بعد نجاح ABtalks بجملته المشهورة “نكشف الإنسان خلف الألقاب”، مين هو أنس بوخش؟

بواسطة: ساره علي

 معظمنا بنتفرج على برنامج ABtalks اللي بيقدمه أنس بوخش، اللي بطريقته وبشكل سلس بيقدر يقنع الضيف إنه يتكلم بصراحة، وبنكتشف الجانب الصادق والإنساني لكتير من المشاهير والمؤثرين (influencers)، وبنعرف مين هو الإنسان خلف اللقب فعلًا. أنس بيقدر كمان بكلامه يلمس المشاهدين مش بس الضيوف اللي معاه، وكمان هتستفيد من خلال الخبرات والمواقف الإنسانية اللي بيعرضها في حلقات البرنامج. وبيحاول أنس بأسئلة معينة إنه يحلل شخصية الضيف، وفي كل مرة بتشوف حلقة من البرنامج بتكون عاوز توجه إنت كمان أسئلة لأنس.

مين أنس، خلف اللقب؟

أنس بوخش هو رجل أعمال ومؤثر (influencer)، ومن مواليد 3 أغسطس 1981، وأب لولدين. بيحب كورة القدم جدًا، وبسبب المجتمع التقليدي، كانت الكورة بالنسبة له في خانة الهواية وصعب تكون أكتر من كده، وده دخله في شوية تحديات مع نفسه علشان يقدر يلاقي بديل يشتغل فيه ويكون بيحبه، وبعد التخرج، استغل حبه للكورة إنه يؤسس نادي الأهداف الرياضي. كمان أنس بيحب المزيكا، ودي حاجة مش كل الناس تعرفها عنه. بعد ما درس هندسة الميكانيكا، وبعد محاولات كتير، اكتشف نفسه فعلًا وعرف هو بيحب يعمل إيه.

أنس بيقول إن لازم تكون بتحب شغلك علشان تقدر تكمل فيه، غير كده هتمّل، ده غير إن شغلك بتقضي فيه أغلب وقتك فصعب تكمل في حاجة مابتحبهاش، ولو بتعمل اللي بتحبه ومؤمن به وعندك شغف تجاهه، هتبدع فيه. كمان أنس بيقول إن الشغف هو اللي بيحركه، علشان كده هو دايمًا بيشجع الشباب إنهم يحاولوا مايخلوش اليأس يتغلب عليهم علشان يحققوا هما كمان حلمهم. أنس مؤمن بفكرة التخطيط قبل ما يبدأ في أي حاجة علشان بيشوف إن التخطيط جزء مهم من النجاح، وإن لو فشلت في التخطيط، فأنت كده تقريبًا بتفشل إنك تنجح، وده غير إنك تكون مخطط لشغلك وحياتك كويس، هيجنبك أخطاء كتير.

أنس من الشخصيات الطموحة اللي بتحب شغلها بس مابينساش يقضي وقت مع أهله وأطفاله، ومؤمن إن الوقت ده هو اللي بيجدد طاقته. كمان بيحب القراءة جدًا، وبالنسبة له القراءة هي جزء مهم من تطوير الشخصية، علشان كده بيشجع أطفاله إنهم يهتموا بالقراءة. التجربة بالنسبة له جزء أساسي من الاختيارات، وشايف إنك ماينفعش تقبل أو ترفض لمجرد الرفض، فلازم تجرب علشان تعرف تقرر. أنس دايمًا بينصح الناس إنهم يتعاملوا بطبيعتهم ويكونوا نفسهم من غير أي تصنع، والحقيقة إن احنا كمان بنشوف أنس طبيعي جدًا وصادق في مشاعره، وده اللي بيخلي أنس مميز عن غيره من الناس اللي في نفس مجاله.

آخر كلمة: ماتفوتوش قراءة: مع بسنت وفراج، من خلال سؤال قدر أنس إنه يوصل معاني ورسائل كتير

تعليقات
Loading...