بواسطة منة حسني.
مين مش بيحب السباحة واللعب في المياه في فصل الصيف؟ السباحة من الرياضات البدائية اللي اكتشفها الإنسان بشكل فطري من العصر الحجري القديم، والسباحة بتعتبر كمان من أوائل الألعاب الرياضية اللي شاركت في الألعاب الأولمبية من سنة 1896، وشاركت النساء في منافسات السباحة للمرة الأولى في النسخة الخامسة من الأولمبيات سنة 1912.
الرياضة دي ليها أنواع وطرق كتيرة زي سباحة الصدر، والظهر، والفراشة، والحرة، والمونو أو سباحة الزعانف. أول أربع طرق للسباحة معروفين بشكل كبير عند أي حد بيمارس الرياضة دي، بس المونو بتعتبر جديدة شوية علينا.
سباحة المونو بتعتمد علي زعانف اسمها زعانف المونو، والسباحة بتكون تحت المياه بشكل تموجي زي حركة الدولفين في المياه بالظبط، وتكنيك المونو بيعتمد علي تقليل مقاومة السباح للمياه، وده عن طريق فرد الذراعين للاتجاه الأمامي بأقصى شكل يقدر عليه السباح، مع تثبيتها عن طريق وضع الكفين علي بعض، والفراغ بين الذراعين بيكون شبه المثلث.
بتبدأ أولى حركات المونو من الرقبة والأكتاف، وبينتقل تأثير الحركة بالتدريج لمنطقة الحوض، وبتحصل الحركات بشكل شعوري من السباح بالتقدم للأمام مع الحفاظ على السباحة في خط مستقيم. التدريج ده بيُنصح بيه في تدريب المبتدئين، وهو بيكون بشكل بطئ لحد ما يتعود عليه السباح ويتقنه، وبعدين يزود سرعته.
الأساس في المونو هو زعنفة عريضة واحدة بتُستخدم في الرجلين مع بعض في وقت واحد لزيادة القوة الدافعة. الزعنفة زي غالبًا ما بتكون من مادة الفايبر جلاس المرن، وجيوب الرجلين من المطاط. وبتكون زعنفة المونو متدرجة زي السمك، بحيث تكون سميكة من عند الرجلين، وسمكها بيقل كل ما اتجهنا للأطراف.
وبتعتبر سباحة المونو أسرع أنواع السباحة، وده بيأكدهولنا الأرقام القياسية العالمية زيّ إن الرقم القياسي لـ 50 متر سباحة تقليدية هو 21,81 ثانية، والرقم العالمي لسباحة 50 متر سطحي مونو هو 14,83ث، و16,07ث لـ50 متر تحت الماء!
