الكبير أوي يضرب من جديد، بعد مرور أكتر من 10 حلقات من مسلسل الكبير أوي وبعد ماطلع تعليقات انتقدت فيها الموسم ده بالتحديد وإنهم بيحاولوا يضحكوا الجمهور بالعافية، الكبير أوي ضرب مثل بواحدة من أهم حلقاته في الموسم السنة دي واتملت تعليقات الناس بـ”أيوة هو ده الكبير اللي نعرفه”.
الحلقة اتكلمت عن هوس السوشيال ميديا وازاي الناس ممكن تعمل أي حاجة في سبيل شوية لايكات، ممكن تكدب، ممكن تخلق علاقات وهمية ممكن تخدع وتغش وتظهر حقيقة عكس اللي ظاهره للناس بس علشان تزود عدد الـ”ريتش” أو “التفاعل” وتجيب فلوس. وبيّن لنا الخبايا والكواليس اللي ورا اللي بيظهر لنا على شاشة موبايل.
وخلال مشهد يقال عنه بإنه “ماستر سين” لجوني لخص فيها كل الحدوتة وقدم رسالة للناس اللي ضيعت حياتها كلها بتجري على ما يقال عنه إنه “وهم” واختصار الرسالة هي “كونوا حقيقين وماتضيعوش حياتكم ورا شاشة موبايل تتفرجوا عل ناس ممكن يكونوا بيمثلوا عليكم أو أنتوا عايزين تمثلوا عليهم”.
واللي ساعد إن الحلقة تظهر بالصورة الصح هو الظهور المميز اللي قدمته أيتن عامر وعملت فيه دور واحدة من مشاهير السوشيال ميديا، واللي قررت تتفق مع جوني إنهم يمثلوا على الناس ويتجوزوا ويصوروا الخطوبة والفرح علشان يزودوا عدد المتابعين وكمان يخترعوا خناقات ومؤامرات من باب التريند.
الحلقة دي لمست الجمهور وكانوا شايفين إنها عودة للكبير أوي زي ما عوّدنا بالكوميديا الهادفة، ده غير إنه اعتبرها استكمال للحلقات اللي عملها الكبير أوي في الموسم اللي فات عن “إدمان السوشيال ميديا” وبرضه حققت نجاح كبير وقتها.