كان مترو الأنفاق في القاهرة الكبرى هو الأول من نوعه في الوطن العربي وأفريقيا، وتم افتتاح الخط الأول منه سنة 1987، والخط التاني سنة 1989، أما الخط التالت فتم افتتاحه للجمهور سنة 1999، ومن وقتها وبيشكل المترو العمود الفقري لوسائل المواصلات في القاهرة الكبرى.
بتشتغل الدولة المصرية حاليًا على إنشاء الخط الرابع من المترو، واللي هيكون حلقة الوصل بين الجيزة ووسط القاهرة بمنطقة السادس من أكتوبر وشرق القاهرة متمثلة في القاهرة الجديدة. ومن المقرر افتتاح الخط الرابع على مرحلتين الأولى هتكون في 2024، والتانية في 2027، بالإضافة لخطين تانيين لسه في مرحلة التطوير.
مع المخطط الضخم للخطوط الجديدة من مترو الأنفاق، بدأت منظومته بثورة على العادات القديمة، وفتحت باب التقديم لوظيفة سائق المترو للستات المصريات لأول مرة منذ افتتاحه.
من بين 30 مرشح للوظيفة دي، نجح اتنين ستات في الاختبارات اللي أشرفت عليها الهيئة القومية للأنفاق، وبكده بقت هند عمر، 30 سنة وأم لطفلين، مع زميلتها سوزان، 32 سنة، أول ستات في مصر يسوقوا مترو أنفاق القاهرة.
بتقول هند، الحاصلة على دبلوم تجارة: “استغرب والداي الفكرة في الأول، لكن دعموني في النهاية”، واعتبرت هند إن الوظيفة مناسبة جدًا لست في نفس وضعها الاجتماعي، بالذات إنها مش بتحبذ الشغل بليل.
أما عن الاختبارات اللي مرت بيها هند وهي بتقدم للوظيفة فبتقول: “كان الاختبار صعب بالذات إنه كان لازم اثبت إني أقدر اتحمل الضغط وأقدر أركز، لإن التحدي الرئيسي هو إنك تفضل في حالة انتباه كاملة لساعات طويلة”.
أما سوزان فبتفتكر أول مرة قادت فيها المترو بين المحطات: “بعض الركاب كانوا خايفين ومتشككين في كفائي وقالوا إنهم مش حاسين بالأمام مع واحدة ست في كرسي القيادة”، وبتضيف: “كانت حاجة جديدة بالنسبة لهم وأنا فاهمة استغرابهم”.
ستات مصر والحياة العملية في مصر: من حق التصويت لقيادة المترو
بعد ثورة 1952، صدرت أول وثيقة بتنظم الحقوق السياسية والاجتماعية سنة 1954، ونصت الوثيقة على المساواة بين جميع المواطنين في الحقوق الاجتماعية والسياسية، ومنها حق المرأة في التصويت والمشاركة السياسية، وفعلًا كان عندنا أول عضوة في البرلمان سنة 1957، وكانت أول وزيرة في تاريخ مصر هي حكمت أبوزيد سنة 1962.
في 2022، بقى عندنا أول ست تقود مترو الأنفاق، رغم إن أول ست حصلت على الوظيفة دي في فرنسا في سنة 1982، وأول ست في أفريقيا كانت المغربية سعيدة عباد سنة 1999.