سمعت قبل كده عن متحف المخدرات وعرفت أغرب طرق التهريب؟ أو جربت تروح سجن القلعة وتعرف شكل السجون زمان؟ طب جربت تروح تتعرف على وجه آخر لعبد الحليم وأم كلثوم وتشوف مقنياتهم اللي كنت بتشوفها بالأبيض والاسود؟ في الحقيقة مصر فيها أماكن مختلفة عن الأماكن الأثرية المعروفة للزيارة، وهناخد جولة لأغرب الأماكن اللي هتعرفك حاجات عن عوالم وجوانب خفية من مختلف الأزمنة، عشان نخوض تجربة جديدة تكسر الروتين والملل للفسح والخروجات.
متحف رموز الفن المصري
المتحف موجود في المركز القومي للمسرح والموسيقى والفنون الشعبية، في 9 شارع حسن صبري بالزمالك، ويضم عشرات المقتنيات الخاصة بنجوم الغناء والتمثيل زي عبد الحليم حافظ، ونجيب الريحاني وسيد درويش ويوسف وهبي وطلعت زكريا والمنتصر بالله وغيرهم من الفنانين، كمان بيضم الملابس اللي ظهروا بها في أفلامهم.
متحف أم كلثوم
يستقبل المتحف الزوار يوميًا ما عدا الثلاثاء، من الساعة 9 إلى الساعة 4، وعنوانه في شارع الملك الصالح بجزيرة الروضة بالمانسترلي، متحف أم كلثوم بيضم مقنياتها اللي ظهرت بها وتعلقت في ذاكرة الجمهور، من نظارتها وفساتينها ومنديلها وأحذيتها وحقائبها، بالإضافة لفيلم تسجيلي عنها وصور لها في مختلف مراحل حياتها.
متحف سجن القلعة
هل جربت ترجع بالزمن لورا وتروح لأحد السجون في العصور العتيقة؟ لو روحت لقلعة صلاح الدين هتلاقي متحف سجن القلعة وهو سجن قديم اتحبس فيه عدد من الشخصيات العامة التاريخية، ليتم إيقاف العمل به ويصبح مزار سياحي، السجن فيه غرف صغيرة، منها غرف فيها تماثيل شمعية تحاكي طرق تعذيب السجناء لإجبارهم على الاعتراف.
متحف مكافحة المخدرات
الفكرة غريبة صح؟ متحف المخدرات تابع للإدارة العامة لمكافحة المخدرات، موجود في الوايلي وتم تصميمه بغرض توعية أفراد المجتمع من خطورة المخدارات وتجارتها، بيضم المتحف أنواع من المخدرات ومقتنيات استحوذت عليها الشرطة في تهريب المخدرات لتشمل أشياء غريبة مثل الكاسيت والكتب وجبات الفول السوداني. ده غالبًا المتحف الوحيد في قائمتنا الغير مفتوح للزيارة للناس عمومًا، لكن ماينفعش نتكلم عن أغرب الأماكن والمتاحف من غير ما نذكره.
متحف الجمعية الجغرافية
مكانه في 109 شارع القصر العيني، وبيفتح من الساعة 10 إلى الساعة 2:30، المتحف مش معروف لناس كتير لكن إذا كنت من عشاق التراث ومعرفة سلوكيات وشكل حياة الناس في الماضي وازاي كانوا متعايشين بدون تكنولوجيا، فالمكان ده هو الأفضل للزيارة بالنسبة لك.
المتحف بيضم مقتنيات تستخدم في حياة المصريين في الأزمنة السابقة مثل مجسمات الألعاب وأدوات الزينة وأدوات الحلاق والات العزف، وكل ما يخص العادات والتقاليد والفلكولور بالإضافة إلى محمل الكعبة المشرفة.
اخر كلمة : ما تفوتوش قراءة : رومانسية الشتاء: خروجات بره الصندوق داخل القاهرة