البنجر هو نوع من أنواع الخضار الجذرية، ومشهور بفوائده والقيمة الغذائية العالية، ودايمًا معروف بدخوله في صنع المخلل والعصير، ورغم انخفاض السعرات الحرارية فيه، ولكنه غني بالفيتامينات والمعادن، وبالألياف، والبروتين، وفيتامين سي، وفيتامين ب، ومغنيسيوم، وبوتاسيوم، وحديد، ومنغنيز. وهو بيساعد في خفض ضغط الدم، وبيدي طاقة فبيحسن الأداء الرياضي، وبيكافح الإلتهابات، وبيحسن صحة الجهاز الهضمي، وفي العموم فوائد البنجر كتيرة لصحة الإنسان وللبشرة وللشعر.. فتعالوا نتعرف على وصفات مختلفة للبنجر.
عصير البنجر
هنحتاج 4 حبات بنجر صغيرة، وتفاحة كبيرة، وربع كوباية مياه، وشوية زنجبيل طازة حسب الرغبة، و3 حبات جزر.
هنقطع البنجر، ونقشر التفاح، ونخلط المكونات كلها سوا في الخلاط، ونحتفظ بيه في التلاجة.
ماسك البنجر للبشرة
هنحتاج معلقة صغيرة من عصير البنجر والرمان والجزر، هنخلط المكونات كلها مع بعض، وندهنه على وشنا وبالذات شفايفنا، وهي بتساعد في تفتيح البشرة والشفايف بالذات المغمقة من التدخين.
ماسك البنجر للشعر
هنخلط عصير البنجر مع شوية خل وندعك بيها شعرنا، وده بيساعد في علاج وتقليل قشرة الشعر.
سلطة البنجر
هنحتاج 4 حبات بنجر كبيرة، وحزمة جرجير، وعلبة درة حلو، وللصوص هنحتاج 4 حبات ليمون، و4 معالق زيت زيتون كبيرة، ونص معلقة صغيرة ملح.
هنسلق البنجر، ونقشره، ونقطعه مكعبات كبيرة، ونسيبه في التلاجة، وبعد كده هناخد ورق الجرجير بس من غير عيدانه، وفي طبق تاني هنحط مقادير الصوص، ونخلطهم سوا، وفي طبق التقديم هنحط الجرجير الأول، وعليه البنجر، والدرة، وعليه الصوص.
سلطة البنجر بالزبادي
هنحتاج 4 حبات بنجر كبيرة، و3 معالق زيت زيتون، ومعلقتين عصير ليمون، وفص توم مهروس، وملح وفلفل، ولبن زبادي.
هنسلق البنجر ونقطعه مكعبات صغيرة ونحطهم في طبق، وفي طبق تاني هنخلط الزيت والليمون والتوم، ونرش الملح والفلفل، ونحط فوقيهم لبن الزبادي والبنجر ونقلبهم كويس.