النهارده هو يوم ميلاد الفنانة العظيمة الراحلة ليلى مراد، اللي أجيال بحالها كبرت واتربت على أغانيها، ومن عصرها ولحد دلوقتي، لسه بتعتبر ليلى مراد مدرسة كبيرة للمطربين بيتعلموا من مشوارها الفني وأغانيها. وبجانب الأغاني العظيمة اللي قدمتها خلال مشوار حياتها، فهي كمان قدمت 27 فيلم في السينما المصرية وتعتبر أيقونة في الغناء ومن أبرز الممثلات في القرن الـ 20. واحتفالًا بيها وبتاريخها الفني المشرف، جمعنا قائمة بأفضل أغاني الفنانة الراحلة.. بس قبل ما نتكلم عن الأغاني تعالوا نتكلم شوية عن حياتها ومسيرتها الفنية.
باسم “ليليان” اتولدت في مدينة الأسكندرية ، وبدأت طريق الغناء من وهي في عمر الـ 4 سنين بس. وسنة 1934 اتقدمت للإذاعة كمغنية، وبعد قبولها، بدأت رحلة الشهرة والنجومية. فخلال مشوارها الطويل غنت حوالي 1200 أغنية كان بيكتبهم ويلحنهم كبار المؤلفين والملحنين في الوسط الفني زيّ محمد فوزي ومحمد عبدالوهاب.. واتجوزت ليلى مراد من أنور وجدي أثناء مشاركتها معاه في فيلم ليلى بنت الفقراء، واستمر الزواج 8 سنين بس، ومن بعدها اتجوزت مرتين، مرة من وجيه أباظة وبعدها من فطين عبدالوهاب وأنجبت طفلين، وتوفت سنة 1995.