خروجة الويك إند بنفكرلها دايمًا إزاي نعمل حاجة جديدة غير اللي متعودين عليه، ودلوقتي حاجات كتير جديدة للخروجات اتكلمنا عنهم قبل كده في مقالات، والنهارده هنتكلم عن خروجة بقينا نشوف الناس بتروحها ومن الصور والـ Stories لقينا الموضوع فعلًا مغري، بين السما الصافية والجو الدافي والصحرا، لازم علشان تحقق خروجة زيّ دي تسافر يومين في الصحرا، دلوقتي لا، ممكن تعمل كده في القاهرة، في المعادي، في محمية وادي دجلة، محمية طبيعية بتتميز بجو خاص لازم تجربه، بس علشان نروح خروجة زيّ دي ونتبسط فيها، لازم نعمل حسابنا في كذا حاجة ونحضر نفسنا وإيه اللي هنحتاجه علشان نستمتع بالخروجة كلها من غير حاجة تبوظها.
أول حاجة في الجو اللي محدش فاهمله حاجة اليومين دول، الأحسن تتابع الطقس هيكون إزاي في اليوم اللي هتروح فيه، وغالبًا لو هتروح دلوقتي فالجو دافي، اعمل حسابك تلبس لبس خفيف علشان كمان الأجواء الصحراوية وسط الرمل وكده، لكن برضه اعمل حسابك تاخد معاك جاكيت أو شال علشان لو الدنيا بردت برضه زيّ طبيعة الأجواء الصحراوية دي بليل، وطبعًا لازم تلبس لبس مريح تعرف تتحرك فيه بحرية وسط رمل وصخور وتنطيط وتسلق وتخييم.
طبعًا الأكل والمياه والمشروبات حاجة مش هننساها، مع شنطة إسعافات أولية صغيرة علشان لو لاقدر الله حد اتجرح أو اتصاب وسط الصخور، وكشافات علشان لو حبيتوا تدخلوا الكهوف، ولو ناويين تخيموا لبليل، أكيد ماتنسوش تاخدوا باور بانك للموبايل اللي أكيد هيفصل بسرعة من كتر الصور اللي هتحبوا تتصوروها في طبيعة المكان الجميلة، وبنفكرك كمان ماتنساش تاخد معاك كاب وشمسية علشان الشمس لو كانت حامية.
محمية وادي دجلة مكان مناسب كمان لو انت بتحب تركب عجل، هتستمتع بده وسط صحابك في محمية مالهاش مثيل.