في فصل الصيف بنهرب من الحر وبنسافر مصيف، أما في فصل الربيع فبنستغل الجو الجميل علشان نسافر أماكن دافية نستمتع فيها بالجمال والدفا قبل ما يجي الشتا، وعلشان مصر فيها أماكن بيكون الجو فيها في الربيع تحفة، وفي النفس الوقت تعتبر وجهات سفر جميلة جدًا، قررنا نعمل قائمة بأفضل 6 وجهات سفر في مصر علشان تستمتعوا فيهم بأجازاتكم في الربيع. يلا نبدأ!
الفيوم: الخضرة والدفا
أهم حاجة تميز الفيوم هي إنها مكان شتوي وفي فصل الربيع بيبقى الجو فيها تحفة، يعني لو الجو برد في القاهرة وإسكندرية بتغرق، فالفيوم هتلاقيها دافية وكمان المسافة قريبة من القاهرة، تقريبًا من ساعة ونص لساعتين.
القريه التونسية هي واحدة من أهم الوجهات السياحية في الفيوم، وهناك تقدر تتفرج على طرق صناعة الخزف وأشهر مكان لصناعة الخزف هو مدرسة فيونا السويسرية، وممكن تشتري منهم قطع خزفية جميلة جدًا.
وممكن كمان تزور جبل المدورة، ولو كنت بتحب تتسلق الجبال، هتستمتع بالتجربة دي. تالت مكان ممكن تزوره هو وادي الحيتان، وهناك هتشوف حفريات قديمة لكائنات بحرية كانت عايشة في الوادي ده من ألاف السنين لما كان بحر. وممكن تروح وادي الريان وتتفرج على الشلالات وتاخد فلوكه في البحيرة.
سيوة: واحة الربيع
من غير أي مبالغة، واحة سيوة هي من أجمل الأماكن في العالم كله. الواحة في نص الصحراء ومليانة مناطق جميلة تحسها حتة من الجنة، من أول البحيرات المالحة، والعيون المائية زيّ عين كليوباترا، لحد خروجات السفاري في وسط الصحراء.
الواحة تُعتبر تجربة سياحية فريدة من نوعها، وبتتميز بالجو البدوي اللي هتعيشه مع سكان سيوة الطيبين اللي بيرحبوا بالسياح وبيعاملوهم معاملة جميلة جدًا. كمان الجو بيكون معتدل في الربيع وحلو جدًا.
العين السخنة: قريبة من القاهرة والبحر حلو
لو مسافر ويك إند طويل أو قصير، العين السخنة هتكون أحسن اختيار بالنسبة لك، لإنها أولًا قريبة نسبيًا من القاهرة، خاصةً لو كنت من سكان شرق القاهرة (مدينة نصر ومصر الجديدة)، وبالتالي مش هتضيع وقت طويل في السفر. أما جوها في الربيع فبيكون دافي، بسبب انعكاس الشمس على صفحة المياه فبتسخّن الجو.
وأنا بحب جدًا العين السخنة في الوقت ده من السنة، علشان بتبقى هادية وفاضية وبتحس إنك منعزل عن دوشة وزحمة القاهرة.
شرم الشيخ: زيارة مناسبة لكل فصول السنة
سفرية شرم الشيخ ماتنفعش ويك إيند بس، يعني محتاج أكتر من أربع أيام علشان تقدر تلف فيها وتستمتع بجد. وهي من أجمل الأماكن السياحية في مصر ومن أجمل الأماكن من حيث البحر والدفا، علشان كده تعتبر مصيف ومشتى أكتر، وكل فصول السنة هي وقت مناسب لزيارة شرم الشيخ.
طابا: جمال سيناء وتميزها
سيناء من أروع الأماكن اللي ربنا خلقها على الأرض، وطابا تعتبر حتة من الجنة على الأرض، وفي الوقت ده من السنة بيبقى الجو فيها معتدل وصافي، والشمس مشرقة دايمًا. ولو روحت طابا، ماينفعش ماتروحش كانيون سلامه ووادي الوشواشي.
إسكندرية: الكورنيش والحلويات وأحلى أكلة سمك
كل المصريين بيحبوا إسكندرية والأسكندرانية نفسهم بيعشقوا بلدهم، وهتلاقيهم من أكتر الناس اللي عندهم اعتزاز فظيع بمحافظتهم. وفعلًا جزء كبير أوي من الشعب المصري لسه بيعتبرها مصيف، لكن إسكندرية بعد ما الصيف يخلص بتبقى حاجة تانية خالص. مش هتعرف تنزل المياه، بس مين بينزل المياه في إسكندرية النهارده؟ القعدة قدام البحر والانبساط بالتمشية والأكل هو التجربة السكندرية الربيعية الأفضل.
لو بتحب تسافر في الربيع، أو ناوي تسافر خلال السيزون ده، قول لنا هتروح فين، ولو في أماكن تانية داخل مصر تحب تنصحنا بها علشان نسافرها في الربيع، سيب لنا كومنت.