الشوارع جزء من تاريخ وتراث كل دولة، كل شارع بيحكي عن قصة وتاريخ وملحمة حصلت فيه من آلاف السنين. وفي شوارع اشتهرت بصناعات وحرف معينة ولسه لحد دلوقتي مشهورة بها. وفي شوارع بتاخد أهميتها وشهرتها من المعالم والآثار اللي فيها. وفي شوارع تانية مليانة حياة تحب تمشي فيها.. وللسبب ده جمعنا لكم أشهر خمس شوارع عربية كل واحد فيهم بيحكي حكاية.
شارع المعز – مصر
شارع المعز أكتر شارع في القاهرة ومصر مليان تحف أثرية من العصور الوسطى ومن العصر المملوكي بالذات. الشارع بيمتد من باب الفتوح لغاية باب زويلة والمساحة دي بتضم شوارع باب الفتوح و أمير الجيوش والنحاسين وبين القصرين والصاغة والأشرفية والعقادين والمناخلية والمنجدين والسكرية.
هتلاقي وأنت بتتمشى ضريح سيدى الذوق ومسجد الحاكم بأمر الله وزاوية أبو الخير الكليباتي ومسجد وسبيل وكُتاب سليمان أغا السلحدار ومنزل مصطفى جعفر السلحدار وجامع الأقمر، وغيرهم كتير من المعالم الأثرية المتجمعة في شارع واحد. وأنت هناك عدي على شارع خان الخليلي هات منه هدية تفكرك بالمكان.
شارع الآلام – القدس
معروف بأسماء كتير، منها طريق الأحزان أو طريق الصليب، ويعتبر صاحب أهمية كبيرة لدى أتباع الديانة المسيحية، وده لاعتقادهم إن ده نفس المكان اللي اتصلب فيه المسيح، وسنويًا بنشوف سياح كتير بتزور المكان. الشارع طوله كيلو متر، بيبدأ عند مدرسة راهبات صهيون وبينتهي عند أبواب كنيسة القيامة.
شارع الحمرا – بيروت
شارع الحمرا في قلب العاصمة اللبنانية بيروت، من أشهر شوارعها ومظهر من أهم مظاهر السياحة، بيلقبوه بشانزلزيه الشرق، من الستينيات لحد التسعينيات كان مكان للمثقفين والصحفيين والفنانين لحد ما بقى مكان بيضم أشهر العلامات التجارية. هتلاقي فيه كل حاجة، قهاوي وفنادق ومسارح وسينمات ومولات، ومعروف بحيويته، ليل ونهار هتلاقي الناس ماشية فيه، ده غير إنه بيتعمل فيه الاحتفالات السنوية والمهرجانات.
شارع باريس – تونس
شارع باريس من أشهر شوارع العاصمة، فيه بعض المؤسسات المهمة زيّ مقر وزارة أملاك الدولة والشؤون العقارية والشركة التونسية للتأمين وإعادة التأمين ودار الثقافة ابن رشيق والمعهد العالي للموسيقى ومكتبة شارل ديغول الفرنسية ونزل الماجستيك.
شارع ديدوش مراد – الجزائر
أهل المكان بيقولوا لو ماعدتش على الشارع ده، يبقى أنت ماجتش الجزائر، من أشهر وجهات التسوق لسكان المدينة وبرا المدينة، فيه أماكن مهمة زيّ كلية الجزائر العاصمة وحديقة غالان، بالإضافة لمتحف باردو والمتحف الوطني للآثار القديمة والفنون الإسلامية. شارع مركزي في المدينة وتحفة معمارية، ده غير القهاوي والمحلات التجارية اللي بتضفي حيوية في الشارع، اتسمى على اسم الشهيد ديدوش مراد واحد من أبطال معركة الجزائر ضد المستعمر الفرنسي.
بجانب التاريخ اللي مرتبط بالشوارع واللي بتزود قيمتها، لما تمشي بنفسك في الشارع وتعمل فيه حكاوي وذكريات حلوة قيمته هتزيد أكتر بالنسبة لك.