بعد تخفيف الإجراءات الاحترازية، دي الحاجات اللي تقدروا تعملوها علشان تقضوا صيف ممتع…

0

بعد شهور من الحجر الصحي والقعدة في البيت، كتير مننا نفسه يخرج ويجرب مغامرات جديدة، بس بما إن خطر الأصابة بفيروس الكورونا لسة موجود، تحركاتنا هتفضل للأسف متحددة بأماكن معينة وفي نطاق ضيق لفترة طويلة.

لحسن حظنا مصر مليانة بأنواع مُختلفة من الأنشطة والخروجات الجديدة على أغلبنا، وكل اللي إحنا محتاجينه إننا نعرف عنها أكتر، وده اللي دفع طلاب جامعة مصر الدولية إنهم يركزوا في مشاريع تخرجهم على الأنشطة الجديدة اللي ممكن نقوم بيها وكنوز بلدنا اللي كانت تايهة عنا.

بواسطة: فيسبوك

مثلاً لو إنتم بتحبوا الرياضة والمُخاطرة، صفحة مشروع Risks& Cliffs هي انسب مكان ليكم الفترة دي، وده لأنها قايمة على تعريفنا بالرياضات الخطيرة اللي دايماً بنشوف الناس بتمارسها برا مصر، ومنعرفش إنها موجودة هنا قريب مننا، والصفحة بتقدم كل فترة رياضة جديدة وبتدي معلومات عنها زي الطريقة اللي نقدر نمارسها بيها، والأماكن المتاحة فيها، والمعدات اللي ممكن نحتاجها. فعندك مثلاً الكايت سيرفنج أو التزلج الشراعي على الماء اللي دخل مصر مؤخراً، والوقت ده من السنة هو أنسب وقت للرياضة دي، وتقدروا تتعلموها في أقل من أسبوع، ومن أفضل الأماكن اللي تقدروا تمارسوها فيها هي البحر الأحمر وراس صدر.

وفي كمان رياضة التحليق بالمظلات اللي بنشوف الناس بتمارسها بسهولة برا مصر، بس هي الحقيقة متوافرة هنا عندنا بمعدلات أمان عالية، وتقدروا تطلعوا في مغامرات كبيرة معاها من فوق الأهرامات أو في أماكن تانية.

وبهاشتاج #احلم_دلوقتي_سافر_بعدين أطلق مجموعة تانية من الطلاب حملتهم رايح جاي اللي بتروج لسياحة المحافظات في مصر وبتساعد الشباب على اكتشاف كنوزنا المدفونة. فمثلاً لو إنت شخص بتحب الفنون، ونفسك تنمي موهبتك، وتطلق العنان لخيالك في بيئة هادئة ومُلهمة، رايح جاي هيرشدوك لأنسب الأماكن ليك زي مثلاً محافظة كفر الشيخ اللي فيها بحيرة البرلس والجزر العايمة عليها اللي مليانة بالأعمال الفنية والإبداعات، وبتستضيف كل سنة مهرجان فني كبير بيشارك فيه فنانين من كل دول العالم.

مصر بفضل تنوعها الثقافي والبيئي فيها أماكن مختلفة بتناسب كل الفئات والأعمار والاهتمامات، وعلى الرغم من أهمية وجمال المواقع الآثرية وأماكن الخروجات المشهورة فيها، عندنا أماكن تانية كتيرة أجمل منها بس مفيش عليها اهتمام كبير، وعلشان كده قرر الطلاب يجذبوا اهتمامنا لأماكن جذب سياحي مش معروفة، ويعرفونا عليها وعلى مظاهرها الفنية والثقافية من خلال مجموعة من البوستات التفاعلية والألعاب الجديدة على السوشيال ميديا.

آخر كلمة: بنتمانلكم صيف ممتع، ومتنسوش تاخدوا بالكم من صحتكم!

تعليقات
Loading...