جهاز أساسي في المطبخ بنستعمله كل يوم، بنستخدمه بس في التسخين أو التسوية، لكن مايجيش في بالنا إنه ممكن يبقى ليه استخدامات تانية مش مشهورة ممكن تسهل علينا حاجات كتير بنقوم بيها في المطبخ سواء طبخ أو إعداد الأكل أو حتى التنضيف للأدوات اللي في المطبخ، وكلنا بنبقى نفسنا نعرف استخدامات سحرية لكل حاجة علشان تساعدنا وتسهل علينا حياتنا، والنهارده هنشوف ممكن نستخدم المايكروويف إزاي في حيل وطرق تانية غير التسخين.
تقطيع البصل من غير دموع
مش هنحتاج ندور على معجزات سحرية تخلينا نقطع بصل من غير دموع، علشان لو استخدمت الميكروويف للمهمة دي هتخلص بكل سهولة، لو حطينا البصل في الميكروويف مجرد ثواني قبل تقطيعه، ده هيقضي على مادة الكبريت اللي موجودة في البصل اللي بتسبب الدموع عند التقطيع، فهنقدر بعدها نقطعه بكل سهولة.
تقشير التوم
ودي كمان من المهمات اللي بتضايقنا في المطبخ وأوقات كتير بيبقى التوم صعب في تقشيره، لكن بحيلة بسيطة ممكن نتفادى ده، عن طريق إننا نحط فصوص التوم 10 ثواني في الميكروويف، ونخرجه نقشره على طول، هنلاقي قشرته بتتشال معانا بكل سهولة.
كاب كيك
لو نفسك تاكل كيك لكن مكسل تعمله ومستصعب إنك تلاقي المقادير كلها، فيه وصفة بسيطة تقدر تعملها بسرعة في الميكروويف، هتعملها في مج، تحط فيه حوالي 35 جرام دقيق، و50 جرام سكر، ومعلقتين كبار كاكاو غير محلي، وشوية صغيرين ملح وبيكربونات، وتقلب كويس وبعد كده تحط على الخليط ده 3 معالق كبار لبن، ومعلقتين كبار زيت، و رشة فانيليا، وتحطه في الميكروويف لمدة دقيقة أو دقيقتين وهتحصل على كيك لذيذ في وقت قصير وبمكونات قليلة.
الطبخ على البخار
بطريقة أسهل، ممكن تطبخ الخضار المفضل ليك على البخار بطريقة صحية في الميكروويف، اغسل الخضار وحطها في طبق مناسب للميكروويف، واطبخه من غير ما تحتاج تزود مياه، لكن ده بيعتمد على نوع الخضار نفسه، لكن بشكل عام المدة اللي بيحتاجها مثلًا الجزر والروكلي بتكون 5 دقايق، والكوسة 6 دقايق، والبسلة دقيقتين بس.
تنضيف سفنجة المطبخ
ممكن نستخدم الميكروويف علشان نغسل ونعقم الأدوات اليومية ومنهم سفنجة المطبخ، اللي بتكون بيئة خصبة للبكتيريا لو ماتنضفتش واتعقمت بشكل كويس، وعلشان تقوم بالمهمة دي، رطب السفنجة بالمياه وحطها في الميكروويف وشغله دقيقتين، هتخرج نضيفة ومعقمة.
حفظ الأعشاب لفترة أطول
علشان نحافظ على الأعشاب وتكون محتفظة بنكهتها وريحتها، ممكن نجففها في الميكروويف وبعدين نحطها بين طبقتين من الورق اللي بيمتص الرطوبة، وتسخنها لمدة دقيقتين أو تلاتة.