في قمة تكني، بالتعاون مع (الفرصة) اللي بتقدمه الإعلامية لميس الحديدي، تم الإعلان عن إطلاق فرصة لكل الشباب اللي عندها أفكار جديدة ومفيدة في أي مجال، سواء فكرة علمية أو طبية أو هندسية، بدون قيود، تقدر تقدم وتشترك في برنامج الفرصة، علشان تحقق حلمك وفكرتك على أرض الواقع.
الهدف من البرنامج هو دعم الشركات الناشئة وتقديم فرصة حقيقة لتحويل حلمهم لحقيقة، ودعمهم علشان يكونوا في يوم من الأيام شركات كبيرة رائدة في مجالاتها. وعلى سبيل المثال، سويفل اللي ابتدت كفكرة في الفرصة، دلوقتي موجودة في مصر وبيستخدمها ملايين من المواطنين، وكمان (مزارع) اللي بقت شريك لبنك الطعام المصري، وشركة (كوليبري) اللي أنتجت أول أسفنجة طبية هي الأكتر قدرة على امتصاص الدم في العالم، ودلوقتي فكرتهم بتلف العالم، كل دول بدؤوا في (الفرصة).
لميس الحديدي قالت في كلمتها في قمة تكني: “مش كل الناس بتفهم يعني إيه أقرر ابتدي فكرة مشروع، وأبعد عن الوظيفة الثابتة، وعلشان الأفكار دي أثبتت نجاحها وأثبتت فشل كل اللي بيواجهوا تفكير الشباب برا الصندوق، ده اللي خلانا ندعم الأفكار الجديدة وندعم الشباب ونقدم لهم فرصة حقيقية ونحاول نسهل عليهم التحديات اللي بيقابلوها في بداية مشروعهم”.
الفرصة هيلف أقاليم ومحافظات مصر، علشان يسهل عليك التقديم والحصول على فرصة الوجود في البرنامج هيقربوا لك مهما كان مكانك، وهيتم الإعلان قريب عن مواعيد تواجدهم في كل إقليم، لكن بشكل عام الجولات هتبدأ بعد عيد الفطر.
ودلوقتي تقدر تقدم وتملى الاستمارة، بفكرة مشروعك أيًا كان، المهم تكون فكرتك جديدة وبرا الصندوق وتخدم المجتمع، وبرنامج الفرصة هيساعدك تطور فكرتك المبدئية، وتبتدي مشوار تنفيذها على أرض الواقع مع خبراء ومستثمرين.