فيلم “ريش” للمخرج عمر الزهيري كان سبب في جدل كبير على الساحة الفنية والاجتماعية والسوشيال ميديا في مصر، بعد مُشاركته في مهرجان الجونة السينمائي في دورته الخامسة 2021. الإثارة واللخبطة اللي حصلت على خلفية عرض الفيلم في المهرجان بدأت لما مجموعة من النجوم المصريين خرجوا من قاعة العرض في نص الفيلم تعبيرًا عن استيائهم من محتوى الفيلم. الفنانين دول هما أشرف عبد الباقي وأحمد رزق وهالة صدقي وشريف منير.
الجدير بالذكر إن فيلم ريش فاز بالجايزة الكبرى للنقاد في مهرجان كان السينمائي الدولي، وفي وقتها احتفل به المصريين كلهم من حكومة وشعب.
شريف منير وهجومه على فيلم ريش
طلع شريف منير مع الإعلامي عمرو أديب في برنامج الحكاية وقال إن الفيلم أثار استيائه لإنه بيسيء لسمعة مصر من خلال واقع ديستيوبي مظلم وشديد القبح عن مجتمع فقير ومهمش، وقال إن الواقع ده أقبح من أي صورة حقيقية في مصر وبيقلل من مجهودات الرئيس في محاربة الفقر والعشوائيات من خلال حملات كبيرة زيّ “حياة كريمة”.
الجدير بالذكر إن شريف منير عمل بطولة فيلم “الكيت كات“. واحد من أعظم أعمال السينما المصرية وبيتكلم عن عالم ديستوبي أحداثه بتدور في حي عشوائي وشخصياته عايشة واقع مظلم جدًا عن المجتمع المصري في الوقت ده.
تعليق هالة صدقي على انسحابها من الفيلم وأسباب غضبها
علقت الفنانة هالة صدقي، من خلال مكالمة هاتفية مع برنامج “على مسئوليتي” للإعلامي أحمد موسي، على انسحابها من فيلم ريش، وكانت أهم الحاجات اللي قالتها: “الفيلم كان المفروض يطلع مصر بصورة إيجابية.. في حالة غضب شديدة من كل الزملا وكل اللي كانوا حاضرين.. أماكن التصوير مش في القاهرة فلما تشوفه تحس بغربة كده.. مش دي مصر أبدًا.. الفلوس قديمة ودايمًا في سجاير في كل مشاهد الفيلم.. الفيلم من النوع التجريدي.. مصر عايشة عصر جديد في عهد السيسي وحصل لمصر طفرة كبيرة من حيث التقدم والفيلم سبب غضب للجمهور بسبب المشاهد القبيحة والقذارة اللي فيها.. مش لازم الفقرا يبقوا قذرين، المصريين فقرا فعلًا بس زيّ الفل.. الفيلم اتصور من 4 سنين أيام ما مصر كان فيها مشاكل فبقى ديمودية.. ده حتى مش جايب نجوم في الفيلم وجايب ناس من الشارع.. ده فيلم تجريدي زيّ لوحة تجريدية يعني.. كون إنه كسب في مهرجات “كان” ده مش معيار مطلق للجودة.. لجان التحكيم دي أذواق شخصية”.
في فيديو لايف على انستجرام: أشرف عبد الباقي بيتراجع عن غيرته الوطنية على مصر اللي كانت سبب في انسحابه من الفيلم
أشرف عبدالباقي يوضح سبب انسحابه من عرض فيلم “ريش”
“الفقر مش مرتبط بإن ميبقاش الواحد نظيف”.. الفنان أشرف عبدالباقي يوضح سبب انسحابه من عرض فيلم “ريش” بمهرجان الجونة
Posted by الجزيرة – مصر on Tuesday, October 19, 2021
بعد ما سبب انسحاب أشرف عبد الباقي من عرض فيلم ريش، ضجة إعلامية كبيرة بسبب غيرته الوطنية على مصر اللي كان شايف إنها بتظهر بشكل قبيح ومخزي في الفيلم، طلع في فيديو لايف على إنستجرام ووضح رأيه في الفيلم وأسباب انسحابه: “صورة الفقر اللي بيتكلم عنها الفيلم موجودة في مصر.. الصورة دي موجودة لكن نضيفة، مش بالقذارة دي… في ناس فقرا كتير وفي ناس بتلاقي اللقمة بالعافية.. احنا قابلنا ناس كتير فقرا جدًا وكانت بيوتهم تحس فيها ريحة نضافة.. الفقر مش مرتبط بالقذارة أبدًا.. فكرة إن فيلم مصري يفورز بجايرة لأول مرة في كان دي حاجة كويسة جدًا“.
