في كل أنحاء الوطن العربي، إسم يسرا مش محتاج لتعريف، فالفنانة المصرية -صاحبة خبرة 40 سنة في السينما والتلفزيون- أشهر من نار على علم. في مسيرتها الفنية الفنانة يسرا قدمت عدد من الأفلام والمسلسلات اللي لاقوا نجاح كبير جدًا في مصر والمنطقة. مش بس كدا، الفنانة سفيرة نوايا حسنة للأمم المتحدة من سنة 2006 لدورها في تسليط الضوء في أدوارها على المشاكل المجتمعية في مصر.
دلوقتي ورمضان على الأبواب، ومع ظهور بوستر مسلسلها الجديد خيانة العهد، تعالوا نشوف إيه هي أبرز أدوار يسرى في رمضان في العشر سنين اللي فاتوا.
قضية رأي عام
في 2007، مسلسل قضية رأي عام اللي بيمثل فيه الفنانة يسرا ولقاء الخميسي وألفت عمر كان يعتبر أول مرة عمل صادم بالشكل ده يظهر على شاشات التلفزيون في رمضان، ولأسباب كتير منها واقعية التمثيل وقوة العمل الدرامي، المسلسل ده حقق نجاح غير مسبوق وفعلًا قدر يحرك الرأي العام تجاه العنف اللي بتتعرض ليه المرأة في مجتمعنا، وإنه مش محصور على طبقة معينة.
في أيد أمينة
يسرا أبهرت العالم العربي في 2008 بمسلسل في إيد أمينة، اللي كانت بتلعب فيه دور صحفية إسمها أمينة بتحاول كشف الفساد في المجتمع، وبحثها عن الحقيقة وصلها لعصابة بتخطف الأطفال من مصر وتبيعهم في الخارج للي اتحرموا من الإنجاب. المسلسل نجح مع الجمهور وعجب النقاد وقدرت يسرا تثبت مرة تانية إنها ملكة الشاشة المصرية.
خاص جدًا
مسلسل خاص جدًا كان من اقوى المسلسلات على الشاشة الرمضانية في 2009. العمل الدرامي بطولة يسرا ومحمود زيدان ويسرا اللوزي وبيحكي عن جوانب الحياة الاجتماعية في مصر اللي بتقابلها دكتورة نفسية اللي بتقوم بدورها الفنانة يسرا.
بالشمع الأحمر
في مسلسل بالشمع الأحمر يسرا بتقوم بدور طبيبة شرعية عايشة حياة هادية وبتحاول تساعد الشرطة في حل جرايم كتير، بس بعد ما بتحل لغز جريمة كبيرة بتتحط في خطر مع اللي ارتكبوها. المسلسل كان من أفضل الأعمال اللي اتعرضت عالشاشة في 2010.
شربات لوز
في شربات لوز، يسرا بتمثل دور خياطة مطلقة عايشة في منطقة شعبية وعندها أخين بتحاول تساعدهم في المشاكل الاجتماعية اللي بيتعرضوا ليها في حياتهم. المسلسل كان عودة يسرا للشاشات بعد غياب سنتين.
إنهم لا يأكلون الخرشوف
بطولة يسرا ومصطفى فهمي ورجاء الجداوي بالإضافة لعدد من النجوم التانيين، إنهم لا يأكلون الخرشوف بيحكي قصة أم مطلقة وأولادها التلاتة وعندهم مطعمهم الصغير اللي بتطبخ فيه الأم طبق اليوم بتاعها. يسرا اللي بتلعب دور ده هي شخصية بتاعت كل الناس اللي حواليها من ولادها وأصحابها لطليقها، بتهتم بحيواتهم ومشاكلهم وبتحاول تساعدهم فيها، ومش بتهتم بنفسها ولا بمشاعرها الخاصة، بس كل ده بيتغير لما يسرا بتبدأ تحب نفسها وتهتم بحياتها وخصوصيتها.
سرايا عابدين
في مسلسل سرايا عابدين اللي كان حديث الكل في 2014، يسرا قدمت دور خوشيار أو الوالدة باشا، أم الخديوي إسماعيل، الدور اللي أبهر الكل ساعتها. يسرا تقمصت الشخصية التركية الأرستقراطية وتقمصت اللكنة التركية بشكل خلى العربي بتاعها مش مفهوم، الشيء اللي فاجئ كل المشاهدين اللي متعودين على يسرا في أدوار مختلفة عن ده.
فوق مستوى الشبهات
بعد غياب سنتين عن شاشة رمضان يسرى رجعت تاني في 2016 بمسلسل فوق مستوى الشبهات اللي يسرا لعبت فيه دور رحمة حليم، أستاذة جامعية متخصصة في التنمية البشرية اللي يبان للكل إنها ناجحة في كل مجالات حياتها بس للأسف في جانب تاني من حياتها أكثر وحشية كانت مخبياه عن العالم. المسلسل لاقى نجاح من الجمهور و أثبت إن يسرا حافظت على موهبتها ورونقها في كل السنين دي.
الحساب يجمع
في مسلسل الحساب يجمع لسنة 2017، يسرا رجعت بمسلسل تاني أقوى من اللي قبليه لشاشات رمضان. في العمل الدرامي ده يسرا بتلعب دور نعيمة المسئولة عن مكتب عاملات وخادمات للبيوت وطبخ للمناسبات، في الشغلانة بتاعتها نعيمة بتشوف المشاكل المجتمعية اللي موجودة في البيوت اللي بتشتغل بيها.
خيانة العهد
في 2020، يسرا هترجع للشاشة في مسلسلها الجديد خيانة العهد، مفيش تفاصيل كتير لسه عن العمل بس يسرا شاركت العالم العربي بالبوستر بتاع المسلسل على حسابها على إنستجرام.