طبقًا لإحصائيات الجهاز المركزي للتعبئة العامة والإحصاء، كل أربع دقايق بيكون فيه حالة طلاق جديدة في مصر. للأسف زيادة نسب الطلاق في الفترة الأخيرة كان مصحوب بتدهور في الصحة النفسية لكتير من المصريين، وسعات فعلًا الطلاق بيكون هو الحل المنطقي الوحيد بعد ثبوت فشل العلاقة، بس إزاي نقدر كمجتمع نتجنب النسب الكبيرة دي؟ شباب من الجامعة البريطانية في مصر شايفين إن الحل هو في استشارات ما قبل الجواز.
مجموعة طلاب من كلية الاعلام بالجامعة البريطانية قرروا يدشنوا مبادرة جديدة تحت إسم “ما قبل البداية” بحيث يحاولوا يساعدوا في حل المشكلة ويقدروا يوعوا المجتمع بأهمية الخطوة دي كمحاولة لضمان حياة سعيدة للمتجوزين جديد. المبادرة بتحاول توعي وتشجع المخطوبين جديد بإنهم ياخدوا خطوة الاستشارة دي عشان يقدروا يعرفوا بعض أكتر ويفهموا المسئوليات اللي بتيجي مع خطوة كبيرة زي الجواز.
بعد ما عملوا بحث مبدئي عن طريق استطلاعات رأي ومشاركات من دكاترة نفسيين وخبراء استشارات زوجية، قدروا يوصلوا في بحثهم لمدى أهمية الاستشارات النفسية قبل الجواز للطرفين وقد إيه بتساعد في تجنب الطلاق في المستقبل.
“قبل البداية” في تواصل مع د. نهى النحاس مؤسسة”Heal Counseling Center” -واحد من أهم مراكز الاستشارات الزوجية والصحة النفسية في مصر- عشان يقدروا يساعدوا الناس اللي هتستجيب للمبادرة بتاعتهم.
أخر كلمة: لو حابب تعرف أكتر زور صفحتهم على فيسبوك من هنا.