كاملة أبوذكري لمخرج فيلم «ريش»: “ما يهمكش من شوية منافقين”
تلميذي و عزيزي المخرج الشاب
عمر الزهيريمبروك علي فيلمك
و أرجو من الإخوه إلي يبزايدوا بوطنيتهم يرحمونا من كلمة سمعة…Posted by Kamla Wagih Abouzekri on Tuesday, October 19, 2021
أكدت المخرجة المصرية كاملة أبو ذكري دعمها الكامل لفيلم ريش ولمخرجi عمر الزهيري وكتبت من خلال صفحتها على الفيسبوك: “تلميذي وعزيزي المخرج الشاب عمر الزهيري.. مبروك على فيلمك، وأرجو من الإخوة إللى بيزايدوا بوطنيتهم يرحمونا من كلمة سمعة مصر، هو حد قال لحضراتكم إن مصر دي واحدة ست بايرة بتدوّر على عريس، كلمة سُمعة مصر دي كلمة مستفزة وتقلل من قيمة مصر، عيب عليكم بقى كفاية نفاق ومزايدة باسم إن حضرتك وطني والمسئول عن حماية مصر، مبروك يا عمر وافرح بنجاحك”.
وكملت: “ما يهمكش من شوية منافقين عايزين يتملقوا من خلال شاب صغير في أول حياته، وصدقني الكبار اللى بيخوفونا بيهم عندهم القدرة على معرفة المنافقين والمتملقين لإنهم كبار وفاهمين، ما تخافش منهم واحلم كمان وكمان، إن شاء الله المستقبل قدامك”.
المهندس ممدوح حمزة يعلق على انسحاب الفنانين من قاعة عرض فيلم “ريش” في مهرجان الجونة
“غيرة من نجاح الفيلم”.. المهندس ممدوح حمزة يعلق على ترك فنانين لقاعة عرض فيلم “ريش” في مهرجان الجونة
Posted by الجزيرة – مصر on Tuesday, October 19, 2021
قال حمزة: “أعتقد الفنانين اللي سابو قاعة عرض الفيلم ماخرجوش علشان الفيلم فيه إهانة لمصر، هما خرجوا غيرة من نجاح الفيلم من غير ما يعتمد على أسماء كبيرة، يعني الفيلم ماكانش معتمد على مشاركتهم”.
ممدوح حمزة هو ناشط سياسي ومهندس مصري كان أشرف على بناء مكتبة الاِسكندرية وغيرها من المشروعات الضخمة في مصر، وشارك في ثورة 25 يناير.
الفنانين المصريين الشباب كان ليهم رأي تاني خالص في فيلم ريش
بعد انسحاب بعض النجوم من مشاهدته.. تصريحات حصرية من الفنانين الشباب عن رأيهم في فيلم “ريش”
بعد انسحاب بعض النجوم من مشاهدته.. تصريحات حصرية لـ”إنرجي” من الفنانين الشباب عن رأيهم في فيلم “ريش”
#إنرجي_في_مهرجان_الجونةPosted by NRJ Egypt on Tuesday, October 19, 2021
الممثلة سارة عبد الرحمن قالت: “الممثلين والسينماتوجرفي تحفة وسألت الستايلست ازاي عملوا اللبس ده والفلوس القديمة.. التفاصيل كلها محسوبة والمخرج عمل عالم خاص استمتعت بيه جدًا.. أنا موهومة بالفيلم”.
