مع بسنت وفراج، من خلال سؤال قدر أنس إنه يوصل معاني ورسائل كتير
بواسطة: ساره علي
وكالعادة الضيف بيتكلم فيه بصراحة، برنامج ABtalks. المرة دي كان الضيوف بسنت وفراج، والأسئلة كانت موجهة ما بينهم هما الإتنين, الحقيقة إن العلاقة بينهم بسيطة ومريحة وهتشوف ده من ردود أفعالهم. إنك تكون في علاقة مريحة بالشكل الكافي بالنسبة لك ده الطبيعي والمفروض كل إنسان يستحق إنه يكون في علاقة صحية، وعلشان ده قليل وسط علاقات معقدة موجودة بشكل كبير في حياتنا. كان لازم نتكلم عن اللي حصل في البرنامج بين بسنت وفراج وازاي قدروا يوصلوا للناس رسالة من خلال أسئلة قدمها ليهم أنس مقدم البرنامج، اللي كمان له دور كبير في طرح أسئلة إجابتها بيكون الجمهور محتاج يسمعها أو حتى يفتكرها.
من ضمن كل الأسئلة سؤال واحد قلب الموازين
العلاقات بتحتاج مجهود واحترام من الطرفين مش بس الحب، ظهور بسنت وفراج بشكل علاقة ناضجة فيها تواصل ما بين الطرفين قدر يوصل حاجات كتير بسهولة، وما بين كل الأسئلة سؤال واحد قدر يغير كل الموازين، السؤال كان من فراج لبسنت لو دي أخر مرة هشوفك فيها هتقوليلي إيه؟ فراج أول ما قرأ السؤال بدأ يدمع، وبمجرد تفكيرهم في السؤال سّبب خوف إن في احتمال حد فيهم يختفي من حياة التاني. ورد بسنت كانت دموعها وإنها صعب تتخيل حاجة زيّ دي. ولو موقف زيّ ده مع أي حد بتحبه مش شرط حبيب ممكن صديق أو أفراد العيلة فأصعب إنها تحضر إجابة لسؤال زيّ ده، وإن أكيد الكلام بيكون عفوي في المواقف دي. ومع ذلك ردها كان شكرًا على الحب والأيام وعلى احتوائه ليها ومحاربته وإنه ماستسلمش وقد إيه هي بتحبه أوي.. علاقة بسنت وفراج زيّ طبيعة كل العلاقات كان فيها تحديات واحتاجت منهم هما الإتنين مجهود علشان يكملوا مع بعض. فالعلاقات بتحتاج لمجهود علشان تحتفظ بيها، مش مجرد شكل خارجي.
الغرض من سؤال أنس مقدم البرنامج اتحقق وبدأنا كلنا نعيد التفكير في حاجات كتير في حياتنا
بعد سؤال فراج لبسنت “لو دي أخر مرة هشوفك فيها هتقوليلي إيه؟” احنا كمان بدأنا نفتكر قد إيه في نعم في حياتنا ممكن تختفي فجأة وممكن نكون مش مقدرين وجودها. لكن لو فكرت لثانية إنها ممكن تضيع وقتها هتعيد التفكير في حاجات كتير أوي في حياتك. هتشكر ربنا على وجود ناس معينة حوليك زيّ أهلك وصحابك والناس اللي بتحبهم, هترجع تعيد النظر في كل حاجة ما بينك وما بينهم حتى تعاملك معاهم البسيط هتقدره. كمان هتشكر ربنا على كل النعم اللي في حياتك مش بس الناس اللي حوليك، وهتبدأ تبص من منظور تاني للحياة. هتعيد التفكير قبل ما تقول لحد كلمة ممكن تجرحه أو تزعله منك، وهتعرف إن ده أحسن بكتير من إنك تندم بعدين إنك ماكُنتش مقدر اللي معاك بالشكل الكافي. صعب أوي إن اللي بيحبوك يبعدوا عنك أو يختفوا فجأة وخصوصًا لو ماكُنتش مبين لهم قد إيه بتحبهم، وإنك مقدرهم. سؤال أنس فعلًا صعب بس في محله. فمن وقت للتاني الإنسان بيحتاج يفتكر حجم النعم اللي في إيده ويقدرها.