بدأ العد التنازلي لنهاية مسلسل (وأخيرًا) بطولة قصي خولي ونادين نسيب نجيم، المسلسل من وقت انطلاقه وهو بيتصدر تريند في الدول العربية. وبيحكي المسلسل عن قضايا جريئة ومواضيع شائكة وتابوهات بخصوص تجارة النساء في لبنان من خلال مجموعة من البنات بيتم اختطافهم وإجبارهم على الشغل في الممنوع.
وفي حلقة يكاد يقال عنها حقيقية لدرجة كبيرة، ظهر قصي خولي وهو بيصور واقع جديد بيعيشه الشعب اللبناني بقاله فترة، واقع اتفرض عليه بسبب الأزمة الاقتصادية اللي بيعشوها، وهو اقتحام المودعين لمصارف لبنان والتهديد بالقتل واحتجاز رهائن بعد ما بيرفض المسئولين عن البنك إن المودع يصرف مستحقاته إلا بعد ما ياخدوا أوامر من القيادات العليا مع اجراءات روتينية تعسفية علشان يصرفوا مستحقاتهم.
فظهر قصي خولي”ياقوت” وهو بيقرر يقتحم المصرف بعد ما رفضت الإدارة إنها تسحب من حسابه 40 ألف دولار علشان يستخدمها في الإفراج عن والده ويدفع ديونه المتراكمة عليه فقرر زي واقع الكتير من اللبنانيين إنه يستخدم السلاح ويهدد لحد ما مطالبه تتنفذ.
المشهد كإنه كان صوت ولسان حال مودعيين لبنان وتجسيدها في الدراما في إشارة بإنها واقع مفيش مفر منه وفكرنا بحادثة كنا تابعناها كلنا وقت ما بنت لبنانية قررت تهدد المصرف بمسدس مش حقيقي علشان تسحب فلوس لعلاج أختها المريضة، وغيرها من الحوادث والإضرابات.
آخر كلمة:ماتفوتوش قراءة: ماستر سين: الكبير أوي يقدم درس لمشاهير ومدمنين السوشيال ميديا