بيدخل علينا الشتا، ومع برودة الجو بيزيد عندنا الإحساس بالجوع بسبب ومن غير سبب، وخصوصًا بالليل لما بيبقى صديقك المفضل هو التلاجة، طب الموضوع ده له أسباب حقيقية ولا مجرد شيء مُرتبط معانا بموسم بس؟
في دراسات بتقول إن الموضوع ممكن يكون مرتبط بـ (الميتوكوندريا) ودي عبارة عن عضيات خلوية موجودة في الجسم ومسؤولة عن حرق الدهون وإنتاج الطاقة، وهي دورها إنها تحرق سعرات حرارية أكتر علشان تحافظ على درجة حرارة الجسم، فالجسم بيضطر إنه ياخد من المخزون اللي عنده اللي بيبقى في شكل دهون، ده غير إنه في الأساس، جسمك بيحرق سعرات حرارية لوحده لما بيحس بالبرد علشان يدفي نفسه.
ده بالنسبة للأسباب العلمية اللي ممكن نحط تحتها خطوط كتير، بس على الجانب التاني، في أسباب متعلقة بجوانب نفسية، واللي بتخلي الجسم بشكل تلقائي يحتاج إنه ياكل كتير، والمخ بيأهلك لكده.
زيّ الفكرة اللي بتقول إن فصل الشتاء هو فصل اكتئاب، وإن ناس كتير وهي مكتئبة الأكل بيبقى هو ملجأها الوحيد، وفي ناس أصلًا من قبل دخول الشتاء بتبقى عاملة نظام لنفسها وحاطة في دماغها إنها هتزيد في الوزن وتقول ده شتا وأكل كتير، وبالتالي مش بياخدوا بالهم من نوعية الأكل اللي بيتاكل، ولا إذا كان بيتسبب في زيادة الوزن ولا لأ.
علشان نتجنب ده.. نعمل إيه؟
- نركز على الأطعمة اللي عندها قدرة إشباع عالية، وفي نفس الوقت سعراتها الحرارية مش عالية زيّ الفاكهة والخضار.
- ممكن نبدأ الأكل بسلطة أو بشوربة خضارK علشان نقلل عندنا الإحساس بالجوع، وممكن كمان نزود الأكلات اللي بتحتوي على الحبوب الكاملة، زيّ الشوفان والرز البني والحاجات اللي فيها ألياف مُشبعة، كإنك بتخدع معدتك بالظبط، ويُفضل برضه أول ما نحس ببرد نعمل حاجة سخنة تدفينا وسعراتها الحرارية تبقى قليلة.
- سبب أساسي في الأكل الكتير برضه هو قلة الحركة في الفصل ده، وقت الأنشطة بتاعته قليلة بسبب برودة الجو ومافيش غير إنك تقعد تحت البطانية طول اليوم، فلو بدأنا نعمل مجهود وحركة أكتر حتى لو لخبطنا في الأكل، هنقدر نحرق اللي دخل معدتنا.
- حاجة أخيرة برضه بتتسبب في إحساسنا بالجوع وممكن نتجنبها، هي إننا مش بنشرب مياه كتير في الشتاء، ووقت ما بنحس بعطش الموضوع بيختلط معانا، ومش بنبقى عارفين ده إحساس جوع ولا إحساس عطش والعقل مش بيعرف يميز، فلو شربت مياه بكميات معتدلة، ده هيساعد في زيادة إحساسك بالشبع.
الشتاء من الفصول المُحببة عند ناس كتير، وتفاصيلها بنستناها كل سنة علشان بتحسسنا بالسعادة، فحتى لو هنزيد في الوزن، برضه هنفضل نحب الشتاء.