بنستنى الويك إند علشان نخلص من ضغط الشغل أو الدراسة ونريح ونعمل خطط نشوف صحابنا أو قرايبنا، بس دايمًا بنزهق من الأماكن المكررة والخروجة بترسى على إننا ننزل ناكل في أي مكان أو نعمل نفس اللي بنعمله كل ويك إند أو ندخل سينما، بس فيه حاجات جديدة وأفكار لخروجات مع صحابك مش تقليدية وهتتبسطوا فيها مع بعض وكمان تخرجوا طاقتكوا اللي مشحونة طول الأسبوع، وده هتلاقيه في أماكن للعب التنطيط، أو متاهة لازم تحلوا ألغازها علشان تخرجوا، أو بيت رعب تصرخ فيه زيّ ما انت عايز بدل ما انت مش لاقي مكان تصيح فيه براحتك طول الأسبوع.
Trapped Egypt
موجود في التجمع الخامس، والأسعار والـ Rooms هتلاقيها على الويب سايت بتاعهم، بتختلف الأسعار حسب كل روم، بس في العموم هتتبسط مع صحابك وهتجربوا خروجة جديدة.
Gravity Code
اللعب والتنطيط وتفريغ الطاقة كله، بكذا فرع في التجمع وأكتوبر وألماظة، تختار القريب ليك، وتاخد صحابك أو قرايبك كمان وتتفسحوا وتفضوا طاقتكوا السلبية كلها في الألعاب هناك.
Magic Planet
لو ملكش في الفرهدة والتنطيط والألعاب دي، ممكن تروح ماجيك بلانيت وتلعب ألعاب عادية وتكسب هدايا مختلفة، وتتحدى صحابك مين اللي هيكسب فيكوا.
Flipout
اما لو انت من سكان أكتوبر اللي مقاطعين الناحية التانية من العالم ومش بيخرجوا غير هناك، ممكن تروح فليب أوت، مكان تنطيط وألعاب في مول العرب، وبكده هتفرغ طاقتك وتخرج مع صحابك ومن غير ما تخرج من الكوكب بتاعك.
Air Zone
لو انت من نفس نوع الناس اللي فوق برضه بس مكانك التجمع، مش هنسيبك برضه، آير زون في بوينت 90 في التجمع.
The Horror House
بالنسبة بقى لفقرتنا المفضلة وهي الصياح، جبنالك مكان تصيح فيه براحتك وهيبقى من حقك ساعتها، لو كمان بتحب الرعب، خد صحابك وروحوا الفرع الأقرب ليكوا سواء في مول العرب أو ميراج مول.
Immersive VR
لو مش عاجبك بقى أي حاجة من اللي فاتوا دول، تلبس نضارة وتكون في وسط مكان اللعب بدل ما بتلعب دايمًا من ورا شاشة؟ هنا هتعمل ده، ومكانه في التجمع.
Alienz Gamerz VR
لو انت في أسكندرية بقى، مش هايفوتك فرصة اللعب في الأماكن دي برضه، علشان Alienz Gamerz VR موجودين في أسكندرية.
Sherlocked Egypt
لو بعيد عليك بلاد ما وراء الطبيعة اللي اسمها تجمع وأكتوبر والكلام ده، ومابتخرجش من وسط القاهرة، فيه مكان في الدقي هتقدر تلم صحابك وتروحوا تلعبوا هناك وترعبهم.
The Room Egypt
في مول العرب، رعب ومغامرة وألغاز وكل اللي قلبك يحبه، هتفرغ كل طاقتك اللي اتشحنت في الأسبوع كله.