زي ما في أداء ممثلين ومسلسلات مايتفوتش، في برضه قطع فنية وأزياء أخدنا بالنا منها في رمضان ماينفعش نعديها كده ونسيبها في حالها، كل قطعة منهم عملت حالة وفكرتنا بحاجة، فقررنا نجمعهم ونعمل ريد كاربت على الضيق وعلى قدنا ونسميه “ريد كاربت الغلابة”..
نظارة عيسى الوزان
للوهلة الأولى في المسلسل بعد ظهوره على الشاشة بشخصية عيسى الوزان، حسيت بأجواء عادل أدهم ونظارته في حافية على جسر الذهب وهو بيقول لميرفت أمين “يا قطة”، وحسيت تقريبًا إنها نفس النظارة بنفس الشر مع نفس خفة الدم، وبيكملها مع مجموعة من البدل القطيفة بفيونكاتها، كولكشن بيخلينا مستنين كل حلقة والتانية علشان نشوف البدلة اللي جاية عاملة ازاي.
عبايات سترة
شوية جلاليب رمضانية ظهرت بيها سترة (فريدة نصر) في العتاولة هتطلع من عينينا، ألوان وأشكال مختلفة وكلها ألوان مبهجة شبه بيض شم النسيم، وطبعًا لا ننسى القطعة الأشهر وهي تعصيبة الرأس اللي بتعملها معاها، ولاحظت أن ربطة الإيشارب بتختلف من موقف لموقف هتلاقي مرة معها وردة ومرة من غير حسب الموقف والمشهد.
بونيه نعمة
حاولت في الحلقات أنها تغيرها وتعمل لفة الإسبانش كنوع من التجديد، بس البونيه كان هو البطل مع نعمة الأفوكاتو وكان شاهد على أهم الأحداث، وكان عامل خليط حلو مع البدل اللي بتحضر بيها المرافعات، أو قعدتها على القهوة مع مشروب الحلبة المفضل.
مربوحة والطاووس
بترجع لنا مربوحة بقوة مع أطقم مربوحة الجزء الثاني، بعد ما لبست النحلة والممرضة السنة اللي فاتت واللي قبلها، ظهرت لنا باللون الأخضر، وعلى رأسها تاج كله ريش في ريش، فكرتنا بالطاووس، وكل ده علشان تحاول تتخلص من اللعنة بالخضة اللي بتسببها للناس بسبب الطقم.
لفة طرحة سحر
بعيدًا عن إن جالا هشام تفوقت على نفسها في الدور ده، وعيطتنا كتير معاها، بس لفة طرحة الشخصية اللي عملتها “سحر” كانت عاملة قلق شوية لإنها فكرتهم بلفات الطرح العتيقة اللي خلصت من 2010 وكنا بنقعد قدام المرايا بالساعات علشان نلفها، بس شابوه للمجهود في اللفة بصراحة.