب، وعن انعكاسات الفن ما بين الخيال والواقع، وده كان نقاش مهم جدًا وأثرى الثقافة الفنية كتير.

أصحاب ولا أعز

عن: cnn

اتعرض الفيلم، اللي أبطاله نجوم كُبار من فنانين الوطن العربي لانتقادات قاسية جدًا بعد ما نزل على نتفليكس، وده بسبب وجود شخص مثلي بين مجموعة الصحاب، وبسبب وجود ألفاظ اعتبرها الجمهور خارجة، ومش مناسبة مع عاداتنا وتقاليدنا الشرقية، وفي مصر طالب عدد من نواب البرلمان بالتحقيق مع المنتج محمد حفظي لخدش حياء المجتمع وطرح قضايا الهدف منها هدم القيم.

ورغم الجدل ده، الفيلم نجح جدًا وحقق أعلى المشاهدات على نتفليكس في الوطن العربي كله وفي دول كتير في أوروبا، وفتح باب للنقاش على السوشيال ميديا عن الحريات الجنسية، والخيانات الزوجية، وتربية الأولاد.

صالون هدى

عن: elboox

بتدور أحداثه عن قصة حقيقية عن ست اسمها هدى عندها محل كوافير في مدينة بيت لحم، بتروح عندها أم شابة اسمها ريم على طول علشان تعمل شعرها، فتحاول هدى ابتزازها بعد تصويرها في مواضع مخلة مع جندي من المخابرات الإسرائيلية، علشان تشتغل معاهم وتخون بلدها، وتتقلب حياة ريم.

اتعرض الفيلم لهجوم قاسي خلال الأيام اللي فاتت، ووصفه الجمهور بإنه مسئ للمرأة الفلسطينية، وكان في غضب من وجود مشاهد عري.

ورغم النقد اللي اتعرض له الفيلم، إلا إنه فتح نقاش عن قيمة المقاومة الفلسطينية، وحرية التعبير الفني، وقسوة الاحتلال وفساد سلطاته وأجهزته التنفيذية، وكمان عن الفكر الذكوري داخل الشعب الفلسطيني اللي ممكن يكون داعم غير مباشر لأساليب الاحتلال الفاسدة في تجنيد الفلسطينات من خلال ابتزازهم.

آخر كلمة: ماتفوتوش قراءة: صالون هدى: فيلم فلسطيني متهم بالإساءة للشعب والمقاومة، ليه؟

تعليقات
Loading...
Tweet
Share
Share
Pin