على غير العادي، في أكلات ماينفعش نحتفظ بها في التلاجة علشان تعيش وقت أطول أو نحميها من التلف، بالعكس، ده لو حطيناها في التلاجة بتبوظ أسرع وبيكون لها أضرار كمان، علشان كده من الأفضل إننا نحتفظ بها في درجة الحرارة العادية علشان نحافظ عليها من التلف ونحافظ على صحتنا من الضرر اللي ممكن نتعرض له لو أكلناها بعد التخزين في التلاجة. ومنها:
البطاطس
البطاطس في درجة الحرارة الباردة بيتحول النشا اللي فيها لسكر، وبينتج عنه طعم حلو مش طبيعي على البطاطس، علشان كده يُفضل تخزين البطاطس في درجة حرارة الغرفة، وفي نفس الوقت بعيد عن الشمس، لإن الشمس بتحولها للون الأخضر وبيكون طعمها مُر.
الأفوكادو
من الأفضل تخزين الأفوكادو في درجة الحرارة العادية لتجنب الأكسدة، ولإنه بينضج بشكل أسرع في درجة حرارة الغرفة، مش في التلاجة.
الريحان
من أكتر الحاجات اللي لازم نتجنب تخزينها في التلاجة، لإنه بيمتص الروائح الموجودة في التلاجة، غير إنه بيدبل في درجة الحرارة الباردة.
البصل
تخزين البصل في التلاجة بيخليه يتعفن ويكون طري، وده بسبب الرطوبة، علشان كده من المعروف إنه بيتم تخزينه في درجة الحرارة العادية.
التوت
الرطوبة في جو التلاجة ودرجة الحرارة الباردة بتدمر التوت، وأحسن طريقة لحفظه هي وجوده في درجة حرارة الغرفة، علشانة نتفادى تلفه.
الموز
الموز بالذات بيحتاج درجة حرارة دافية علشان ينضج، فطبيعي إن التلاجة تكون مش أحسن اختيار لتخزينه ومش البيئة المناسبة لنضجه.
العسل
الاحتفاظ بالعسل في التلاجة بيغير قوامه ويخليه سميك، علشان كده يُفضل تخزين العسل في درجة حرارة الغرفة وبعيداً عن أشعة الشمس المباشرة.
القهوة
القهوة لما تتخزن في التلاجة بتمتص روائح الأكل الموجود فيها، وعلشان كده، الأفضل تخزينها في درجة حرارة عادية. وفي العادي، من الأحسن نشتري القهوة بكميات صغيرة أول بأول علشان تكون مُحتفظة بريحتها ونكهتها القوية المميزة.