وداعًا للسهر والكفية على الكتب طول الليل، وداعًا لزنقة الامتحانات في آخر خمس دقائق، ووداعًا لتعب الأعصاب وأنت قاعد مستني نتيجة الشهادة والتقدير اللي كنت متوقع ينقلك نقلة تانية، ووداعًا للوقفة بالطوابير علشان بس تدخل من باب الجامعة، كل ده بقى سهل وفي لمح البصر وبـ9 آلاف جنيه، أما بالنسبة للي اتخرجوا خلاص فاتتهم الفرصة.
من خلال صفحة على الفيس بوك نشرت إعلانات لأي حد نفسه يتخرج ومش عارف، أو مكسل يذاكر علشان المذاكرة مرهقة للبشرة والكريمات بقت غالية، صفحة بتبيع جميع أنواع الشهادات التخرج سواء بكالوريوس وليسانس، أو لو مزنوق في ماجستير، ودكتوراه لو عايز تعدي كل الحدود من جامعات مصرية وعلى رأسهم جامعة القاهرة وكلها شهادات جامعية موثقة، ومعتمدة، ومصدقة للبيع، بس المعلومة اللي ماكنتش واضحة هل الـ9 آلاف دول لكل الشهادات ولا بتختلف باختلاف الدرجة التعليمية؟ يعني يصح نساوي طالب ماجيستير لسه بيشق طريقه بواحد معاه دكتوراه؟
بسبب الصفحة كشف المتحدث باسم وزارة التعليم العالي عادل عبدالغفار، تفاصيل اتخاذ الإجراءات القانونية وأكد أن الوزارة رصدت انتشار الصفحة على “فيسبوك” وتم عرض الأمر على الدكتور أيمن عاشور وزير التعليم العالي والبحث العلمي، وإحالة الموضوع للجنة الضبطية القضائية.
أما بالنسبة للقانون، في المادة 211 أو المادة 212 عقوبة التووير بتصل للسجن المشدد أو السجن مدة أكثرها عشر سنين، أما عقوبة استعمال الشهادات المزورة نصت المادة 214 على “كل من استعمل الأوراق المزورة المذكورة في المواد السابقة وهو يعلم تزويرها، يعاقب بالسجن المشدد أو بالسجن من ثلاث إلى عشر سنوات”.. يافرحة ما تمت.