برنامج من أحد أهم البرامج الحوارية الأكثر شعبية على اليوتيوب حاليًا في الشرق الأوسط، هو AB Talks اللي بيعمل على تحطيم الصور النمطية عن طريق اجراء حوارات في الحلقات قوتها بتنبع من صدقها وعنصر العاطفة اللي بيحاوطها.. نوع ومستوى من البرامج مابقيناش نشوفه كتير، رغم أهميته ولباقته. بيتناول المذيع أنس بوخش موضوعات محظورة في الحلقات زيّ الذكورة السامة والنسوية والصحة العقلية.
وهدفه الرئيسي والأساسي هو توصيل الإحساس للضيف وللجمهور كمان، إنهم مش لوحدهم.. وإن الصعوبات وتحديات الحياة اللي أوقات بتكون قاسية، هي اللي بتجمعنا.. مهما كان النجاح والتألق اللي بنشوفه للشخصيات العامة خارجيًا، فعلى المستوى الإنساني كلنا واحد.. نفس المشاعر الإنسانية والصعوبات والمخاوف. وزيّ ما بيقول أنس من خلال intro البرنامج بتاعه في الحلقات، إن احنا بنشوف خلال الحوار الإنسان الحقيقي، بعيدًا عن أي ألقاب.
ولإن النوع ده من البرامج الهادفة اللي مش بس تحقيق مكاسب مادية ونسب مشاهدة عالية هدفه، ولكن بث شعور الطمأنينة والوحدة بين أفراد الشعوب، قررنا نسلط الضوء على نقط مهمة ومختلفة تم الكلام عنها في الحلقات المختلفة من البرنامج، ونعرض أفضل حلقات شوفناها..
حلقة منى زكي
مؤخرًا نزل حلقة جديدة من AB Talks وكانت الضيفة منى زكي. بغض النظر عن إن كده كده منى زكي مجرد ظهورها هيخلي الناس تتفرج على الحلقة وتشوفها مميزة، ولكن الحلقة كمان كانت مميزة للمواضيع اللي تطرقوا ليها أثناء الحديث. لما اتسألت عن علاقتها بوالدها شوفنا الجانب العاطفي من منى، وبكائها خلال الحلقة اللي مش كتير بنشوفه.
اتكلمت عن قد إيه أبوها كان بيحبها وشايف إن مفيش أي إنسان يستاهلها، من كتر ما هي كبيرة في نظره. إن هو كان الطرف اللي بيدلع ويدي مشاعر بزيادة، وكمل العطاء ده وامتد لبنتها، لدرجة هي وصفتها إنها كانت ممكن توصل إنهم يكونوا “spoiled” أو مدللين زيادة عن اللزوم. ولكن الحقيقة إنها بعدين اكتشفت إن الحب والعطاء ده ساعدها يكون شخصيتها، وخلى بنتها تعيش طفولة مميزة.
على عكس المعتقدات اللي كتير مصدقها، العطاء والحب للمقربين ليك، مش لازم يتشاف إنه هيطلع أفراد غير مسئولة أو مددلة، بالعكس لو اتعمل بالطريقة الصح ومع الشخصيات الصح، هيطلع ناس أسوياء وعندها شعور بالآخرين، لإنهم هيكونوا تشبعوا بحب وحنان يساعدهم على تقديم ده لغيرهم.
حلقة علي جابر
ممكن تستغربوا من اختيارنا للحلقة دي بالذات، ولكننا بنأكدلكم إنكم هتستغربوا أكتر من كم الحاجات اللي هتكتشفوها، اللي مش بس هتغير نظرتكم لضيف الحلقة، لكن كمان هتفتح مدارككم وهتخليكم تعيدوا النظر في حاجات كتير. الإعلامي علي جابر ، من وقت ظهوره في برنامج Arabs got talent، وهو بقى معروف عنه إنه صريح جدًا لدرجة خلت البعض يوصفوه إنه ماعندهوش مشاعر.
اتكلم الإعلامي علي في النقطة دي أثناء حديثه عن طفولته، وقال إنه عاش ظروف حرب صعبة في لبنان اللي أثرت عليه شخصيًا، فتم إصابته وقصف بيته أكتر من 6 مرات. ولما اتسأل ازاي الظروف دي شكلت شخصيته، قال إنها خلته “أكثر واقعية”. إنسان عملي بيدور على الحلول بدل ما يسمع ويتكلم عن المشاكل. والـ tough exterior ده خلى البعض يفتكر إنه ماعندهوش مشاعر. ولكن الحقيقة العكس تمامًا، الظروف هي اللي أجبرته يفكر بشكل تاني ويكتم مشاعره الحقيقية.. ده مثال مهم عن ازاي لازم نتعود مانصدرش أحكام مسبقة على الآخرين، ودوام مراعاة الحياة الشخصية اللي ممكن تكون كانت صعبة، ولكن محدش يعرف عنها حاجة.
حلقة بلقيس فتحي
لما المطربة الإماراتية بلقيس فتحي كانت ضيفة الحلقة في AB Talks، اتكلمت على منطقة مهمة جدًا ومؤثرة. وهي مرحلة Behind the scenes أو ما وراء الكواليس في حياة الإنسان. قالت بلقيس إن الجمهور والناس بيشوفوا بس الصورة الـ glamorous والناجحة منها، بيحبوا صوتها وشكل فساتينها في الحفلات. لكنهم مش بيكونوا موجودين في الكواليس، لما تكون هي حزينة من أول المشاكل الكبيرة في حياتها الشخصية لحد حاجات زى لما بتتألم من الجزمة اللي بتعورلها رجلها أو حتى الفستان اللي كان بيشكها.
