في سياق قصة الأعمال والأفلام الرئيسية، كان في مشاهد بعينها الأكل هو البطل والمحور فيها، بس الغريب إنك بعد ما تقوم وتخلص المشهد، بتلاقي كتلة مشاعر غريبة اتكونت تجاه الأكلة اللي ظهرت، والمشاعر دي كانت خليط ما بين زيادة حب وتقدير للأكلة أو قرار إننا مش هنرجع للأكلة دي تاني، أو حتى هنجربها.
أبو علي – الكرشة
“إيه ما بترجعيش ليه؟.. قصدي مابتكليش ليه؟” غلطة عملتها منى زكي (سلمى) في فيلم أبو علي لما قررت تطلب من حسن إنه يوديها مكان تاكل فيه، بغض النظر عن أن في فئات وأجيال واخدين موقف من الفشة والكرشة، بس فيلم أبو علي أكد على الموقف وخلى فئة جديدة تنضم لفئة كارهي الفشة والكرشة بسبب المشهد، علشان يبقى العنوان الأمثل “مابترجعيش ليه؟”
سفاح الجيزة – صينية البطاطس
بعد مشهد سفاح الجيزة وهو بيعمل صينية بطاطس وفي لحظة من اللحظات حسينا بأمان ونفسنا اتفتحت عليها وهو بيطبخ، لحد ما يديك قلم على وشك وتكتشف أن وجبة صينية البطاطس مرتبطة بكل جريمة للسفاح، فهتلاقي مثلًا بعد ما قتل مراته وسقعها في الثلاجة، عزم أهله على صنينة البطاطس ولا كأن حاجة حصلت، يعني المسلسل قدر يخلق لنا تروما صغيرة من غير ما يحس مع الأكلة.
لن أعيش في جلباب أبي – الكشري
علاقة حب اتخلقت بين الجمهور وبين كشري فاطمة وعربية كشري واللي خلانا نحبه أكثر أن الطبق كان مهم وأساسي في حياة عبد الغفور البرعي، وكان شاهد على بداية قصة حبهم وهو بيطلب الطبق بعدس ودقة زيادة، حتى بعد ما اتجوزوا كان بيغازلها بالكشري ” عارفة أنا نفسي في طبق كشري من إيديكي الحلوين من بتوع زمان”، أصيل يا عبده والله.
موعد على العشاء – المسقعة
الفيلم ده قدم لنا درس أن مش أي حاجة احنا بنحبها وخصوصًا الأكل، ينفع ندي لها الأمان لأن الضربة ممكن تيجي منها وتبقى النهاية على إيدها، زي اللي حصل مع طبق المسقعة اللي اتقدم لحسين فهمي من إيد سعاد حسني، طبق كان يبان لك شهي ويفتح النفس وعايز تمد إيدك وتاكل معاه، بس تكتشف في الآخر أنه مليان بالسم يموتك في ثواني، وللأسف علاقتنا باظت بالأكلة بعد المشهد ده.
الناس في كفر عسكر – الحمام المحشي
هيفضل مشهد فطوم في مسلسل كفر عكسر من المشاهد اللي بنروح لها كل ما نحس إننا جعانين، ونفسنا في الحمام المحشي، وده برغم إنها كانت في الأساس إمرأة متوحشة حتى في أكل الحمام، بس منظر الصينية وهي مليانة 10 أجواز حمام وبتاكل كل واحد ورا الثاني بدون رحمة ولا تفاهم، ولونه وهو بيلمع ماعملش حاجة غير إنه يجوعك، وأنتوا قولوا لنا إيه اللي الأعمال اللي غيرت مشاعرك تجاه أكلة معينة.