بواسطة ميرهان ياسر.
رامى” هو أول مسلسل ويب تلفزيونى كوميدى درامى أمريكى واتعرض لأول مرة في ابريل ٢٠١٩ على “هولو”.
والمسلسل بيدور حوالين حياة شخص مسلم أمريكي من الجيل الأول بيكتشف تحديات الوقوع بين مجتمع مصري مؤمن إن الحياة عبارة عن اختبار أخلاقى، وجيل الألفية اللى شايف إن الحياة مالهاش اى عواقب. وبيبتدى يصارع عشان يوفق مابين إيمانه وأسلوب حياته في أمريكا.
وفى المسلسل، اشترك عدد من النجوم المصريين اللى حققوا نجاح كبير فيه زى بطل ومخرج المسلسل رامى يوسف، عمرو واكد، روزالين البيه، وشادى الفونس.
وتم ترشيح رامي يوسف في الإيمى لجائزة ممثل رئيسي متميز وجائزة الإخراج المتميز في مسلسل كوميدي.
و بعد ترشيح المسلسل للجائزة، علق الفنان رامى على صفحته بـ”الحمد لله”.
و قال رامى لصحيفة لوس أنجلوس تايمز في مقابلة سابقة إنه لما تقول لحد أنك مسلم، الناس بتفهم انك يا إما متشدد أو إنك بتحاول تهرب منه. “أحب فكرة التدرجات والمستويات ، تمامًا مثل أي شخص آخر.”
على الرغم من أن “رامي” بيركز على شخصية أمريكية مسلمة، إلا أن المسلسل جذب جمهور واسع من جيل الألفية من خلفيات عرقية ودينية متنوعة وارتبطوا جداً بصراعات الشخصية فى حياته الرومانسية، وطموحاته الوظيفية والوالدين المتعجرفين.
يوسف قال لهوليوود ريبورتر أنه بيتمنى إن نجاح “رامى” يفتح أبواب لناس تانية لمواصلة استكشاف التجربة الأمريكية المسلمة الواسعة.
آخر كلمة: ألف مبروك رامي يوسف، هنستنى نسمع خبر الفوز قريب!