الممثل يوسف عثمان: “الفيلم جريء إنه يبين مشاهد فيها قبح من غير ما يخاف من الفيد باك.. الفيلم فيه رؤية واضحة من الأول للأخر وتحس فيه بالتناغم مش زيّ أفلام تانية تحس إن في أكتر من مخرج عملها وبالتالي بتبقى الرؤية مشتتة.. في طبقات كتير في الفيلم ورغم إني مش بحب التجريد إلا إن الفيلم عجبني جدًا”.
الفنان علاء عرفة قال: “الفيلم عميق جدًا.. يعني فيه عمق رهيب”.
الفنانة ملك بدوي: “الفيلم فكرني بقصة المسخ بتاع كافكا.. الفكرة جديدة.. الفيلم طويل بس أنا بحب الـ Slow base”.
واحدة من الجمهور: “كفاية خوف من المجتمع بقى أنا حبيت ريش جدًا.. مش شايفه فيه حاجة وحشة.. قعدني للأخر علشان أشوف النهاية.. الفيلم مليان دراما بس هي دي الحقيقة”.
تعليق خالد النبوي على أزمة الفيلم: بنت المنيا أجمل وأعظم ما رأيت في مهرجان الجونة
كتب الفنان المصري خالد النبوي علي تويتر: “دميانة نصار بنت المنيا أجمل و أعظم و أصدق ما شاهدت في مهرجان الجونة، أداؤها في فيلم “ريش” يصعب على المحترفين، براڤو عمر زهيري مخرج فيلم ريش و تعيش السينما المصرية.
أول رد حكومي على “الفيلم المسيء لمصر”
علقت مديرة الإدارة المركزية للمبادرة الرئاسية “حياة كريمة” بوزارة التنمية المحلية في مصر ولاء جاد، على فيلم ريش المتهم بالإساءة لمصر وده بعد تصريحات دميانة نصار، بطلة الفيلم.
وأكدت ولاء: إن المبادرة بتنحاز لحرية الإبداع والفن، ومش بتنحاز للرأي اللي شايف إن فيلم سينمائي ممكن يسيء لسمعة مصر، مصر دولة أكبر من كده بكتير، حرية الإبداع مكفولة، وكمان وجهة نظر الكاتب والمؤلف، وأكدت على حق الدولة في إبراز الجهود اللي بتقوم بيها على أرض الواقع، وكملت: “الفيلم بيتناول حياة أسرة فقيرة ومحرومة من الخدمات ومش بيتوافر لها معايير الحياة الكريمة، واللي بتقوم به الدولة هو جهود متواصلة لتغيير الواقع ده من 2014، وبالفعل هو الواقع اللي كان بيعيش فيه قطاع كبير من المواطنين نتيجة عقود طويلة من الإهمال والسياسات غير المنحازة للعدالة الاجتماعية”.
دميانة نصار بطلة فيلم ريش بترد على الانتقادات بدبلوماسية
بطلة فيلم ريش ترد:
ممنوع علينا نفرح يعني؟ ممنوع نعملو فيلم بشكلنا و لبسنا و بيوتنا التعبانة زي اي ناس في المجتمع؟ مهو…Posted by Kamla Wagih Abouzekri on Wednesday, October 20, 2021
ردت دميانة نصار بطلة الفيلم على الانتقادات اللي اتوجهت للفيلم من الفنانين المصريين وقالت: “ممنوع علينا نفرح يعني؟ ممنوع نعملوا فيلم بشكلنا ولبسنا وبيوتنا التعبانة زيّ أي ناس في المجتمع؟ ماهو لازم نوقف ونسجل شكل دنيتنا قبل مشروع حياة كريمة اللي بيعملوا الريس علشان يعرفوا قبل مبادرة حياة كريمة كنا عايشين ازاي”.
بعد أزمة ريش: الفيلم فاز بجايزة نجمة الجونة لأفضل فيلم عربي طويل
بعد الضجة اللي سببها فيلم ريش للمخرج عمر الزهيري على الساحة الإعلامية والاجتماعية في مصر، وبعد اتهامه بالإساءة لسمعة مصر من الفنانين اللي اتكلمنا عنهم، فاز الفيلم بجايزة الجونة لأفضل فيلم عربي طويل في مهرجان الجونة السينمائي في دورته الخامسة.