من 8 شهور، حصلت واقعة انتشرت على السوشيال ميديا بـ”عروسة الإسماعيلية”، تفاصيل الواقعة كانت لعريس بيضرب عروسته في الزفة وهي لسه خارجة من الكوافير وبيجرها في الشارع، والبنت بيغمى عليها وبعدين بتفوق تكمل الفرح. فيديو الضرب انتشر في ساعات قليلة على كل السوشيال ميديا وسبب جدل كبير، وبعدها العريس والعروسة عملوا فيديو في بيتهم وبيقولوا إنه كان خلاف بسيط بينهم واتحل وهما دلوقتي سمنة على عسل.. بس السمنة والعسل بعد 8 شهور ظهر إنهم كانوا تحت التهديد والعنف.
عروسة الإسماعيلية ظهرت من جديد في بلاغات بتستغيث فيها من جوزها، اللي بيمارس ضدها عنف وحبسها في البيت وبيعذبها وبيهددها هي وأهلها، وعملت محضر ضده في قسم شرطة ثان. وحسب أقوال العروسة “مها محمد”، الخلافات بدأت من قبل يوم الفرح لما اكشتفت بعد كتب الكتاب إن عريسها كان متجوز عرفي، ورفضت الاستمرار وطلبت الطلاق، لكنه وقتها راح لبيت أهلها وتهجم على قرايبها وهددهم بالسلاح.
استباح عرضي فى الشارع وحبسني.. أول ظهور لعروس الإسماعيلية عقب اعتداء زوجها عليها للمرة الثانية
استباح عرضي فى الشارع وحبسني.. أول ظهور لعروس الإسماعيلية عقب اعتداء زوجها عليها للمرة الثانية
Posted by القاهرة 24 on Saturday, October 8, 2022
صرحت مها لوسائل الإعلام إنها كانت بتواجه عنف جسدي من جوزها خلال شهور الجواز، وإنه هددها بالسلاح وهددها كمان بإلقاء مادة حارقة على وجهها، وهددها بأهلها وتوعّد بقتل والدها وزوج أختها وقرايبها الرجال من ولاد العم والعمة، باختصار لأي حد يتشدد لها، فاضطرت تكمل الزواج، وأكدت إن الأمور بقت أسوأ بعد الجواز، وإنها واجهت ضرب وإهانات وتعذيب وحبس بالأسابيع.
“حبسني في شقة أخوه 15 يوم، وكل ما يدخل لي أكل يضربني علقة”، ده اللي قالته العروسة عن مقتطفات من اللي حصلها خلال شهور الجواز من المتهم، وأكدت إنه كان رافض يطلقها علشان مش عايز يديلها حقوقها، ولا عايز يخسر تمن الفرح والمصاريف اللي صرفها.
في التحقيقات وضحت إنها ماكانتش عايزة الأمور توصل لكده، ولا كانت حابة الموضوع يتطور ويتناقش في الإعلام، بس اضطرت لكده بسبب قسوة زوجها وأسرته على حد قولها، وقالت بالتحديد: “كنت خايفة أصعد الموضوع عشان ماكنتش عاوزة فضايح تاني، بس للأسف دول ماينفعش معاهم الهدوء عشان كنت هفضل متبهدلة”.
الأجهزة الأمنية في الإسماعيلية قبضت على “عبدالله” المعروف على السوشيال ميديا بزوج عروس الإسماعيلية، بعد ما العروسة “مها” قدمت فيه بلاغ بتتهمه بالتعدي المتكرر عليها وضربها، وإصابتها بكدمات، وحبسها في البيت أسبوعين.