آبل تعلن عن مميزات نظام تشغيلها الجديد، ومن أبرزها الترجمة الصوتية من وإلى العربية

0

أعلنت شركة آبل خلال مؤتمر المطورين السنوي WWDC 2020 اللي اتعمل على الإنترنت عن الإصدار الجديد من نظام تشغيلها IOS 14، وده بالإضافة لمجموعة كبيرة من المنتجات والتقنيات الجديدة زي جهازها الجديد بمعالج Apple Silicon ، بعد تخليها عن معالجات إنتل.

نظام IOS 14 هيقدم طرق جديدة للتعامل مع التطبيقات في موبايلات الآيفون، وهيضيف ميزة الترجمة اللي معمولة في شكل تطبيق بيشبه ترجمة جوجل، وبيتيح ترجمة 11 لغة زي العربية والإنجليزية والصينية والألمانية. والتطبيق ده مُصمم للاستخدام في المحادثات الفورية، وفيه إمكانية الترجمة الصوتية من وإلى اللغات المُتاحة فيه.

بواسطة: البيان الإمارات

لحد دلوقتي مفيش معاد محدد لتاريخ إصدار نظام IOS الجديد، بس من المتوقع أن تطلق الشركة الإصدار التجريبي العام منه في شهر يوليو الجاي، وكل موبايلات الأيفون اللي بتشتغل بنظام الIOS 13 هتقدر تنزل النظام الجديد.

من ضمن الإضافات في النظام ده، المظهر الجديد للشاشة الرئيسية، وده لأنها هتتضمن عناصر تحكم Widgets جديدة هتسمح بتخصيص واجهة الهاتف، والوصول بسرعة إلى وظائف معينة زي معلومات الطقس باستخدام أداة الطقس، أو تبديل المسارات الموسيقية باستخدام أداة تطبيق الموسيقى.

وكمان في ميزة جديدة اسمها Smart Stack بتضم مجموعة متنوعة من العناصر في صندوق واحد على شكل مستطيل، وبتتغير العناصر دي تلقائيًا بناءً على ساعات اليوم ونشاطك المعتاد فيها، فممكن مثلاً يظهر الصبح ملخص للأخبار، وبعد الظهر أداة التقويم، وبليل ملخص للنشاط الرياضي في اليوم، وكل ده ممكن التحكم وفيه وترتيبه على حسب تفضيلاتك الخاصة.

بواسطة: لبنان 24

IOS 14 بيضم كمان ميزة جديدة اسمها مقاطع التطبيق أو App Clips، وهي هتتيح للمستخدمين الوصول لمقتطفات صغيرة من التطبيقات بسرعة، من غير ما يضطروا ينزلوها من المتجر. الميزة دي هتسهل بعض المعاملات زي مثلاً الدفع مقابل الحصول على مكان لوقوف السيارات أو شراء تذاكر لحفلة معينة.

وفي ميزة اسمها صورة داخل صورة هتسمح للمستخدمين مشاهدة مقاطع الفيديو أثناء استخدام تطبيقات تانية، والميزة دي هتسمح للفيديو إنه يكون شغال في نافذة صغيرة في أي مكان من الشاشة الرئيسية. وممكن كمان تخفي مشغل PIP في شريط جانبي، لو كنت عاوز تخفي الفيديو وتفضل سامع صوته.

وآخيراً في وضع جديد قبل النوم اسمه Wind Down وده هيساعد المستخدمين على الاستعداد للنوم، وفيه خيارات لإضافة اختصارات للتأمل أو تشغيل موسيقى هادئة.

آخر كلمة: متفوتوش قراءة بعد طول انتظار، يوتيوب أخيرًا أطلقت خدمتي Music و Premium في مصر

تعليقات
Loading...