مش بس الشخصيات المشهورة اللي عندهم الأزمة دي، ولكن بسبب وجود السوشيال ميديا اللي بقى مخلينا حابين نظهر صورة معينة ونوصلها للناس، بقى في كتير من الأوقات اللي الناس ممكن تشوف إن حياة شخص معين سعيدة وخالية من المشاكل، ولكن الحقيقة إنهم بيشوفوا بس القشرة الخارجية.. محدش بيكون موجود في المنحدرات والأزمات اللي بتشهدها ما وراء الكواليس.
حلقة تارا عماد
لما نشوف تارا عماد ضيفة في البرنامج الحواري ده، آخر حاجة ممكن نتوقعها إنها تذكر مسألة حب الذات أو الـ self love كمشكلة من المشاكل اللي بتواجهها. ولكن الحقيقة إنها فعلًا من أكبر التحديات اللي بتواجهها، لو ماكانتش أكبرهم. اتكلمت تارا عن معاناتها لسنين في إنها تشوف نفسها وجسمها بصورة إيجابية وإنها دايمًا عندها شعور إنها مش كفاية.
مشكلة كبيرة بتحتاج يكون الحوار الداخلي أو الـ self talk إيجابي علشان توصل لمرحلة تقبل وحب النفس والشكل زيّ ما هو. ولإن في آلاف لو ماكانش ملايين من الناس بتعاني من المشكلة دي، فعلى الأقل لما تارا اتكلمت عنها وعن محاولاتها في الوصول لمرحلة أفضل من الـ self love، ده كسر الحاجز، وخلى الحديث عن النوع ده من المواضيع شيء عادي ومش محرج أو بيقلل من الشخص اللي بيحكي عنه.
بالعكس، ده مثال قوي إن شابة صغيرة بتشتغل في كارير الـ modeling والفن، وبتتشاف إنها من أرقى وأجمل الممثلات الموجودين دلوقتي، بتعاني من المشكلة دي وبتحاول إنها تخلي حديثها الداخلي أكثر طيبة، لإنها تستحق ده. فأي حد بيعاني من نفس المشكلة، دلوقتي مش هيحس إنه لوحده اللي في النوع ده من الصراعات الداخلية.
حلقة روان بن حسين
الموديل الكويتية روان بن حسين كانت بتعاني من تحديات كبيرة في وقت واحد، من طلاقها من زوجها اللي حصل بينهم مشاكل كبيرة كانت بتحصل قدام الناس في العلن، لإضطرارها إنها تربي بنتها الصغيرة لوحدها ومن بعدها مرض والدتها الشديد. سؤال واحد بسيط من أنس في AB Talks “بصراحة.. كيف حالك” كان كفيل إنها تتطرق لكل التفاصيل دي من تاني.
اتكلمت عن الصعوبات اللي الشخص بيواجهها بعد انتهاء العلاقة، خصوصًا لو زواج، ازاي حياة الـ single mother مش سهلة، خصوصًا لما أبوها اضطر يرجع لبلده علشان يقف جنب والدتها في مرضها. وخلال المقابلة شوفنا إن مهما كان الشخص جميل، وغني، وناجح، فانتهاء العلاقة أكيد بيسبب آلم نفسي كبير وبيفقد الشخص الثقة في نفسه زيّ ما روان قالت. ولكن كل ده مهم علشان الشخص ينضج، وكمان علشان يقدر يعرف عيوبه ويبقى شجاع كفاية إنه يعترف بيها ويعتذر عنها، زيّ ما روان عملت خلال المقابلة.
حلقة هدى المفتي
بالنسبة لمقابلة الفنانة هدى المفتي في AB Talks، فهي كمان كان فيها كتير من المواضيع المختلفة، ولكن أكتر حاجة لفتت نظرنا، هو بكائها لما سألها أنس إيه أكتر حاجة بتخاف منها وقالت الوحدة. قالت هدى إنها كانت بتحكي عن إيه الحاجات اللي كانت بتضايقها من أهلها سواء في طفولتها أو دلوقتي، لكنها خايفة تندم بعدين لو فارقوا الحياة، على الوقت اللي ضاع وهي متضايقة منهم في حاجات معينة. لإن في الآخر أهلها أكتر ناس بيحبوها وبيخافوا عليها وبيقعدوا جنبها وقت مرضها.. فهي خايفة بعد عمر طويل تكون تعبانة، ومايكونوش هما موجودين معاها.
مهمة جدًا النقطة دي، فإننا ناخد بالنا إننا نستمتع بأهالينا وبوجودهم حولينا، بغض النظر عن أي خلافات طبيعية ممكن تكون بتحصل، لإن الوقت اللي بنقضيه معاهم غالي جدًا.. وببساطة لا يعوض.
حلقة كارن وازن
اتكلمت كارن خلال الحلقة في نقطة مهمة جدًا، وهو إنها مش شخص الناس بتشوفه سعيد لإنها عندها كل حاجة. ولكن لإنها بتختار كل يوم إنها تبص لنص الكوباية المليان. طلاق أهلها وارتباطها بشخص عايش في بلد بعيدة عنها كانت حاجات ممكن تصيبها بالاكتئاب، لكتها اختارت تشوف إن طلاق أبويها منحها نوع مختلف من السعادة لإن بقى عندها عيلتين. وإن الشخص اللي كانت مرتبطة بيه (زوجها حاليًا) بيحبها كفاية إنه يرتبط بيها حتى وهو في بلد بعيد عنها.
آخر كلمة: شكرًا للإعلامي أنس بوخش، لتقديمه برنامج بيقلل شعور الوحدة عند الملايين من الناس..