في فترة العالم كله بيشهد فيها تغير مناخي للأسف مسبب كوارث في عدد من البلاد في كل العالم، حرائق الغابات بتلتهم الكتير من الدول حاليًا وللأسف صعب السيطرة عليها، من تركيا واليونان للجزائر.. وعلشان ممكن بعض الحرائق دي تكون بسبب عامل بشري أو نشاط بيقوم بيه الإنسان ومابنكونش عارفين مدى خطورته وإنه ممكن يتسبب في كارثة صعب السيطرة عليها، تعالوا نعرف نصائح مهمة منتشرة علشان الناس يبقى عندها وعي أكبر وتاخد بالها من الأفعال البسيطة دي واحنا بنقوم بأي نشاط في الغابات أثناء فسحتنا.
- لو هنعمل حفلة شواء أو نشعل نار لأغراض التدفئة أو النور، لازم نتأكد الأول من إننا في مكان مجهز للتنزه في الغابات، كمان لازم نتأكد بعدها إننا قمنا بإطفاء النار بشكل كامل وصحيح، علشان مانتسببش في وجود أي شعلة مهما كانت صغيرة ممكن تبقى سبب لكارثة كبيرة. وبرضه لازم ناخد بالنا إن المسافة بين النار وبين الأشجار ماتقلش عن 3 متر.
- لما نكون في رحلة في الغابات، ماينفعش نركن العربية على العشب الجاف، لإن محرك العربية ممكن يؤدي لنشوب حريق.
- في الأماكن والمباني والبيوت اللي قريبة من الغابات، لازم يتم تنضيف الأرض بشكل مستمر من النفايات والأعشاب الضارة اللي ممكن تبقى قابلة للاشتعال، علشان نبعد عن أي نسبة خطر لحدوث حرائق.
- في أثناء التنزه في الغابة، ماينفعش نسيب زجاجات أو شظايا زجاج على الأرض في أي مكان خصوصًا لو مكان مشمس، لإنها في الشمس بتكون قابلة للاشتعال بشكل خطير.
- لازم نتأكد من إطفاء السجائر أو أعواد الكبريت بشكل كامل قبل ما نرميها على العشب الجاف أو في سلة المهملات.
- واحنا بنعمل camping في الغابة لازم نختار مكان قريب من مصدر مياه ويكون محمي من الرياح، علشان نتجنب الرياح اللي ممكن تتسبب في حريق، ونكون في كل الأحوال قريبين من مصدر المياه علشان لا قدر الله لو حصل حريق نقدر نسيطر عليه بسرعة في بدايته قبل ما يتحول لكارثة.
دي حاجات بسيطة ناخد بالنا منها علشان مانكونش سبب في حدوث كارثة صعب السيطرة عليها وبتهدد حياة كتير من البشر والحيوانات وكمان الموارد البشرية، وخسائرها بتكون غير محتملة، مع إن ممكن تكون نسبة حدوثها بسبب عوامل بشرية قليلة، لكن دي حاجة نقدر نساعد بيها في المحافظة على كوكبنا.